سەرۆکێ پەرلەمانێ ئیرانێ ب توندی هۆشداریێ ددەتە ئەمریکا
سەرۆکێ پەرلەمانێ ئیرانێ راگەهاند کو وان حەفت خال وەکو چارەسەری پێشکێشی ئەمریکا کرینە دا وەسا ئالۆزیێن هەی ب دووماهی بهێن و دەرتەنگا هورمزێ ژی ب تەمامی بهێتە ڤەکرن، لێ هەتا نها ئەمریکا بەرسڤا ئیرانێ نەدایە و هەتا ئەمریکا وان داخوازیێن ئیرانێ قەبوول نەکەت دەرتەنگا هورمزێ ژ ئالیێ ئیرانێ ڤە ناهێتە ڤەکرن.
محەمەد باقر قالیباف ئەو یەک ژی دیار کر، ترامپ هەر رۆژ تشتەکێ دبێژیت و کەس نزانیت کا دێ ترامپ چ کەت، ئیرانێ سیاسەتەکا خوە یا جودا هەیە و ل گۆر داخویانیێن ترامپی سیاسەتێ ناکەت و گۆت: (هەکە ئەمریکا داخوازیێن ئیرانێ قەبوول بکەت دێ دەرتەنگا هورمزێ هێتە ڤەکرن و پرانیا پرسێن هەی ژی دێ هێنە چارەسەرکرن، لێ هەکە ئەمریکا ئێرشی ئیرانێ بکەت دێ ئیران ب هەموو شیانێن خوە بەرسڤا ئەمریکا دەت و ئیرانێ خوە بۆ هەر ئەگەرەکێ ژی بەرهەڤ کریە).
سەرۆکێ پەرلەمانێ ئیرانێ ئاماژە ب ڤێ یەکێ ژی کر کو گەلەک وەلاتێن جیهانێ داخواز ژ ئیرانێ کرینە کو نەبیتە ئەگەرێ روودانا ئالۆزیێن زێدەتر ل رۆژهەلاتا ناڤین و جیهانێ، لێ دڤێت هەر کەس بزانیت کو ئیران خوە رادەستی ئەمریکا ناکەت و هەکە شەڕ ژی روو بدەت دێ ئیران یا پێدڤی بۆ پاراستنا خوە کەت.
