بۆ دیموکراسیا تورکیایێ دڤێت پرسا کوردی بهێتە چارەسەرکرن
هەڤسەرۆکێ دەم پارتی دیار دکەت راگرتنا شەڕی ل تورکیا رامانا چارەسەرکرنا پرسێن هەی نادەت و ژ بۆ دیموکرسیا ل تورکیا دڤێت پرسا کوردی بهێتە چارەسەرکرن و هەروەسا دڤێت هەبوونا گەلێ کورد ب فەرمی ل تورکیا بهێتە قەبوول کرن.
تونجەر باکرهان هەڤسەرۆکێ دەم پارتی دیار کر، قووناغا نها ژ بۆ چارەسەرکرنا پرسا کوردی دەلیڤەیەک گەلەک گرنگ و دیرۆکی یە، لێ ئەو یەک رامانا هندێ نادەت کو هەموو پرسێن هەی دێ وەسا هێنە چارەسەرکرن، راگرتنا شەڕی بۆ ئاشتیێ و چارەسەرکرنا پرسا کوردی گەلەک باشە، لێ ئەو یەک ب سەرێ خوە تێر ناکەت و دڤێت کارێن دی ژی بهێنە کرن و گۆت: (بەری هەر تشتەکێ دڤێت دستوورێ نها یێ تورکیا بهێتە گوهۆڕین، بەرپرسێن تورکیا هەر رۆژ دبێژن پێدڤیا تورکیا ب دستوورەک نوو و دیموکراتی هەیە، لێ ژ بۆ ڤێ یەکێ ژی هەتا نها چو نەهاتیە کرن، دڤێت هەم ئاکپارتی و هەم ژی پارتێن دی پرۆژێن خوە یێن ژ بۆ دستوورەکێ نوو پێشکێشی پەرلەمانی بکەن، دڤێت ئێدی پەرلەمانێ تورکیا ببیتە ناڤەندا چارەسەرکرنا هەموو پرسێن تورکیا ب تایبەتی ژی پرسا کوردی).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، پرسا دیموکراسیێ ل تورکیا پرسەک مەزنە، هەکە بەرپرسێن تورکیا بخوازن تورکیا ببیتە وەلاتەک دیموکراتی دڤێت بەری هەر تشتەکێ پرسا کوردی چارەسەر بکەن، ژ بۆ چارەسەرکرنا پرسا کوردی ژی نها زەمینەیەکا گونجای دروست بوویە، نها پڕانیا جڤاکێ تورکیا پشتەڤانیێ ل ئاشتیێ دکەن، خەلک ل دژی شەڕی نە، ئەو یەک ژی گەلەک گرنگە و گۆت: (پشتی بابەتێ ژناڤبرنا چەکان تەمام بوو دڤێت بلەز دەست ب قووناغەکا نوو ل تورکیا بهێتە کرن، ئەو یەک چاکسازیێن سیاسی و قانوونی نە دا وەسا ئاستەنگێن ل هەمبەر چارەسەرکرنا پرسا کوردی نەمینن، بێگومان هەکە کارەک وەسا بهێتە کرن دێ تورکیا ژی بیتە وەلاتەک پێشکەفتی و دیموکرات، چونکی مە بەری نها ژی گەلەک جاران گۆتیە ژ بۆ دیموکراسیا تورکیا دڤێت پرسا کوردی بهێتە چارەسەرکرن).
هەڤسەرۆکێ دەم پارتی د بەردەوامیا ئاخڤتنا خوە دا ئاماژە ب ڤێ یەکێ ژی کر کو، هێزێن ئۆپۆزسیۆنێ ل تورکیا هەتا نها نەشیاینە رۆلەک باش و کاریگەر ژ بۆ دیموکراسیا تورکیا بگێرن، هێزێن ئۆپۆزسیۆنێ ب هندەک تشتێن دی ڤە مژوولن، ئەو یەک ژی خزمەتا پێشڤەچوونا تورکیا ناکەت، دڤێت هەموو پارتێن ئۆپۆزسیۆنێ ب رۆلێ خوە رابن و یا پێدڤی بۆ پێشڤەبرنا سیستەمێ سیاسی ل تورکیا بکەن، دڤێت ئێک ژ کارێن سەرەکی یێن هەموو پارتێن ئۆپۆزسیۆنێ ئەو بیت دا پێکڤە کار بکەن دا دیموکراسیا ل تورکیا پێش بکەڤیت و گۆت: (هەکە سیستەمێ نها یێ تورکیا ببیتە سیستەمەک پێشکەفتی و تورکیا ببیتە وەلاتەک دیموکرات وی دەمی دێ هەم پرسا کوردی و هەم ژی گەلەک پرسێن دی هێنە چارەسەرکرن، هەتا تورکیا نەبیتە وەلاتەک دیموکراسێ دێ پڕانیا پرسێن هەی وەکو خوە مینن و ناهێنە چارەسەرکرن).
ناڤهاتی ئاماژە ب ڤێ یەکێ ژی کر کو رۆژهەلاتا ناڤین بەر ب گوهۆڕینێن گەلەک مەزن ڤە دچیت، کوردان ئاشتی و پێکڤەژیان دڤێت و د هەمان دەمی دا دڤێت رێز ل مافێن گەلێ کورد ل هەموو وەلاتان بهێتە گرتن، سەرۆک کۆمارێ تورکیا بەری دو رۆژان بەحسێ قووناغەکا نوو کر ژ بۆ پەیوەندیێن د ناڤبەرا کوردان و تورکان دا، ژ بۆ ڤێ یەکێ گرنگە کورد ژی ل تورکیا وەکو تورکان بگەهنە هەموو مافێن خوە، نابیت تو بەحسێ برایەتیێ بکەی لێ برایەک خوەدان هەموو مافەکێ بیت و برایێ دی چو ماف نەبن، ئەو یەک برایەتی نینە و گۆت: (ئێدی ئەم قەبوول ناکەین وەکو وەلاتیێن پلە دو ل تورکیا بژین، دڤێت هەبوونا مە د دستوورێ نوو یێ تورکیا دا ب فەرمی بهێتە قەبوول کرن و هەروەسا دڤێت هەموو مافێن مە ژی بهێنە گەرەنتیکرن).
سەبارەت ب رەوشا رۆژئاڤایێ کوردستانێ ژی باکرهانی دیار کر، کارەک گەلەک مەزن هاتە کرن دا چو شەڕێن نوو ل سووریێ روو نەدەن، ئەو یەک گەلەک گرنگە، نها دەستهەلاتا شامێ هەبوونا کوردان ب فەرمی قەبوول کریە و دانوستاندن ژی دهێنە کرن دا بابەتێ پەروەردەیا ب زمانێ کوردی و مافێن دی یێن گەلێ کورد ل سووریێ د دستووری دا بهێنە بجهکرن، ئەو یەک ژ بۆ پاشەرۆژا سووریێ ژی گەلەک گرنگە و گۆت: (تورکیا بەردەوام پشتەڤانیێ ل رەوشا سووریێ دکەت، دڤێت هەمان تشت ل تورکیا ژی بهێتە کرن، گرنگە هەبوونا گەلێ کورد د دستوورێ نوو یێ تورکیا دا ب فەرمی بهێتە قەبوول کرن و بابەتێ پەروەردەیا ب زمانێ کوردی و بابەتێن دی ژی د دستوورێ تورکیا دا جه بگرن و وەسا کورد ژی وەکو تورکان ل تورکیا بگەهنە هەموو مافێن خوە).
تونجەر باکرهان د دووماهیا ئاخڤتنا خوە دا ئاماژە ب ڤێ یەکێ ژی کر کو هەکە رێز ل گەلێ کورد بهێتە گرتن کورد هەردەم فاکتەرێ ئارامیێ و ئاشتیێ بووینە و چو دەمەکێ کورد نەبووینە مەترسی ل سەر تورکیا و چو وەلاتەکێ دی، دڤێت هەموو وەلاتێن رۆژهەلاتا ناڤین سیاسەتا خوە ل هەمبەر گەلێ کورد بگوهۆڕن و ئەو یەک د بەرژەوەندیا هەموو ئالیەکێ دایە.
