نشتەرگەریێن جوانکاریێ ڕۆلێ ئەکتەری دکوژن
هەرهین محەمەد
د جیهانا سینەما و درامایێ دا، ناڤچاڤێن ئەکتەری گرنگترین ئامرازێن دەربڕینا هزر و هەستێن وی نە، هەر هێلەک، قورمچکەک، یان بزڤینەکا بچووک ل سەر ئەنیا ئەکتەری، دشێت چیرۆکەکا کویر و ئاڵۆز بێژیت و ڕاستگۆییا هەستێن وەکی ترس، ئێش، کەنی، یان سەرسۆڕمانێ ب شێوازەکێ ڕاستەقینە بگەهینیتە بینەری. بەلێ د ئەڤرۆ کەڤتووبەتا هەڤرکیا نەبڕاوە یا جوانکاریێ دا، بکارئینانا زێدەیا بوتوکس، فیلەر، و نشتەگەریێن جۆراوجۆر بوویە ئەگەرێ وێ چەندێ کو زۆربەیا ئەکتەران سیما و شیانێن خۆ یێن سروشتی یێن نواندنێ ژ دەست بدەن و ل شوێنا وێ ببنە خۆدان ڕوویەکێ ڕەق و بێ گیان.
دەمێ ئەکتەرەک ڕوویێ خوە ب بوتوکس و فیلەران تژیدکەت، ماسولکەیێن ناڤچاڤێن وی شیانا لڤینێ ژ دەست ددەن و بەردەوامییا زندییا ئاوازێن ڕووی نامینیت.
بۆ نموونە، ل دەمێ ئه‌نجامدانا ڕۆڵه‌كێ پر ژ ترس، خەم، یان دلتەنگییا کویر، کو پێدڤی ب هندێ یە ئەنیا ئەکتەری ب قورمچک بکەڤنێ یان برۆێن وی ب شێوازەکێ دیار ب لڤن، بوتوکس ڕێکێ ل ڤێ لڤینا سروشتی دگریت. ب ڤێ چەندێ، ڕوویێ ئەکتەری بێ لڤین دمینیت و بینەر نەشێت باوەریێ ب وێ ئێش و ترسێ بینیت ئاوا کو ئەکتەر بزاڤێ دکەت دەرببڕیت. ڕۆڵێن وی دبنە هەوڵێن دەستکرد، چونکو هەست ل سەر ڕوویی ناسۆزن، بەلکو بتنێ ل پشت ماسکەکێ بێلڤین دهێنە ڤەشارتن. ئەم دشێین بێژین هەست و ئاماژە ژ ڕوویێن ڕەقبووی ناڕژێن.
هونەرێ سینەمایێ پشت ب ڕاستگۆیی و هەستێن کویر بەستێت. نهێنییا سەرکەفتنا ئەکتەرێن مەزن یێن مێژوویێ ئەوە کو دشێن بێ ئاخڤتن و بتنێ ب گۆهوڕینا بچووکترین شێوازێ ناڤچاڤێن خۆ، کارئێکەرییا هەرە کویر ل سەر جەماوەری دروست بکەن. دەمێ ئەکتەرەک وێ ئازادی و سەربەستییا دەربڕینا سروشتی ژ دەست ددەت، نەشێت بەرسڤا پێدڤییا سکریپت و دیمەنێن دژوار بدەت. ڕوویەکێ کێشای یان مەیین ل دەمێ دیمەنەکێ زۆر خەمگین دا، بینەری ژ جیهانا چیرۆکێ دویر دئێخیت، باوەرییا سیناریۆیێ هەڵدوەشێنێت و کارێ ئەکتەری ب تەمامی بێ بهێت دکەت.
زێدەباری ڤێ چەندێ، ئەڤ دیاردا جوانکاریێ بوویە ئەگەرێ هندێ کو جیاوازییا سیمایێ ئەکتەران نەمیلیت. ل شوێنا کو هەر ئەکتەرەک خاوەن ڕوویەکێ تایبەت و تایبەتمەندیا خۆ بیت، ئەڤڕۆ زۆربەیا وان ل بن کاریگەرییا هەمان ڕێکاران شێوەیەکێ وەک هەڤ وەردگرن. ئەڤ یەکە داهێنانا هونەری کەم دکەت و ڕێگە ل دروستبوونا کارەکتەرێن کەرەکتەریستیک و جیاواز دگریت، چونکو ناڤچاڤێن وان ژێدەرێ ناسنامەیا وان یا هونەری بوون.
ل دووماهیێ، ڕاستییەکا نەگۆڕ هەیە کو جوانکاریا ڕاستەقینە یا ئەکتەری د ڕاستگۆیی و شیانێن وی یێن ئینانا هەستان دایە بۆ سەر سکریپتی. قورمچکێن ئەنیا ئەکتەری نەشەشەیی و کێماسی نینن، بەلکو بەشەک بووینە ژ مێژوو، نیشانێن تەمنی، و ئامرازێن سەرەکی یێن کارێ وی. دەمێ ئەکتەر ب هەلبژارتنا خۆ ناڤچاڤێن خۆ دکەتە قورمانییا تەکنیکێن دەستکرد، ژبلی ڕوویێ خۆ، دەست ل ڕۆڵ و داهاتوویێ خۆ یێ هونەری ژی بەردەت، و ب ڤێ چەندێ ئەکتەر ژ مرۆڤەکێ زیندی یێ پڕ هەست دگۆهوڕیت بۆ پەیکەرەکێ بێگیان ل بەر کامێرایێ.
