بۆچی هندەک هەشت سەعەتان دنڤن و سپێدەیێ هەر خەوا وان دهێت؟
هەتا دەمێ مرۆڤ پێدڤیا خۆ ژ نڤستنێ وەردگریت کو هەشت سعەتن، گەلەک کەس ب هەستکرن ب تەمبەڵی و بێخیرەتی رادبن، ئەڤە ژی ئاماژەیە کو جۆرێ نڤستنێ گەلەک گرنگترە ژ رێژا نڤستنێ.
دکتۆر وێندی تروکسێل، بسپۆرا دەروونی، د داخۆیانیەکا تایبەت دا بۆ مالپەڕێ “فۆکس نیوز” جەخت ل سەر وێ چەندێ کر کو “گەلەک خەلک حەفت بۆ هەشت سعەتان دنڤن، بەلێ بێی کو هەست ب چالاکیێ بکەن ژ خەو رادبن، و هندەک سالان ژی ب دەست نڤستنەکا نەئارام دنالن.”
تروکسێل ئاماژە ب وێ چەندێ کریە کو چەند ئەگەرەک هەنە جۆرێ نڤستنێ کێم دکەن، بێی کو بەرێخودانا ژمارا سعەتان بهێتە کرن، ژ وانژی:
– ڤەخوارنێن کحوولی: کو ئەگەرەکێ سەرەکی یێ تێکچوونا نڤستنێ یە.
– ڤەخوارنا کافاینێ: وەک چا و قەهوێ، ب تایبەت ب شەڤێ.
– فشار و دلتەنگی: سەبارەت ب کاروبارێن ژیانا ڕۆژانە.
– بکارئینانا مۆبایلێ: یان ئامیرێن ئەلیکترۆنی بەری نڤستنێ.
بۆ ئەو کەسێن کێمتر ژ دەمژمێرێن پێشنیارکری دنڤن، تروکسێل شیرەتا دکەت کو پێنگاڤێن پلەبەندی بگرنە بەر، وەک زێدەکرنا دەمێ نڤستنێ ب نێزیکی ١٥ دەقیقا د هەر شەڤەکێ دا، داکو تێبینی و کاریگەریا وێ ل سەر لەشی و ڕێکخستنا دەمژمێرا بایۆلۆژی بکەن.
هەروەسا ئاماژە ب وێ کریە کو نڤستنا باش یا گرێدایە ب شێوازەکێ ژیانێ یێ ساخلەم کو ئەڤان خالان ب خۆ ڤە دگریت:
* سیستەمەکێ خوارنێ یێ هەڤسەنگ: دویرکەفتن ژ خوارنێن گران بەری نڤستنێ.
* وەرزشکرنا بەردەوام: ب مەرجەکێ دویر بیت ژ چالاکیێن جەستەیی یێن ب زەحمەت درست بەری نڤستنێ.
تروکسێل دبێژیت: “نڤستن پرۆسەیەکا بایۆلۆژی یە و نابیت تەنێ ب پێشبینیێن کەلتووری یان جڤاکی ڤە بهێتە گرێدان، ڕێزگرتن ل پێدڤیێن سروشتی یێن جەستەی کلیلا نڤستنەکا کویر و ئارامە.”
