ژ به‌ر ڤێ شاشییێ مۆبایلا خۆ نه‌گوهۆڕه
ئەگەر لایەنەکێ نەدیار و مەزن د بکارئینانا مۆبایلێن بەرسینگێ دا هەبیت، ئەو ژی برێڤەبرنا پاتریێ یە. ئەو نەریتێن ئەم ب تشتەکێ ئاسایی یان مفادار دزانین، ب دروستی ئەو ئەگەرن کو پاتری ب لەزتر ژکار بکەڤیت و خراب ببیت، ئەڤ چەندە ژی مە نەچار دکەت مۆبایلێن خۆ بەری دەمێ مە دڤێت بگوهۆڕین.
ئەو کریارێن بارکرنێ یێن زیانێ دگەهیننە پاتریێ
ئێک ژ شاشیێن هەرە بەربەلاڤ هێلانا مۆبایلێ یە ب بارکەرێ ڤە پشتی دگەهیتە ١٠٠٪ێ. ئەڤ کریارە بێ مفایی پاتریێ ماندۆ دکەت و دبیتە ئەگەرێ ب لەز خراببوونا وێ. هێلانا مۆبایلێ ب بارکەرێ ڤە بۆ درێژاهیا شەڤێ کریارەکا بەرچاڤه و گەلەک ژ بکارئینەران دوبارە دکەن بێی کو هەست ب وێ زیانێ بکەن یا کو دگەهیننێ. ژ بەر ڤێ چەندێ، هندەک ژ مۆدێلێن پێشکەفتی یێن مۆبایلان سیستەمێ بارکرنا زیرەک بکار دئینن دا کو وێ زیانا ژ ئەگەرێ ڤان نەریتان چێدبیت کێم بکەن.
شاشیەکا دی یا بەربەلاڤ، هێلانا پاتریێ یە هەتا ب تمامەتی ڤالە دبیت (دگەهیتە سفرێ) بەری بهێتە بارکرن. ئەڤ چەندە پاتریێ نەچار دکەت ل سەر ئاستەکێ کێم یێ ڤۆلتیێ کار بکەت، کو د دەمێ درێژ دا کاریگەریێ ل سەر سەقامگیری و شیانێن وێ دکەت. شارەزا شیرەتێ دکەن کو رێژەیا پاتریێ د ناڤبەرا ٢٠٪ هەتا ٩٠٪ بهێتە پاراستن دا کو تەمەنێ وێ یێ کارکرنێ درێژتر لێ بهێت.
کاریگەریا گەرماتیێ ل سەر پاتریێ
پلەیێن بلند یێن گەرماتیێ رۆلەکێ ئێکلاکەر د خراببوونا پاتریێ دا دگێرن. گەرماتیا زۆر و سەرمایا زۆر زیانێ دگەهیننە پێکاتەیێن کیمیایی یێن پاتریێ، کو دبیتە ئەگەرێ کێمبوونا شیان و کارامەییا وێ. هەروەسا بارکرنا مۆبایلێ د جهێن گەلەک گەرم یان گەلەک سار دا ب لەزتر پاتریێ مەزاخت دکەت، و ئەڤ چەندە وێ یەکێ دروست دکەت کو پاتری ب لەزتر شیانێن خۆ ژ دەست بدەت.
بکارئینانا بارکرنا ب لەز
سەرباری ب ساناهیکرن و مفا وەرگرتن ژ تەکنەلۆجیایا بارگاویکرنا ب لەز، لێ دبیت کاریگەریەکا نەرێنی ل سەر تەمەنێ پاتریێ هەبیت. چونکی ئەڤ رێکە دبیتە ئەگەرێ بلندبوونا پلەیا گەرماتیا پاتریێ، و ئەڤ چەندە زیانێ دگەهینیتە سەلامەتیا وێ د دەمێ درێژ دا. لەوما شیرەت دهێتە کرن کو بارگاویکرنا ب لەز بتنێ د رەوشێن ب لەز و پێتڤی دا بهێتە بکارئینان.
شیرەت بۆ درێژکرنا تەمەنێ مۆبایلا تە
بۆ خۆدویرئێخستن ژ ڤان گرفتان و درێژکرنا تەمەنێ مۆبایلا خۆ یا زیرەک، یا فەرە پەیرەوی ل نەریتێن باش یێن بارکرنێ بکەی. ژ باشترین کارێن کو تو بشێی بکەی: خۆ دویربێخە ژ وێ چەندێ بەردەوام مۆبایلا خۆ بگەهینیە ١٠٠٪ێ، نەهێلە پاتری ب تمامەتی ڤالە ببیت، و ئامیرێ خۆ د پلەیەکا گەرماتیێ یا گونجای دا بپارێزە. زێدەباری ڤێ چەندێ، بکارئینانا رەوشێ پاراستنا ووزەیێ، کێمکرنا رۆناهیا شاشێ، و بکارئینانا رەوشا تاری (Dark Mode) هاریکارن دا کو پاتری د باشترین رەوش دا بۆ دەمەکێ درێژتر بمینیت.
