عیراقیان خوه پێ مه‌زن دكر، خه‌لكه‌كێ دی بۆ دگرین!
ژبلی كو عیراق ده‌وله‌ته‌كا زه‌نگینه، كو خۆرستی دلۆڤانیه‌كا مه‌زن پێ بریه و پترۆل كریه رزقێ وێ، هه‌ر چه‌نده خه‌لكێ وێ چ خێر ژ وێ پترۆلێ نه‌دیتیه، به‌لێ یا ئه‌ردێ وێ دا هاتیه عمبار كرن. ل سه‌ر ئه‌ردێ عیراقێ مه‌زنه ئاڤه‌دانیه‌كێ سه‌رهه‌لدایه، كو دبێژنێ ئاڤه‌دانیا (حچاره) جۆتكێ رووبارا، ل سه‌ر ڤی ئه‌ردی گه‌له‌ك باژێرێن دیرۆكی هه‌بوون، نوكه ژی لێ ماینه، به‌لێ به‌ری چه‌ند رۆژه‌كان مه ڤیدیۆیه‌كا داعشێ دیت كو باژێرێ نه‌مرۆد یێ شوونواری د بژكاند، هه‌ر شوونوارناسه‌كێ ئه‌و دیمه‌نه دیت بیت، هه‌ر چ نه‌بیت دلێ وی یێ لێدای و یێ پێ كه‌رخی.
هه‌رگاڤه‌كا هه‌لكه‌ڤتبا و عیراقیه‌ك ل دیوانا كه‌سه‌كێ بیانی روونشتبا دا بێژیت: ئه‌م خودانێن ئاڤه‌دانیێ نه، مه سۆمه‌ری و ئه‌كه‌دی و ئاشووری و بابلی یێن هه‌ین، قانوونا ژ هه‌میان كه‌ڤنتر ل دنیایێ یا ل سه‌ر ئه‌ردێ مه هاتیه دانان، نڤیسین مه یا نیشا خه‌لكی دای، ژبلی چه‌ند هه‌ڤۆكێن دی كو گرێدای وێ چه‌ندێ بوون، مرۆڤ دفنا خوه پێ به‌ته به‌ر ئه‌سمانی و خوه ژ خه‌لكی مه‌زنتر دانیت. به‌لێ هه‌ر كه‌سێ دووڤچوونا ڤه‌خواندنا ڤی چیری بكه‌ت، دێ زانیت خه‌لكێ عیراقێ (دگه‌ل سیاسه‌تڤانێن خوه) چه‌ند رۆله‌كێ خراب د وێرانكرن و هۆرگوماندنا ڤان شوونواران دیتیه، ئه‌و شوونوارێن ئه‌ورۆپیان ژی ژ ده‌وله‌ت سه‌رێ خوه به‌ری نوكه بۆ وه‌لاتێن خوه ڤه‌گۆهاستین، یێن هاتینه پاراستن، مینا وان شوونواران ئه‌وێن ل مۆزه‌خانێن (لۆڤه‌ر و به‌رلین و له‌نده‌ن.. . هتد) هاتینه عمباركرن.
بۆ به‌حسكرنا وان شوونواران ئه‌زمانێ عه‌ره‌بان هندێ درێژه، ناهێلن كه‌س خودانێ وان شوونواران بیت، خوه ب میراتگرێن وان ئاڤه‌دانیا ددانن، لێ بۆ پاراستنا وان چ گاڤێن باش نه هاڤێتینه، به‌حسێ خه‌به‌ری: هه‌ر كه‌سێ سه‌ره‌دانا بابلێ بكه‌ت، كو مه‌زنه باژێره‌كێ شوونوارنه، دێ هزر كه‌ت یێ د ناڤ قه‌سره‌كا سه‌دامی دا، ل دنیایه‌كا جها ناڤێ وی و عرۆبه‌تا وی یێ هاتیه نڤیسین، ئه‌و جهێ هندێ هێژا یێ هاتیه خرابكرن.
ئه‌ڤه ژلایێ پاراستنا وان شوونوارنڤه، هه‌كه ئه‌م به‌حسێ هه‌لشكاڤتنا وان شوونواران بكه‌ین، دێ كه‌ڤینه زه‌یقه‌ته‌كا دی، ئه‌و ژی پتریا وان كه‌سا ئه‌وێن ڤه‌كۆلین ل سه‌ر وان شوینوارا كرین، ب دلینی و خۆپه‌رێسی و تۆخم و نفش و دوینده‌هـ په‌رێسی سه‌ره‌ده‌ری یا ل گه‌ل وان شوونواران كری. عه‌ره‌با ئه‌كه‌دی و ئاشووری گه‌له‌ك یێن بلند كرین و ئاڤه‌دانیێن دی مینا (میتانی و هۆری و میدی و ساسانی) یێن پشتگۆهڤه هاڤێتین و ل به‌ر چاڤێن خه‌لكی ره‌شكرین، كورت و كرمانج: ئه‌و هه‌ڤڕكیا نوكه د عیراقێ دا هه‌ی، ل سه‌ر شوونوار و كه‌ڤناتیا ئه‌رد وێ دڤه‌ژه‌نن، ژ به‌ر ڤێ چه‌ندێ ئه‌ڤ شوونواره تنێ ئالاڤه‌كه بۆ خۆمه‌زنكرنێ، هه‌كه نه‌مان ژی بۆ وی خه‌لكی قه‌ت خه‌م نینه، به‌لێ ئه‌وێن خوه ب خودانێ وان شوونواران ددانن، جوان د هه‌لشكێڤن، دپارێزن، ل سه‌ر وێرانبوونا پارچه‌كا وان شوونوارا رۆندكان د بارینن.
