خەمخۆری دكاری دا
رەمەزان ئیسماعیل گەرەگوهی
تشتەكێ ئاشكرایە كو كاركرن بناغەیێ ئاڤاكرن و پێشكەفتنا شارستانیێ و خۆشگۆزەرانی و ژین و ژیارا مرۆڤی یە و كەسەك نەشێت بێی كاركرن ب سەرفەرازی و سەربلندی بژیت، لێ ئەنجامدان و كرنا هەر كارەكی هەبیت، داكو مرۆڤ د وی كاری دا سەركەفتی بیت، یێ پێدڤی خەمخۆری و ب ڕێكو پێكی ئەنجامدانا وی كارییە، جۆرەكێ مرۆڤان یێ هەی، دەمێ دهەر بیاڤەكێ ژیانێ دا و ب هەر ئەگەرەكێ هەبیت، كارەكی دكەن دێ بینی گەلەك ب بێسەروبەر و پڕی كێم و كاسی و بێی گەلەك گرنگی پێدان كەن، هەتا وێ ڕادەی كو كەیفا خودانێ وی یان كەسانێن دی هند ب كارێ وان نەهێت، بو نموونە: مینا جۆتیارەكی ل دەمێ كێلانا زەڤیێ یان كولانا ڕەز و بیستانان و كەزاخە و ڤەوژارتن و دورین و ئادەكرن و گێرەكرن و…هتد.
یان ژی دەمێ فەرمانبەرەك ل فەرمانگەهەكێ كاربكەت، دێ بینی تۆمارێن وی نەهند دڕێك و پێك و پاراستینە و وەسا نە هاتینە ڕێكخستن دەمێ هەر كەسێ پشتی وی ببینیت، وەسا دێ تێگەهیت كو ئەڤ كارە گەلەك بێ هزركرن و ب بێ خەمخۆری و نە ژدل هاتیەكرن و هەتا كو بهێتە گۆتن، ئەڤە چ كارەكێ ژ خۆ ڤەكریە و نە ژ دل هاتیەكرن و دێ ڤێ گۆتنا مەزنا دوبارە كەت و دێ بێژیت: (كارێ نە ژ دل وەكی دینێ بێ ئاقل) بەلێ جۆرێ دویێ یێ مرۆڤان بەرۆڤاژی یێن ئێكێ نە دەمێ كارەكی دكەن دێ گەلەك ب جوانی و پاقژ و بژینی و ڕێكوپێكی و هەر تشتەك ل جه و دەمێن دورست و پێدڤی و ب ئاوایەكێ باش و گونجای كەن، كو هەر كەسێ پشتی هینگێ ببینیت دەستخۆشیێ لێ بكەت و گەلەك كەیفا وی پێ بهێت و پەسنا كارێ وی بكەت و دێ وەسا هزركەت كو ئەڤ كارە یێ ب هشیاری و خەمخۆری و دلسۆزی و ل سەرخۆ و ب پلان و بەرنامە یێ ئەنجام دای و خەما وی یا هەرە مەزن و ئارمانجا وی یا گرنگ و ئێكانە بەری هەر تشتەكی ئەو بوویە كو ئەو كارێ خۆ ب سەركەفتییانە و ب باشی بكەت، لەورا گەلەك یا فەر و پێدڤیە دەمێ هەر كارەكێ مرۆڤ پێ ڕابیت و ئەنجام بدەت، ب خەمخۆری و ژدل و ب ئاوایەكی جوان و ڕێكوپێكی و بێ كێماسی و هێلانا ب نیڤەر و ب بنەجهی بكەت و ب داوی بینیت.
