پشـتی ڤـەكێشانـا ئـەمـریكا.. كی دێ ڤالاتیێ ل ئیراقێ پڕكەت؟
شهاب ئاكرەیی
پرسیارا هەرە گرنگ نە ئەوە: ئەرێ دێ ئەمریكا ژ ئیراقێ ڤەكێشیت؟ لێ: پشتی ڤەكێشانێ دێ چ رویدەت، و كی دێ وی جهی پڕكەت یێن بەرهەڤبوونا سەربازی یا ئەمریكی بجه دهێلیت؟
گوهۆڕینا ئەمریكی ب پێدڤی ناگەهینیتە دوماهییا پەیوەندیان ل گەل بەغدا؛ چونكی ڕێكا دیاركری ل سەر بنەمایێ دەربازبوونێ یە ژ ئەركێ سەربازی یێ هەڤپەیمانیێ بۆ هەڤپشكیا ئەمنی یا دوقۆلی، كو ڕاهێنان، شۆڤێری (راوێژكاری)، هەڤكاریا د دژایەتیكرنا تیرۆرێ دا و ئالۆگۆڕكرنا زانیاریان بخۆڤە دگریت. بەرێ ژی واشنتونێ جەخت ل سەر هندێ كریە كو پەیوەندیا پاشەڕۆژێ بتنێ د بەرهەڤبوونا سەربازی دا كورت نابیت، بەلكو پشتەڤانیكرنا هێزێن ئیراقی و پێشمەرگەی ژی ب خۆڤە دگریت.
بەلێ ئیراق ل بەرانبەر سێ ڕێكێن ئەگەری ڕاوەستیایە، یا ئێكێ، دەولەت سەركەفتنێ د ڤەگوهاستنا ڤەكێشانێ دا بینیت بۆ دەرفەتەكێ بۆ ب هێزكرنا سەروەریا خۆ، ب ڕێكا ئێكخستنا بڕیارا ئەولەهیێ و زەڤتكرنا چەكی د دەستێ دامودەزگەهێن فەرمی دا، و ئاڤاكرنا شیانێن سەربەخۆ د هەواڵگری، بەرگری و دژە-تیرۆرێ دا. یا دووێ، ڤالاتیەكا ئەمنی و سیاسی دروست ببیت كو هێزێن چەكدار یان هەرێمی مفای ژێ وەرگرن، نەمازە ئەگەر دۆسیا چەكێ دەرڤەیی دەولەتێ ب بێ چارەسەری بمینیت؛ كو ئەڤە ئاریشەكا هەتا نوكە بەردەوامە ب گوێرەی ڕاپۆرتێن نوو.
یا سێێ، سیناریۆیەكا ناڤنجی یە: ڤەكێشانا سەربازی یا ئەمریكی ل گەل بەردەوامبوونا كارتێكرنا ئەمریكی یا سیاسی، ئەمنی و ئابووری ب ڕێكا هەڤپشكییا دوقۆلی.
ل ڤێرێ هەرێما كوردستانێ دكەڤیتە بەرامبەر هەڤكێشەیەكا هەستیارتر. هەرێمێ د ساڵێن بۆری دا مفا ژ هەڤكارییا ئەمریكی وەرگرتییە د راهێنان و چەكداركرنا پێشمەرگەی دا، و ل سەر هەمئاهەنگییا ئەولەهی د رووبەڕووبونا داعشێ دا، هەروەسا هەڤكارییا بەرێ یا ئەمریكی پێشئێخستنا شیانێن هێزێن ئیراقی و پێشمەرگەی پێكڤە ب خۆڤە گرتبوو.
لەورا ئاڵنگارییا كوردستانێ بتنێ د نەبوونا سەربازێن ئەمریكی دا نینە، بەلكو د شیانێن هەرێمێ دانە بۆ ئاڤاكرنا دەزگەهەكێ ئەولەهیێ یێن ئێكگرتی، و پەیوەندیەكا جێگیر ل گەل بەغدا، و هەڤپشكێن نێڤدەولەتی یێن جۆراوجۆر، ب بێ كو بمینیتە ڤەبەستی ب ئێك لایەن ڤە.
ئاماژەیێن ئابووری و سیاسی ژی ئەڤەنە كو ڕەنگە ڤەكێشان بەغدا و هەولێرێ پاڵبدەت بۆ ڕێكخستنڤە یا كارتێن خۆ. هەر چەندە سێبەرا ئەمریكی پاشڤە بچیت، گرنگییا دیالۆگێ د ناڤبەرا هەردو لایان دا زێدەتر دبیت د دۆسیێن نەفتێ، سنووران، دەڤەرێن كێشە ل سەر، پێشمەرگەی، و ژێدەرێن دارایی دا.
پرسیارا كوورتر ل ڤێرێ ئەڤە نینە: ئەمریكا یان ئیران؟ بەلكو: ئەرێ ئیراق دشێت ببیتە خۆدان بڕیار د دەولەتا خۆ دا؟
بۆ كوردستانێ ژی، نەڤێت ئارمانج بگەڕیێت ب دووڤ جێگرەكێ بۆ سەربازێ ئەمریكی، بەلكو ئاڤاكرنا هێزەكا سیاسی و دامەزراوەیی یە كو هەرێمێ ب شیان بئێخیت بەرهەڤیێ د پاراستنا بەرژەوەندیێن خۆ دا بكەت د ناڤ ئیراقێ دا، دگەل پاراستنا پەیوەندیێن خۆ یێن نێڤدەولەتی.
كەواتە ڤەكێشان ڕەنگە ڤالاتیەكێ دروست بكەت، و ڕەنگە دەرفەتەكێ ژی دروست بكەت، جوداهیا د ناڤبەرا ڤان هەردوان دا دێ ب شیانێن دەولەتا ئیراقێ و هەرێما كوردستانێ هێتە دیاركرن بۆ پڕكرنا ڤالاتیێ ب ڕێكا دەزگەهان، نە ب ڕێكا میلیشیایان و هەڤڕكیان.
