نەتەنیاهۆ ل بەرانبەر کورسییا دەستهەلاتێ و زیندانێ
رەمزی سیسۆ
هەلبژارتنێن ئیسرائیلێ ئەڤ جارە هەلبژارتنەکا هەستیار بوو. هەرچەندە من ژ پێش هەلبژارتنان ئاماژە ب سەرکەفتنا بنیامین نەتەنیاهۆ کربوو، ل دەف من ئەڤ سەرکەفتنە سەرکەفتنەکا نۆرمال نەبوو.
ئەڤە هەڤڕکیەکا توند بوو ل سەر ناڤخۆیا ئیسرائیلێ و ل سەر ئاستێ دەڤەرێ و جیهانێ ب گشتی. د ڤان هەلبژارتنان دا دۆخێ ئیسرائیلێ ئالۆز ببوو، ژ بەر شەڕێ ئیسرائیلێ ل گەل بزاڤا حەماس و حیزبوللاها لوبنانی و ڤان دووماهیێ شەڕێ ئێرانێ. بارودۆخێ پارتا لیکۆد یا بنیامین نەتەنیاهۆ کەفتە بن مەزنترین تاقیکرنا خۆ دا و چاڤێن دەڤەرێ هەمی ل سەر ئەنجامێ ڤان هەلبژارتنان بوون.
هەڤڕکێ سەرەکی یێ وی گادی ئایزنکۆت بوو، سەرۆکێ پارتا یاشار (Yashar!) مانا وێ ب کوردی راست و دروست، تەمەنێ وی 66 سالە و سەرۆکێ پێشتر یێ سۆپایێ ئیسرائیلێ بوو. راستە هەتا نوکە نەتەنیاهۆو نەگەهشتیە 61 کورسیان و ئەگەر نەگەهیتە ڤێ رێژەیێ شیانێن پێکئینانا حوكمەتێ نامینیت، ئانکو ئەنجام بەر ب بنبەستیێ ڤە چوویە و چاڤ ل دەنگێن لەشکری و سەرۆکێ ئیسرائیلێ یە کێ دێ راسپێریت كو حوكمەتێ پێکبینیت.
ب بۆچوونا من ئەڤ هەلبژارتنە نە بتنێ هەلبژارتنەکا نۆرمال بوو. دڤێت بزانین وەلاتێن سعوودیە و ئیمارات و کوێت پشتەڤان و د گەل پارتا لیکۆد یا نەتەنیاهۆ بوون و ب ماددی و مەعنەوی پالپشتی لێ دکرن، و وەلاتێن تورکیا و فەرەنسا و ئەلمانیا دژی پارتا نەتەنیاهۆ بوون.
سەبارەت ناڤخۆیا ئیسرائیلێ ژی دودلیەکا مەزن هەبوو. وەلاتیێ ئیسرائیلی دزانیت کەسێ بشێت د نوکە دا ئیسرائیلێ رزگار بکەت بتنێ بنیامین نەتەنیاهۆ یە، چونکی نەتەنیاهۆ شارەزاییەکا باش د هەلسوکەوت و سیاسەتا دەڤەرێ و د گەل دەولەتێن عەرەبی دا هەیە. هەروەسا وەلاتیێ ئیسرائیلێ دزانیت پێگوهۆڕێ نەتەنیاهۆ د نوکە دا نینە.
لەورا ب بۆچوونا من، ئەو دەنگێن پارتا لیکۆد ب دەستڤەئیناین، هەمی دەنگێن ئەندامێن پارتا وی نینن و دبیت رێژەکا زۆر ژ ئەندامێن یاشار ژی دەنگ دابیتە لیکۆدێ، ژبەرکو خەلک دڤێت قووناغێ دەرباز بکەت. گرنگە بزانین بارودۆخێ ئیسرائیلێ د نوکە دا گەلەک هەستیارە، لەوما بۆ خەلکێ ئیسرائیلێ و بەرژەوەندیا هەمی خەلکێ ئیسرائیلێ پێدڤیە ڤێ قووناغێ دەرباز بکەن و مانا سەرۆکێ وێ یێ نوکە نەتەنیاهۆ دڤێت ئارمانجێن خۆ بەرفرەهتر بکەت و شەڕێ وی ل گەل ئێرانێ د بەرژەوەندییا ئیسرائیلێ دا بکاربینیت. وەک چاڤدێرەکێ سیاسی دبینم ئەڤ شەڕێ وان دێ بەردەوام بیت و توندتر بیت.
ئێران نە ل گەل دەرکەفتنا نەتەنیاهۆو یە، ژبەرکو دزانیت سەرکەفتنا وی د هەلبژارتنان دا بارودۆخێ دەڤەرێ دیسا تێکدچیت و دەڤەر بەرە ب شەڕی ڤە دچیت، ب تایبەتی ئەڤ وەلاتە وەکی لوبنان و یەمەن و ئیراق و دەڤەرێن کەنداڤی. دیتنا من ئەڤ ئالۆزیە ب چارەسەری ناکەڤیت د قووناغا گرتنا تەنگەیا هۆرمز یان گەمارۆیا ئەمریکا ل دژی ئێرانێ دا و دڤێت باش بزانین ئیران دبن قەیرانان دا فێربوویە.
ئیسرائیل و ئەمریکا دێ پلانا C بکارئینن. پلانا A ئەو بوو ئیسرائیل و ئەمریکا هێرشەکا نەچاڤەرێکری کرە سەر ئێرانێ و کوشتنا سەرکردێن پلە دوو یێن بالادەست ل گەل مەرجەعێ وێ یێ سەرەکی و بڕینا چەنگێن ئیرانێ ل وەلاتێن کەنداڤی و عەرەبی وەکی حیزبوڵلا و حەماس و هەتا ڤێ دووماهیێ حەشدا شەعبی، مە دیت سەربازگەهێن وێ ل ئیراقێ تەقاندن و کرنە ئارمانج. ئەڤ شەڕێ ئێرانێ دێ گەلەک ڤەکێشیت، ژبەرکو ئەمریکا و ئیسرائیل نەڤێت رووبەروو شەڕی ل گەل ئیرانێ بکەن و بچنە د ناڤخۆیا ئیرانێ دا، بەلکو لێدگەرن ئیرانێ لایەنەکێ دی شەڕی بێخیت وەکی 8 سالێن شەڕێ ئیراقێ و ئیرانێ کو ل دوماهیێ کەسێ نەزانی کی سەرکەفت.
ئەڤ جارە ئیسرائیل بزاڤێ دكەت شەڕێ مەزهەبی ل دەڤەرێ بەرپا بکەت و شیعە کۆلاڤێ خۆ رادکەن بۆ شەڕەکێ مەزهەبی، ژبەرکو کەرب و کینەکا زۆرا سوننیان د دلێ واندایە و ب خوینا خۆ دزانن، ب تایبەتی ئەو وەلاتێن پەیوەندی ل گەل ئیسرائیلێ هەیە.
پلانا B گەمارۆیا توند ل گەل دان و ستاندنێ بوو و ئەڤ پلان ژی چ گوهۆرین د هەلوەستێ ئیرانێ دا نەکر. لەوا پلانا C یا ئەمریکا و ئیسرائیلێ ل دژی ئێرانێ ئامادەکری ئەوە بوردۆمانکرنا وێزگەهێن وێ یێن غازێ و نەفتێ و بەندەرێن ئاڤێ و بنگەهێن کارەبێ یە، دێ ئەمریکا ب رێکا کۆدەتایەکێ شێت رژێما کۆمارا ئیسلامی یا ئێرانێ رۆخینیت، چونکی بارێ ئابووری یێ خەلکێ گەلەک گران و دژوارە و دەنگێ نەرازیبوونێ بلند دبیت، هەروەسا پشتەڤانیا دەرەکی بۆ ئیرانێ بەر ب کێمبوونێ ڤە دچیت.
زێدەباری گەلەک خالێن دی یێن ژ نیشکەکێ ڤە رووبدەن و نە ل هزرا چ کەسان بن و ئەو لایەن بخۆ ب دەرفەت ببینیت. بۆ نموونە خۆنیشادانێن ئەورۆپا، کێ هزر دکر ئەڤ خۆنیشاندانە روو بدەن و کارەساتان ل دویڤ خۆ بینن.
هەردەم دبینم رۆژهەلاتا ناڤین وەکی پوفکدانەکێ یە یان وەکی تەپەکێ یە و بپەقیت و ژ دەستێ هەر کەسێ دەربچیت و ئێدی کەس نەشێت بارودۆخی کونترۆل بکەت. هەردەما ل ئیرانێ تەنگ دبیت، هەول ددەت شەڕی بەرفرەهـ بکەت، مۆشەكەكێ ل فرۆکخانەیا سعوودیێ ددەت و ل کوێتێ ددەت، وەکی سیاسەتا بەرێ یا دیکتاتۆرێ بەرێ سەدام حسێنی بکاردئینیت. دەما هێرش کریە سەر ئیسرائیلێ ب سارۆخان، مەسەلا ئایین و پشتەڤانیا فەلەستینێ کرە بەهانە، بەلێ د راستی دا مەرەما وی ئەوبوو دا کو سەرنجا هەمی عەرەبان بۆ لایێ خۆ بکێشیت و شەڕ ل دەڤەرێ بەرفرەهـ ببیت.
