هژمارەكا گۆڕێن ب كـۆم د بەرهەڤن و هژمارەكا دی ژی هاتینە دیتن

هەولێر، قائید میرۆ:

بەرپرسەكێ وەزارەتا شەهید و ئەنفالكریان ئاشكراكر، د دەمێ نوكە دا 25 گۆڕێن ب كۆم یێن سەردەمێ ئەنفالێ و جینۆسایدا كوردێن ئێزدی د بەرهەڤن بۆ هەلدانەڤێ و دبێژیت: هژمارەك گۆڕێن دی ژی هاتینە دیتن.
ئارام نووری، ڕێڤەبەرێ گۆڕێن ب كۆم بۆ رۆژناما ئەڤرۆ دیاركر، هژمارەكا زۆرا گۆڕێن ب كۆم یێن كوردان ل دەڤەرێن جودایێن ئیراقێ هەنە و گۆت: «هەر ژ سالا 2004ێ وەكی وەزارەتا شەهید و ئەنفالكریان پشكداربووین ل هەلدان و ڤەگەڕاندنا روفاتێن د ناڤا گۆڕێن ب كۆم دا، هەتا سالا 2019 ێ پەیوەندیێن مە ل گەل حوكمەتا ئیراقێ زۆر دباشبوون ل دۆر بابەتێ گۆڕێن ب كۆم و هژمارەكا زۆرا گۆڕێن ب كۆم هاتینە هەلدان، نێزیكی 25 گۆڕێن ب كۆم یێن سەردەمێ ئەنفالێ هاتینە هەلدان و رۆفاتێن وان هاتینە ڤەگوهاستن بۆ هەرێما كوردستانێ، پشكا شێری یا ئەڤان رۆفاتان یێن سنۆرێ سلێمانیێ بوون و ئەنفالێن بارزانی و بەهدینان ژی تێدابووینە».
ئارام نووری گۆت ژی: «شەش گۆڕێن دی یێن سەردەمێ ئەنفالێ د بەرهەڤن بۆ هەلدانەڤێ و هژمارەك گۆڕێن كوردێن ئێزدی ژی هەنە یێن سەردەمێ شەڕێ داعشێ‌، نێزیكی هەژدە گۆڕێن ب كۆم ب تنێ ل دەڤەرا شنگالێ هەنە، دشێم بێژم زێدەتری 25 گۆڕێن ب كۆم نوكە د بەرهەڤن بۆ كاركرنێ و ئەم پێشبینی دكەین هژمارەكا دی یا گۆڕێن ب كۆم مابن و هەتا نوكە نەهاتبنە دیتن، چونكی زانیاری ل دۆر هەبوونا هژمارەكا گۆڕێن دی هەنە».

کۆمێنتا تە