تەكتیكا سلێمانی و سەركەفتنا دهۆكێ
ئیحسان حەسەن
د جیهانا فوتبۆلێ دا تێگەهشتن و هەلسەنگاندنا هەر ڕاهێنەرەكی هەردەم لسەر بنەمایێن دیتنا تەكتیكی، ئامار و پلان و شرۆڤەیێن دروست دهێنە دانان، بێگومان شێوازێن راهێنەران و بزاڤێن وان بۆ بدەستڤە ئینانا سەركەڤتنێ ژێك جودانە، هندەك راهێنەران دڤێن هەر لدەستپێكێ كونترۆلا یاریگەهێ و تەپێ بكەن، هێدی هێدی بچنە پێش تا دگەهنە گۆلێ و ب سرۆشتی ئەنجامێ یاریێ ب گوهۆرن، هندەكێن دی ژی شێوازێ گڤاشتنا بلند دهەلبژێرێن داكو زوو گۆلەكێ تۆماربكەن و هێزا تیما هەڤرك بشكێنن، لێ راستی ئەوە كو هیچ شێوازەك ب تنێ ب سەرناگەڤن ئەگەر یاریزانێن خودان شیان پشتەڤانییێ لێ نەكەن، ژبەر كو ئاریشەیا مەزنا گەلەك یانەیێن مە ئەوە كو ب لەز و بێ پلان دەستەكێن خوە یێن راهێنانێ دهەلبژێرن، بێ كو هیچ بنەمایەكێ جێگیر بۆ پاشەرۆژێ ئا ڤا بكەن، لێ وەرچەرخانا ڤێ داویێ یا یانەیا دهۆك د خولا ستێرێن ئیراقێ دا نموونەیەكا سەركەفتی پێشكێشكر، دەمێ د ئێكەمین تاقیكرنا خوە دا لژێر سەرپەرشتییا راهێنەرێ خوە یێ خۆمالی سلێمان رەمەزان بەرامبەر یانەیا كەربەلا دگەرا یازدێ دا، شیاین مەزنترین سەركەڤتناخوە یا ڤی وەرزی ب پێنچ گۆلان تۆماربكەن، ل ڤێرێ پلانا راهێنەرێ و خواندنا وی یا ژێرانە و دروست بۆ یاریێ رۆلەكێ سەرەكی دگوهۆرینا رەوشا تیمێ دناڤا یاریگەهێ دا هەبوو، پشتی كلیلێن یاریێ یێن تیما بەرامبەر كونترۆلكرین، جهێن ڤالا دناڤا یاریگەهێ دا دیتین، ژبلی دابەشكرنا دروست یا ئەركان لسەر یاریزانان خوە شیای سیناریۆیا یاریێ ب تمامی بێخیتە لبن دەستهەلاتا خوە و ئەنجامێ یاریێ دبەرژوەندیا خوەدا ئێكلابكەت، بەلێ ئەڤە رامانا وێ چەندێ نادەت یان ژی نابیتە پیڤەرەكێ مەزن و بنەرەتی كو ئێدی دهۆك هاتە لسەر رێرەوەكا دروست و چ كێماسی دناڤا تیمێ دا نینن، ئەگەر ئەم بزانین كو تیمێن باشتر د ناڤا خولێ دا هەنە، ئەركێ تیمێ ب تایبەت دیاریێن ل دەرڤەی یاریگەها خوە دێ بزحمەتربیت، زێدەباری هێشتا بەردەوامییا تۆماركرنا گۆلان ژلایێ تیمێن بەرامبەر ڤە، ئەگەر ئەم بەحسێ دوو گۆلێن یاریا دووماهییێ بكەین، ئاماژەكا روونە كو هێشتا كێماسی و ڤالاهی دهێلا بەرگیریێ دا هەنە و دڤێت بهێنە چارەسەركرن، ئەوا من ڤێت بێژم، فوتبۆلێ هووسا نیشا مە دایە كو سەركەڤتنێن بەردەوام تنێ ب هێرشبرنێ ناهێنە پاراستن، بەلكو ب هەڤسەنگییێ د ناڤبەرا هێلا هێرشبرنێ و بەرگیریێ دا دهێنە پاراستن، ژبەر هندێ و سەرباری كو پلانا راهێنەری و خواندنا وی بۆ یاریێ یا سەركەفتی بوو، لێ پێدڤییە بۆ یاریێن داهاتی كار لسەر ڕاستڤەكرنا خرابی و شاشیێن بەرگیریێ بكەت، داكو ئەڤ سەركەفتنە نەبیتە خوشییەكا دەمكی، بەلكو ببیتە دەستپێكا سیستەمەكێ جێگیر بۆ هەڤركییێ دگەل یانەیێن بهێزن خولێ دا، دیسان ئاسۆیا ڤێ یاریێ سەلماند كو زانینا ژینگەها نافخۆیی گەلەك جاران زووتر و كاراتر ئارمانجان بدەستڤە دئینیت، نەك ب ئینانا ناڤێن بێ مفا یێن دەرڤە، ژبەر هندێ دڤێت ئەنجامێ ڤێ یاریێ بهێتە ژبیركرن، كارەكێ باشتر لسەر كێماسیێن دەستنیشانكری بهێتەكرن، ئەڤە ژی ناهێتە دیاركرن ئەگەر كارگێریا یانەیێ، یاریزان و جەماوەرێ دلسۆزێ تیمێ پشتەڤان نە بن.
