رێ نادەین بهایێ كەلوپەلان بهێتە گرانكرن
دهۆك، لەزگین جۆقی:
ژ ئەگەرێ گورانكاریێ د بهایێ دۆلاری دا، دەست ب دووڤچوونەكا توند د ناڤ بازاڕی دا هاتیە كرن بۆ نەهێلانا گرانبوونا بهایان و دبێژیت: هەر كەسەكێ ڤێ رەوشێ ب دەلیڤە ببینیت و بهایێ كەلوپەلان گران بكەت دێ هێتە سزادان.
شوكری شەفیق، پەیڤدارێ رێڤەبەریا چاڤدێریا بازرگانی ل دهۆكێ بۆ ئەڤرۆ گۆت: «ئەم رێ نادەین، بازرگان بهایێ كەلوپەلان گران بكەن، چونكی ئەو كەلوپەلێن نوكە د ناڤ بازاڕی دا هەین، دەمێ دۆلار ب 132 هزار دیناران هاتینە كڕین، لەو ئەم رێكێ نادەینێ بهایان گران بكەن».
گۆت ژی: «هەر بازرگان و كەسەكێ بهایان گران بكەت، پیرابوون د گەل دا دێ هێنە وەرگرتن، ئەم بزاڤان دكەین، بۆ رۆژێن بهێن؛ ژ ئەگەرێ گورانكاریێ د بهایێ دۆلاری دا بهایێ كەلوپەلان دەستنیشان بكەین و رێ نادەین بهایێ پێدڤیێن خوارنێ گران بیت، مە 9 لیژنە هەنە بەردەوام چاڤدێریا بازاڕی دكەن، بلا وەلاتی خۆ نەترسینن، ژ بەركو هەتا نوكە بهایێ كەلوپەلان یێ جێگیرە».
