خودان خانی مه، لێ كرێدارێ دائیرا كاره‌بێ مه!
ل وه‌لاتێن دونیایێ باج ل سه‌ر هه‌می تشتان هه‌یه بگره ژ كاره‌بێ و ئاڤێ و جادێ و. . هتد. چونكی ده‌مێ حوكمه‌ت بۆ هه‌ر تشته‌كی باجێ ژ وه‌لاتیان وه‌ردگریت، یا ئێكێ خزمه‌تگوزاریان وه‌كو كاره‌بێ و ئاڤێ و جادا و هه‌می خزمه‌تێن دی بۆ وه‌لاتیان دابین دكه‌ت، یا دویێ ئه‌و باجا وه‌ردگریت ل گۆر پلانه‌كێ یه، ب ئاوایه‌كی حوكمه‌ت كه‌سێ مه‌غدۆر ناكه‌ت.
ل ده‌ف مه ئه‌و باج دبیته كریا ئاڤێ و كاره‌بێ و خزمه‌تێن دی، لێ بابه‌تێ دخوازم ل سه‌ر باخڤم كاره‌به، بێگومان ئه‌ڤه زێده‌تر ژ ساله‌كێ یه هه‌رێما كوردستانێ هه‌می كه‌فتیه د ئالۆزیا ئابووری دا و ئه‌م هه‌می دزانین كو هه‌ر سێ هه‌یڤان یان چار هه‌یڤان جاره‌كێ مووچه دهێنه به‌لاڤكرن، لێ هه‌ر هه‌یڤ كارمه‌ندێ كاره‌بێ دهێت و كوژمه‌كێ پاره‌ی وه‌ردگریت، لێ ژبه‌ر ئالۆزیا مه گۆتی خه‌لكی ژی پاره نینه كریا كاره‌بێ بده‌ت، ئه‌ڤجا دێ بێژیته كارمه‌ندێ كاره‌بێ ((مه ل حوكمه‌تێ و هه‌وه ژی ل مه)) ئانكو حوكمه‌ت مووچان ناده‌ت ئه‌م ژی نها پارێ كاره‌بێ ناده‌ین، ئه‌ڤه و زێده‌باری كو دانانا پارێ كاره‌بێ نه یێ دادپه‌روه‌ره كو هه‌می دزانن و نه‌تشته‌كێ به‌رزه‌یه، چونكی دێ ماله‌كێ بینی گه‌له‌ك ئامیرێن كاره‌بێ هه‌نه و كار پێ دكه‌ن و پاره‌كێ كێم بۆ هات، بۆ نموونه دێ بێژین 50 هزار دینار دێ بۆ هێن، ل هه‌مان ده‌می دێ ماله‌كا دی بینی نیڤا ئامیرێن مالا دی نینن، لێ 100 هزار دینار و زێده‌تر بۆ دچن!.
لێ هه‌ر وه‌لاتی د ڤێ هه‌ڤكێشێ دا یێ خوساره‌ته، چونكی كریا كاره‌بێ ل سه‌ر وه‌لاتی ستوور دبیت، ب ئاوایه‌كی هه‌تا كریا كاره‌بێ ل سه‌ر هنده‌ك مالا بوویه سێ چار ملیۆن دینار و دێ هه‌ر ده‌ت، و ده‌مێ مووچه‌كی وه‌ردگریت نه‌چاره ل كێم و كاسیێن هه‌یڤێن بۆری یێن بێ مووچه‌یی خه‌رج بكه‌ت و نه‌شێت كریا كاره‌بێ بده‌ت، له‌ورا هه‌ر كریا كاره‌بێ ل سه‌ر ستوور دبیت و دێ هه‌ر ستوور بیت.
ل ڤێرێ ره‌خنا من نه ژ دائیرا كاره‌با دهۆكێ یه، به‌لكی ژ حوكمه‌تێ یه چونكی پێدڤی بوو د ئالۆزیه‌كا هۆسا دا حوكمه‌تێ ده‌ستپێشخه‌ری كربا كو وه‌لاتی ژ كریا كاره‌بێ و ئاڤێ و باجێن دی عه‌فۆ كربانه، یان كریا كاره‌بێ و ئاڤێ. .. هتد گه‌له‌ك ئه‌رزان كربان!! چونكی ده‌مێ وه‌لاتی د ئالۆزیه‌كا هۆسا دا خوه راگرن و هه‌می كارمه‌ند و فه‌رمانبه‌ر ب ئاوایه‌كێ نۆرمال ده‌واما خوه بكه‌ن، ئه‌ڤ خوه‌راگریه هه‌ژی پاداشته‌كێ یه، لێ ئه‌و ژی مه نه‌دیت، ئه‌ڤجا ئه‌وێ خودان خانی ژی یێ بوویه كرێدار و نه‌شێت كریا خوه بده‌ت، لێ هنده‌ك هه‌نه دوجاران كرێدارن، جاره‌كێ كو خانیێ وی ب كرێ یه و جاره‌كێ یێ بوویه قه‌ردارێ كاره‌بێ كو ئه‌و ژی كریه‌كه.
ل دووماهیێ دبێژم ل هه‌می دونیایێ گه‌نج پشتی قووناغا سنێله‌یێ ده‌رباز دكه‌ن هنده‌ك خه‌ون د مێشكێ وان دا دروست دبن و پلانێ بۆ خوه ددانن كو وان خه‌ونان بده‌ست خوه‌ڤه بینن، مینا ژنئینانێ و خانی و ترۆمبێل و. . هتد، بێگومان ئه‌ڤ خه‌ون و هیڤیه تشته‌كێ ره‌وایه بۆ هه‌ر كه‌سه‌كی، چونكی ده‌مێ گه‌نج هه‌ڤژینیێ پێك دئینیت یان ل ده‌ف خێزانا خوه دژیت یان ژی دێ چیته دكریان ڤه، لێ د هه‌ردو حاله‌تان دا وه‌كو پێدڤی نه‌یێ مرتاحه، چونكی ده‌مێ ل ده‌ف خێزانا خوه ئه‌و ئازادی نینه وه‌كو ئه‌و و هه‌ڤژینا خوه ب تنێ د خانیه‌كی ڤه زێده‌باری چه‌ندین ئاریشێن دی، هه‌روه‌سا ده‌مێ دچیته دكریان ڤه نه‌یێ مرتاح و ئارامه، چونكی هه‌یڤ دفڕن و هه‌رده‌م هزرا وی یا ل سه‌ر دانا كریێ، له‌ورا ده‌مێ هه‌ر ئێك ژ مه ژ بن كریان ده‌ردكه‌ڤیت دێ بێژیت (الحمدلله به‌لا من و كریا ژێكڤه بوو)، به‌لێ تو چ دبێژی ده‌مێ تو خودان خانی بی و كرێدار بی؟!.
