هه‌لبه‌ست ریسكه‌كا زمانه‌ڤانی یه
ده‌ما مرۆڤ گوهدارییا هه‌لبه‌ستێ دكه‌ت، دخوازه هه‌ست و هش و سۆز و هزرا وی بلڤینیت؟ به‌رییا هه‌لبه‌ستڤان تێكستا خوه بخوینیت، هنده‌ك پڕسیار د هشێ مه دا دروست دبن، ژ وانا ئه‌رێ دكاره ب رێیا دیسكورس یان گۆتارا خوه یا هه‌لبه‌ستی مه تووشی هنگافتنێ یان ڤه‌جنقاندنێ بكه‌ت و مه د هوندری هولان دا ده‌ربێخیت و مه ئاشنایی دونیایه‌كا دی یا چاڤه‌رێنه‌كری بكه‌ت و ل وی چاخی هه‌ست ب چێژێ بكه‌ین. خۆش به‌ختانه د دیدارا نه‌ورۆزا هه‌لبه‌ست یا سالا 2014 ئه‌وا ل باژێرێ دهۆكێ هاتیه سازكرن، مه گوهداریا هه‌له‌به‌ستڤانێ گه‌نج دیار ئه‌ره‌دنی كر، ئه‌وی ئه‌و ریتوال ژ مه‌را به‌رهه‌ڤكر، ل گه‌ل هه‌ر ئێك ژ رسته‌یێن وی من هه‌ست دكر، په‌یڤ یێن سه‌مایه‌كا بێ هۆده‌یی و شێتانه دكه‌ن، مه هه‌ست كر كو په‌یڤان سیحرا خوه یا نه‌مازه‌یی هه‌یه، من هه‌ست كر ئه‌م ل هه‌مبه‌ر گه‌نجه‌كێ بوێرین كو ریسكێ ب په‌یڤان دكه‌ت، هه‌ول دده‌ت ب زمانێ خوه یێ نه‌مازه‌یی ب په‌یڤیت و ب ستایل و شێوازێ خوه یێ تایبه‌ت ب نڤیسیت، ل سه‌ر كۆمه‌كا دیارده و مژاران راوه‌ستیت. لێ ب جوره‌كێ هونه‌ری رسته‌یا خوه دارێژیت و بكه‌ته ئاماژه‌یێن شێوازگه‌رایی، ل گه‌ل بلند و نزمبوونا ریتما كۆپله‌یان، تێكستا وی دلڤی و بزاڤتن و گوهۆرینه‌ك د بنیاتێ وێ دا به‌رجه‌سته بوو، ده‌ما گۆتی: ده‌رگه‌هێ ئه‌سمانی ڤه‌كه.. من دڤێت جگاره‌كێ بكێشم.. ئه‌ڤ خه‌لكه ژ بێهنا جگاران حه‌ز ناكه‌ن.. ژبه‌ر كو بێهنا خوینێ ژێ ناهێت. هه‌ر ل ده‌ستپێكێ، مه هه‌ستكر ئه‌م ل هه‌مبه‌ر رسته‌یه‌كا چاڤه‌رێنه‌كری داین، ئه‌ڤ خامه‌یێ نوویێ ساخله‌ته‌كا جیاواز دده‌ته تشتان، ره‌تكرنا ڤالاتیان دكه‌ت، تشتێن نه‌لڤ دلڤینیت و ل پیرۆزیان دده‌ت و ئه‌سمانی د هشێ گوهداری دا بچووك دكه‌ت، دكه‌ته ژووره‌كا به‌ر ته‌نگ، ساخله‌ته‌كا جودا دده‌تێ، د بیردانه‌كا مه دا ئاسمان، ئاسۆیه‌كێ به‌رفره‌ه و بێ دووماهیه، ئاسمان و پیرۆزی هه‌ڤ جۆتن. د تێكستێن ئایینی دا، ده‌رگه‌هێ ئاسمانی ب هێز و ئیراده‌یا یه‌زدانی ڤه‌دبیت، ل په‌ی وان ده‌قان ب تنێ ل وی ده‌می ڤه‌دبیت، ده‌ما یه‌زدان بخوازیت گوهداریی په‌رێستڤانێن خوه یێن چاك بكه‌ت، ل ڤێرێ هه‌لبه‌ستڤان ب زمانه‌كێ خوزایی دپه‌یڤیت، هاوارا خوه به‌ر ب تێكستێن ئایینی دبه‌ت، بكارئانینا جڤه‌نگێن ئایینی و د تێكستێن هه‌لبه‌ستی دا دیارده‌یه‌كا به‌رچاڤه، لێ چاڤه‌رێ نه‌كری ئه‌وه، هه‌ر وه‌ك خوه ئه‌ڤ جڤه‌نگه بكار نه‌هێن، یان كو ل ته‌ڤ رامان و ئاماژه‌یێن وان یێن كه‌هی و دووباره‌كری ڤالا بكه‌ت و ئانكویێن وان به‌ره‌ڤاژی بكه‌ت. بنێره د تێكستا هه‌نێ دا، ئاسمان ره‌هندێ خوه یێ سیحری ل ده‌ست دده‌ت، ساخله‌تا پیرۆزبوونێ وه‌ندا دكه‌ت، دبیته مینا هه‌ر تشته‌كێ دی ل سه‌ر عه‌ردی ئه‌و ژی پیس دبیت، ل هه‌ر دو رسته‌یێن دی دا، ئاخفتنا خوه ب زمانه‌كێ ساده‌یێ ڤه‌گێرانێ و نا هه‌لبه‌ستی تێز دكه‌ت، لێ د رسته‌یا چاران دا، جاره‌ك دی دید و نێرینێن خوه دناڤ دا خه‌ست دكه‌ت، بیاڤه‌كا ته‌نگژینێ دروست دبیت كو گوهدێر تووشی هه‌نگافتنێ ببیت، دیمه‌نه‌كێ خویناوی نه‌بینراو هه‌ست پێكری به‌رجه‌سته دبیت (ناڤبه‌را خوداوه‌ندی و ئاسمانی و جگه‌ره و بێهنا خوینێ) هه‌ڤبه‌ندیه‌كا چاڤه‌رێ نه‌كری جهگیر دبیت. جگاره و بێهنا وان دبنه تشتێن مرۆڤ دۆست ب به‌راورد دگه‌ل ئه‌و حه‌زا خرابكاریێ ئه‌وا د ناڤا مرۆڤان دا هه‌یه، ل ڤێرێ په‌یڤ ژ رامانێن خوه یێن كه‌هی و دووباره‌كری ده‌ردكه‌ڤن و ب ئانكو و ڕامانێن دی هاتینه باركرن. راسته دناڤ ڤان رسته‌یان دا، چ دروشمێن شۆرشگێرانه نابینین، لێ د ناڤه‌رۆكێ وان دا هه‌لۆێسته‌ك ئاشتیخواز و شۆرره‌شگێرانه هه‌یه، ئه‌ڤ دیارده‌یه ژی یه‌كه ژ دیارده‌یێن هه‌لبه‌ستا نوو، ئه‌و هه‌لبه‌ستا تشتێن تێدا ڤه‌شارتی پتر و پترن ژ وان تشتێن تێدا ئاشكرا. د تێكستا هه‌لبه‌ستی دا، پێدڤی یه خوینده‌ڤان هه‌ست ب چه‌ند دیارده‌یێن گرنگ و هه‌ستیار بكه‌ت، ژوانا ڤارێبوون و ده‌رچوونه، ژبه‌ر كو زمانێ شیعری زمانه‌كێ ڤارێ یه، زمانه‌كه رازی نابیت ب چ بازنه‌یێن دووباره‌كرن و كه‌هیبوونێ، زمانێ شیعرێ د ناخێ خوه دا یاخیبوونه ل سه‌ر ساتیلێ زمانێ ڤه‌گێرانێ و په‌خشانێ و هه‌روه‌ها ده‌رچوون و لادانه ژ ته‌ڤ پێكهاته‌یێن سیسته‌م و هزرا زال و زمانێ ساده و گۆتارا راپورتی. هه‌لبه‌ستڤان ڤی كاری د هوندرێ تێكستا خوه ده ئه‌نجام دده‌ت، هنده‌ك جاران بێ ئاگابوون و پرانیا جاران ژی ب ئاگابوونڤه، له‌ورا دبێژین هه‌لبه‌ست تێكهه‌لبوونا هه‌ست و نه‌ستانه، ده‌ربرینه ژ دید و نێرین و پێشبینیێن هه‌لبه‌ستڤانی، به‌رییا كه‌توار هه‌ڤریشی قه‌یرانێ ببیت، هه‌لبه‌ستڤان پێشبینیكرنا به‌رژه‌نگێن ڤێ قه‌یرانێ دكه‌ت، بڤی ره‌نگی دیار دبیت كو نڤیسینا هه‌لبه‌ستێ دوور نینه ژ قادا گشتی و ئه‌و كه‌توارێ هه‌لبه‌ست تێدا دهێته نڤیساندن كارتێكرنه‌كا راسته‌راست دكه‌ته سه‌ر ناخێ هه‌لبه‌ستڤانی، لێ هه‌لبه‌ستڤانێ راسته‌قینه ب ئاوایه‌كێ ناراسته‌راست ده‌ربرینێ ژ حاله‌تێن هه‌نێ دكه‌ت و دیارده‌یێن جڤاكی و سیاسی و ده‌روونی. . هتد. پشتی تێكهه‌لی جیهانا خوه یا ئاشوپی دكه‌ت و ل دووڤرا دا ب ئاوایه‌كێ هونه‌ری و ب زمانه‌كێ بلند ژ مه‌را دخوینیت و شرۆڤه و ئانالیزه دكه‌ت.
