شەقەسەر چ ئاریشەیان دروست دکەت و چاوا دهێتە کۆنترۆلکرن؟
د. ئەحمەد مستەفا محەمەد، تایبەتمەندێ نەخۆشیێن کۆما دەماران دیار کر کو شەقیقە تنێ سەرئێشانەکا ئاسایی نینە، بەلکو تێکچوونەکا دەماری یا بەربەلاڤە کو دبیتە ئەگەرێ دوبارەبوونا نۆبەیێن سەرئێشانا ناڤنجی هەتا یێن دژوار، و کاریگەرییەکا مەزن ل سەر کوالیتیا ژیانا ڕۆژانە یا نەخۆشان دروست دکەت.
نیشانێن ڤێ نەخۆشیێ د جۆراوجۆرن، لێ د. ئەحمەد دیار دکەت کو یا ژ هەمیا بەربەلاڤتر ئەوە کو سەرئێشانەکا ب ژان ل ئێک ژ لایێن سەری پەیدادبیت. ل گەل وێ چەندێ، نەخۆش تووشی عێلنجی یان دلرابوونێ دبن، و هەسدارییەکا زێدە بۆ ڕۆناهی، دەنگ و بێهنێن دژوار پەیدادبیت. و گۆتژی: هندەک جاران ژی، بەری دەستپێکرنا سەرئێشێ، نیشانێن سەیر وەکی دیتنا تیشکێن بریقەدار یان هێلێن تێکچووی، و هەتا تێکچوونا دەمکی یا ئاخفتنێ دگەلدانە.
د. ئەحمەد مستەفا ددەتە زانین کو کۆمەکا هاندەران هەنە ڕێکێ خۆش دکەن بۆ هاتنا نۆبەیان، ژ وانژی کێمی و نەرێکخستنا خەوێ ، بێزاربوون و سترێسا دەروونی یا بەردەوام، هشکبوونا لەشی و کێمیا ئاڤێ، نەرێخستنا ژەمێن خارنێ و ڕۆژی گرتن، هەروەسا خارنێن دیارکری و گۆڕانکاریێن هۆرمۆنی.
هەروەسا دیارکر کو تشتێ دلخۆشکەر ئەوە کو دشیاندایە شەقیقە بهێتە چارەسەرکرن و کۆنترۆلکرن. چارەسەری پشتبەستنێ ل سەر دوبارەبوونا نۆبەیان، دژواریا وان و کاریگەریا وان ل سەر ژیانا ڕۆژانە دکەت.
بۆ خۆپاراستنێ ژی، د. ئەحمەد مستەفا ئامۆژگاریێ دکەت کو ئهڤ ڕێنمایە بهێنە بەرچاڤکرن، ژ وان ژی ڤەخوارنا ڕێژەیا پێدڤی یا ئاڤێ ب دروستی، رێکخستنا دەمژمێرێن خەوێ و خوارنێ ل دەمێن خۆ، ئەنجامدانا وەرزشێ ب ڕێکوپێکی، خۆپاراستن ژ زێدەڤەخوارنا کافایینێ، و تۆمارکرنا هاندەران و نۆبەیان د دەفتەرەکا تایبەت یا سەرئێشێ دا بۆ نیاسینا خالێن ڤەدەر.
دگەل کو پتریا نۆبەیان ب بێهنڤەدانێ و چارەسەریێن دەمکی دکەن، لێ حالەت هەنە کو پێدڤی ب پێنگاڤێن لەز هەنە. د. احمەد جەختێ ل سەر وێ چەندێ دکەت کو ئەگەر سەرئێشان ژ نشکەکێڤە و گەلەک یا دژوار بیت، یان ل گەل لاوازییەکا نوی یان سڕبوونێ، تێکچوونا ئاخفتنێ، ژدەستدانا هۆشێ و ڕەقبوونا ملی، یان گۆڕانکارییەکا دیار د شێوازێ سەرئێشێ ڕا هاتبیت، دڤێت راستەوخۆ هاریکاریا نۆشداری بهێته خواستن.
