دانیكێن بامەڕنێ و (سەدیق شەرۆ) و كۆمێنتا برادەرەكی
عەبدولرەحمان بامەرنی
ئێك ژ وان كومێنتێن ئەز راكێشایمە ڤێ نڤیسینێ، ھەڤالەكێ من یێ فەیسبۆكێ بوو؛ دەما من د ئەكاونتێ خوە یێ فەیسبۆكێ دا ریكلام بۆ فێستیڤالا دانیكان ل بامەرنێ كری، وی ھەڤالێ كۆمێنتەك ب ڤی رەنگی نڤیسی: «سەیدا، فێستیڤالا دانیکا… دانیکا!. نە ڤێستیڤالێن داهینانێن مۆدرێن و پێشەسازی و رۆبۆت و درۆن و ئامیرەیێن کارەبێ. جیهان گەهشت کیڤە و ئەم ل کیڤە!».
راستی ژی بیت باھرەكا مەزن د گەل ڤی ھەڤالی ھەیە و ئەڤە ژ دلپێڤەبوونا وی یە، بۆچی ئەم تشتەكی ناكەین كوردستان پێ پێشبكەڤیت و رەنگە ئەڤە خەونا مە ھەمیان بیت؛ لێ ئەز دێ ڤەگێرانا سەیدایێ خوە یێ وەغەركری (سەدیق شەرۆ)ی ئینم، وی ھۆسا بەحسا گۆڤەند و سەیران و ھەلكەفتان دكر، دگۆت رەنگە رۆژانە ئەم خەمان دخۆین یێن سەر كاری و رێكێ و خێزانێ و بارێ ئابووری و سیاسی و جڤاكی و ئەڤێن ھەنێ وەكی كولكەكا تژی عەداڤ لێدھێن و ئەڤە دبنە رێگر، كو ئەم نەشێین ھیچ تشتەكی دروست بكەین و دگۆت، دا ئەم بشێین دروست بیر بكەین، دروست كار بكەین و دروست داھێنانێ د پیشەیێ خوەدا بكەین؟ دڤێت مێشكێ مە یێ ئارام بیت و سەیدایێ سەدیق شەرۆ گۆت، ئـھا ل گەل داوەتەكێ، سەیرانەكێ، گەریانەكێ مرۆڤ ڤێ كولكا تژی عەداڤ دەردكەت و ھەكو ب زمانێ تەكنۆلۆژیایێ دبێژن، مرۆڤ خوە (ریفرێش) دكەت.
دیسا جارەكێ من ل جھەكێ خواندبوو، بێی بیرا من ل ژێدەری بھێت، بەحسا شەڕێ جیھانی دكر و دەما یابان ژ بەرەیێ شكەستی، ئابوورێ یابانێ ھلوەریا، لێ ئەوان چ كر، پارە قەركرن و چھێن دەمبۆراندنێ ڤەكرن، پاركە ڤەكرن، ئازادی بەرتەنگ نەكرن و دگەلدا كەرتێ پەروەردێ خورتكر، پویتەدانەكا زێدە ب پەروەردێ و فێركرنێ دا، ئەنجام، مێشكێ سافی و چ فشار ل سەر نە، بەرنامەیەكێ خواندنێ یێ پلانكری، یابان بۆ یابانا ئەڤرۆ و ئھا بەشەكێ گرنگێ ڤان جۆرە فێستیڤالان ئەڤەیە؛ ئەگەر ئم ھەڤبەركرنەكێ ل گەل ئەڤا من د گۆتارا خوەدا نڤیسی و بەروڤاژیكەینە سەر رەوشا خەلكی: (قەیرانێن سیاسی و یێن ئابووری و گرانبوون و نزمبوونا دۆلاری و زێڕی، گرانبوونا پانزینێ و ھێشتا چ بەحسێ بەلاڤكرنا گازا سپی نە وووو ھێشتا)، ئەرێ ئەڤێن ھەنێ چەند كاریگەریێ ل مێشكێ تاكی دكەن كو نەشێت دروست مێشكێ خوە بدەتە كاری، رەنگە ھەبن بێژن دانیك ل كیڤە و ئەڤ قەیرانێن ھەنێ ل كیڤە؟! لێ گرێدانەكا مەزن پێكڤە ھەیە، دەركەفتنەك دشێت مێشكێ مرۆڤی ئارام بكەت و بەرھەڤ بكەت كو بشێت كارێ خوە یێ رۆژانە دروست ئەنجامبدەت و ھەمی بابەت ژی ب رەنگەكی و دووین پێكڤە گرێدایینە.
راستە ئەم یێن د چەرخێ پێشكەفتنێ و تەكنۆلوژیایێ دا، لێ دڤێت ژبیرنەكەین، پرێڤەچوونا مە ل گەل ڤی چەرخی برێڤەبوونا كیسەلەیە و ئێكەم جار دڤێت ئەم خوە بەرھەڤ بكەین و دا مە شیانێن داھێنانێ ھەبن، ئەز ناچمە سەر مفایێن دی یێن ڤان جۆرە فێستیڤالان ژ بەربازاركرنا بەرھەمێن خۆمالی و رێكەكن كو بەرێ خەلكی بزڤریتە گوندان و گرنگیێ ب چاندنێ بدەت و رەز و باغێن خوە ئاڤەدان بكەن.
