گـوهۆڕینێن ل سـووریـێ د بەرژەوەنـدییا کـوردان دانـە
سیاسەتمەدارەکا کورد ل سووریێ دیار دکەت رەوشا سووریێ وەکو بەری نها نەمایە و گوهۆڕینێن گەلەک مەزن ل سووریێ روو داینە، هەبوونا کوردان هاتیە قەبوول کرن و ل دەڤەرێن کوردی پەروەردە دێ ب زمانێ کوردی بیت، لێ هندەک ئاریشە ژی هەنە.
ئیلهام ئەحمەد سیاسەتمەدارا کورد یا خەلکا رۆژئاڤایێ کوردستانێ دیار کر، ئینتیگراسیۆنا هێزێن سووریا دیموکرات ل گەل حوکمەتا سووریێ ب رەنگەکێ باش بەردەوام دکەت و کار گەهشتیە قووناغا دووماهیێ و گوهۆڕینێن گەلەک باش ژی ل سووریێ روو داینە کو هەموو د بەرژەوەندیا کوردان دانە و گۆت: (نها هەبوونا کوردان ل سووریێ هاتیە قەبوول کرن، هەروەسا سەبارەت ب مافێن کەلتوری یێن کوردان ژی ل سووریێ گەلەک تشتێن باش روو داینە و ڤێ دووماهیێ کارێن گەلەک باش ژی هاتینە کرن دا کو پەروەردە ل هەموو رۆژئاڤایێ کوردستانێ ب زمانێ کوردی بیت، وەکو بریار تشتێن باشن لێ هەتا نها ب کریاری هندەک تشت نەهاتینە کرن و نها بزاڤ دهێنە کرن کو د بیاڤێ پەروەردێ دا ئەو ئاریشەیێن کو هەنە ب تەمامی بهێنە چارەسەرکرن).
ئیلهام ئەحمەد ئەو یەک ژی دیار کر، نیاسینا مافێن گەلێ کورد ل سووریێ تشتەک گەلەک مەزنە، نها هەبوونا کوردان ل سووریێ هاتیە قەبوول کرن و کارێن گەلەک باش ژی هاتینە کرن، لێ هێشتا ژی دڤێت کار بهێتە کرن دا کورد بگەهنە هەموو مافێن خوە یێن سیاسی و نەتەوەیی و بێگومان ئەو یەک دێ ب رێیا سیاسەتێ هێتە کرن و کورد ل سووریێ نها بهێزن و کەس نەشێت ئێدی کوردان ئینکار بکەت و گۆت: (بێی پشکداریا کوردان چو بەرنامە ل سووریێ سەر ناگرن، کورد دێ بنە شریک ل سووریێ و دێ گەهنە هەموو مافێن خوە، بریارێن کو بەری نها ژ ئالیێ سەرۆک کۆمارێ سووریێ ڤە سەبارەت ب کوردان هاتینە دان گەلەک باشن، لێ هێشتا ب کریاری گەلەک تشت نەهاتینە کرن و ئالۆزی هەنە و کار دهێنە کرن دا ئەو یەک ژی ب تەمامی بهێتە چارەسەرکرن).
سەبارەت ب روودانێن ڤێ دووماهیێ ل باژێرێ حەسەکێ یێ رۆژئاڤایێ کوردستانێ ژی ناڤهاتیێ دیار کر، هندەک کەس و گرۆپێن توندرەو ل سووریێ هەنە کو هێشتا ژی ناخوازن کورد بگەهنە مافێن خوە، وان دڤێت ئالۆزیان دروست بکەن دا وەسا رەوشا ئارام یا وان دەڤەران تێک بدەن، لێ هەر زوو دەستێوەردان هاتە کرن و هێزێن سیاسی ل سووریێ ژی ناخوازن ئالۆزیێن وەسا روو بدەن، چونکی ئەو یەک د بەرژەوەندیا چو ئالیەکێ دا نینە، ئارامیا ل سووریێ د بەرژەوەندیا هەموو خەلکێ سووریێ دایە و پێدڤیا سووریێ ب ئارامیێ و پێکڤەژیانێ هەیە و هەر ئالۆزیەکا نوو دێ زیانا خوە بۆ هەموو نەتەوە و پێکهاتەیێن ل سووریێ هەبیت.
ئیلهام ئەحمەد دووماهیا ئاخڤتنا خوە دا ئاماژە ب ڤێ یەکێ ژی کر کو، هندەک هێزێن دەرەکی ژی ناخوازن رەوشا سووریێ ئارام بیت و بزاڤا ڤێ یەکێ دکەن ب رێیا هندەک گرۆپێن توندرەو ئالۆزیان دروست بکەن، بەری نها ژی ل رەققە و هندەک دەڤەرێن دی هەمان بزاڤ هاتنە کرن، لێ وی دەمی هێزێن سووریا دیموکرات هەر زوو دەستێوەردان کرن و نەهێلان رەوش ئالۆزتر لێ بهێت، نها رەوشا حەسەکێ ئارامە و خەلک ژی باش دزانن هەکە رەوش ئالۆز بیت دێ کاریگەریا خوە یا خراب ل سەر رەوشا ژیانا وان کەت، هەموو پێکهاتەیێن ل حەسەکێ دخوازن د ناڤ ئاشتیێ و ئارامیێ دا بژین و کارێن باش ژی بۆ ڤێ یەکێ دهێنە کرن.
