ئەشقا ئەلكترۆنی
عەبدولرەحمان مەحموود
ئەشقا ئەلیكترۆنی (یان ئەشقا سەر هێلا ئینتەرنێتێ) ئێك ژ وان دیاردەیێن جڤاكی و دەروونیە كو د سەردەمێ تەكنۆلۆژیایێ و تۆرێن جڤاكی دا زۆر بەربەلاڤ بوویە، بێگومان پەیوەندیێن دلداری شێوازەكێ نوو و جودا ب خۆڤە گرتیە، كو ب ئێكجاری ژ یێن بەرێ دجیاوازن، دڤان پەیوەندیان دا تەختەكلید (كیبورد) و شاشە بووینە پرەك بۆ گەهاندنا هەست و هەلوەستێن دلی، خویایە ئەشقا ئەلیكترۆنی ژ پەیوەندیێن چات، نامە و فۆتۆیان دەست پێ دكەت، ئەڤ جۆرێ ئەشقێ حەزەكا مەزن ددەتە دو كەسان كو بێی چاڤێ وان ب ئێك بكەڤیت یان ل جهەكێ دیاركری بگەهنە ئێك، هەست ب گۆشەگیری و بتنێ بوونێ نەكەن، تشتێ ڤێ ئەشقێ ل بەر مرۆڤی شرینتر لێ دكەت ئەوە كو مرۆڤ دشێت ب ئازادانەتر و بێی شەرم بكەت هزر و هەستێن خۆ بۆ كەسەكێ دی دابرێژیت، هەلبەت ئەڤ جۆرێ ئەشقێ جهێ وێ ئەشقا ڕاست و دروست ناگرن یاكو مرۆڤ ڕوی ب ڕوی ئێك دو ببینیت و پەیاما خۆ یا دروست دەربارەی ئەشقەكا ڕاستەقینە بۆ وی/ وێ یا حەزژێ بكەت بگەهینیت، بێگومان ئەشقا ئەلیكترۆنی نەرێنی یێن وێ پترن ژ ئەرێنی یێن وێ، ڕاستە ب ئاسانی و ب ڕێكا سۆشیالێ مرۆڤ دكاریت پەیوەندیێن دلداری دروستبكەت و بێی كو كەسەكی ئاگەهی ژ مرۆڤی هەبیت، لێ بەرژەنگێن خڕابێن ڤان پەیوەندیان ل دووماهیێ دبیت گەلەك گران ل سەر مرۆڤی ب ڕاوەستن، چو ب بەلاڤكرنا و ێنە و دەنگ و ڕەنگێن مرۆڤی بیت، بتایبەت ئەگەر سەركەفتن د وان پەیوەندیێن دلداری دا نەئینا.
دبینین ژ ڤەڕێژا ڤێ ئەشقا ئەلیكترۆنی چەندین روودانێن دل بئێش ڕۆژانە ب سەر گەنجێن مە دا دهێنە خوار ژ كوڕ و كچان و ئەڤ ئەڤینا وانا ب ڤی شێوەی ب هندەك چیڕۆكێن تراژیدی ب دووماهی دهێن، یا گرنگ ئەوە هەر گەنجەك خۆ ژڤی ڕەنگێ ئەشقێ دۆر ڕابگریت و خۆ نەهاڤێتە دناڤا داڤێن ڤێ ئەشقا دووماهیا وێ بارا پتر بتنێ ڕۆندك و پۆشمانی بۆ مرۆڤی ژێ دمینن.
