چوار وێنه… ب دیتنه‌کا D4
نجیب باڵایی
ل ڤی چیایی، ل ڤێ ده‌شتێ
د ناڤ ڤێ دارستانێ دا،
ل سه‌ر ڤێ ئاخێ
خه‌زاله‌کا که‌تی چه‌رێ
ل هه‌ر چار کناران، گورگان چاڤێن به‌رداینێ
خه‌زالێ…های ژخوە هه‌به،
ئه‌گه‌ر سه‌رێ خوه بلند نه‌که‌ی،
ژ چه‌را حه‌مه‌ربوونێ به‌س نه‌که‌ی
قوربانیا ب فراڤینێ نه‌ده‌ی
دێ بییه شیڤا گورگان.
**
ل ڤی چیای، ل ڤێ ده‌شتێ
ل ڤێ گه‌شتێ
که‌عێله‌کا که‌فتییه سه‌ر ڕێ
پاشه‌زینکا وێ هه‌می زێڕه، وه‌غه‌را وێ ته‌ڤدا خێره
ڤاڕێ بوویه
سوارۆ… ئه‌گه‌ر ڤێڕا نه‌گه‌هی
هه‌ڤسارێ وێ باش نه‌گری
نه‌ده‌یه سه‌ر ڕیا راست
جه‌رده‌ڤان ل سه‌رێ هه‌ر دوڕیانه‌کێ، ل به‌ندێ نه
دێ ته په‌یاکه‌ن و ئێسیر گرن
که‌زیێن کەعێلێ بڕن، بارێ وێ ب تالان گرن.
**
ل ڤی گوندی، ل ڤی باژێڕی
ل ڤێ زۆزانێ، ل سه‌ر ڤێ ئاخێ
زه‌ریه‌کا به‌ژن بلند، ناڤته‌نگ زراڤ
گه‌رده‌ن کێل
پرچێ وێ بۆش وه‌کی رویباره‌کی
خوه به‌ر‌دده‌ت خوارێ، پێل..ب پێل
یا خوه کێشایه گه‌ڕا دیلانێ،
ژ توخمێ فریشته‌یان، ژ نفشێ له‌یلا و زیلانێ
ل هه‌ر ئالی داڤدۆزان چاڤێن به‌رداینێ!
زه‌ریێ…ته های ژخوه هه‌بیت
ل رێزا گۆڤه‌ندێ ده‌ستێ خو نه‌ده ده‌ستێن هەر کەسی
دخوازن ته فهێت که‌ن، گۆڤه‌ندا ته بکه‌ن تازی
ئه‌گه‌ر ده‌ستێن وان نه‌گه‌هن ته
ب ئه‌زمانی دێ ناڤێ ته پیس که‌ن
.و ب چاڤان دێ ته رویس که‌ن
**
دڤێ مالێ دا، د ڤێ لاندک و ده‌رگۆشی دا
زارۆکه‌کێ رادبیته وه‌ستیکان
دایبابینۆ… که‌سوکارینۆ..
چاڤدێر بن، هەڕن جه‌م زانایه‌کی دوازده علم
بازبه‌نده‌کێ بۆ چێکه‌ن، ناڤه‌کێ ژ هه‌ژی لێکه‌ن
موهرکه‌کا شین، بناڤ چاڤان ڤه‌که‌ن
بلا بێ سه‌خبێری نه‌مینیتن
ئه‌گه‌ر دێ ب ده‌ردێ چاڤان چیتن
بلا وه‌کی هه‌رجار نەمینیت زارۆکه‌کێ کال
دا نه‌مینیت لال
دا نه‌مینیت بێ هه‌ڤال…
خه‌زال، که‌عێل، زه‌ری و زارۆ
چار چیڕۆکن، چار سه‌رپێهاتی و دیرۆکن
چار دیوارێن مالێ نه
ئه‌گه‌ر ڤێ جارێ ژی هه‌ر یه‌ک ژوان
گو‌ه نه‌ده‌ت په‌یاما راستیێ
کارغه‌زال دێ سێوی مینن
بارێن گران دێ ل عه‌ردی مینن
پیس دێ زه‌ریان ڕه‌ڤینن
زارۆ ژی دێ د گریێ خوه‌دا ژبیرڤه‌چن
دێ د که‌له‌گرییه‌کا ئه‌به‌دی دا مینن
نه چیا دمینن، نه رێکێن ب ئه‌وله
نه ده‌شت و نه‌ژی ئاخ، ئه‌م تۆڤێ ژیانی لی بچینن
ئەم تۆڤێ ڤیانێ لی بچینن.
پراگ ٢٠١٢
