سندۆقا ڕه‌ش یا ئازادكرنا مووسل
ده‌ما فڕوَكه‌یه‌ك دووچاری ڕوودانا كه‌فتنێ ئانكو سووتنێ دهێت, ئێكسه‌ر هه‌می لایه‌نێن ڤه‌كۆلینێ و تایبه‌تمه‌ندێن پشكنینا هونه‌ری و ده‌ستهه‌ڵاتێن فڕین و فروَكخانان بوَ بده‌ستڤه‌ئانین و پشتڕاسبوون ژ ئه‌گه‌ر و هوَكارێن ڕوودانێ, به‌ر ب (( سندۆقا ره‌ش)) دچن. گه‌لوَ ((سندۆقا ره‌ش)) چیه و دیرۆكا وێ چیه بۆچی ب ڤی ناڤی به‌رنیاس بوویه و ڕاسته یا ره‌شه؟!. ل په‌ی قانوونێن نێڤده‌وله‌تی و رێكه‌فتنامه‌ێن گه‌شت و سه‌فه‌رێن جیهانی یا پێدڤیه هه‌ر فڕوَكه‌یه‌ك د گه‌شتا خوه دا ئامێره‌كێ ریكوَردێ ژ بوَ توَماركرنا هه‌می جوَر و ڕه‌نگێن پێزانینان ل سه‌ر كاودان و چاوانیا بڕێڤه‌چوونا گه‌شتا خوه د فڕوَكێدا هه‌لبگریت, كو ئه‌ڤ ئامیره بلنداهی و خێرایی و سمتێ بزاڤێ و خێرایا هه‌وای و زه‌مه‌ن و ده‌مژمێران هه‌تا بگره ئاخفتن و گه‌نگه‌شه‌یا كارمه‌ندو پسپۆر و كاپیتانان توَمار دكه‌ت. ڕه‌نگێ وێ نه ڕه‌شه لێ ژبه‌ر بیاڤێ دژواری و قه‌باره‌یێ قوربانیان و سۆتنان, ب ڤی ناڤی هاتیه به‌ڵاڤبوون, به‌لكی ڕه‌نگێ وێ پڕته‌قالی ئانكو به‌ر ب زه‌ری ڤه دچیت, دیرۆكا ئێكه‌مین سندۆق ژی دزڤڕیت بۆ ساڵا 1958 ێ ده‌مێ زانایێ فڕوَكه‌ڤانێ ئوستڕالی ((دیڤید وارن)) ئه‌ڤ ریكوَرده‌ره پێشكێشی ده‌ستهه‌ڵاتێن فڕینا ئوستڕالی كری, لێ به‌لێ ئه‌وان ئه‌ڤ بیرۆك و هزره ڕه‌ت كر و وه‌كی جاسووسیكرنه‌كێ سه‌حدكره ڤی كاری, له‌وا ناڤبری نه‌چاربوو ئه‌ڤێ داهینانێ به‌ر ب به‌ریتانیا ببه‌ت و ئه‌وان ژی ب گه‌رمی پێشوازی لێكر, هه‌تا گرنگی و بهایێ وێ گه‌هشتیه ئیروَ. دا بزڤرم سه‌ر بابه‌تێ سه‌ره‌كی و تایتلێ گۆتارێ, كو ئه‌و ژی ستراتیژیه‌تا ئازادكرنا مووسله و دا بزانین كا سندۆقا ره‌شا ئه‌وێ ڕوودانێ دێ چ بۆ مه كوردان ریكوَرد كه‌ت!! واشنتوَن و هه‌ڤپه‌یمانیا دژی تیرۆرێ وه‌سا ڕادگه‌هینن كو د ئه‌ڤ ساڵه 2015 پڕۆَسا ئازادكرنا مووسلئ دێ ده‌ست پێكه‌ت, به‌رهه‌ڤیان بۆ شه‌ڕی دكه‌ن و له‌شكرێ خوَه ناهنێرن و دێ متمانه و پشتگه‌رمیێ ب كوردان ( پێشمه‌رگه ) ی و سۆپایێ عیراقێ و عه‌شیره‌تێن سوننه كه‌ن. ڕاستی شه‌ڕێ مووسل ل دووڤ ئه‌ڤێ ستڕاتیژیه‌تا بێ ستڕاتیژی یا ئه‌مریكا , پێدڤی ب هه‌ڵوه‌سته‌كا گرنگ هه‌یه نه‌خاسمه ژ لایێ مه كوردان ڤه , چونكی ئوَباما و هێزێن هه‌ڤپه‌یمان زوَر باش ئه‌وێ ڕاستیێ دزانن كو تا نها چ هه‌ڤسه‌نگیه‌ك له‌شكری و لوَجیستیكی د ناڤبه‌را هێزێن داعش و هێزێن عیڕاقێدا نه‌چێبوویه و به‌لكی تنێ پێشمه‌رگه شیاینه سنۆرێن هه‌رێمێ بپارێزن. ئه‌زموونێن هه‌ردو شه‌ڕێن تكریت و ئه‌نبار گڕوڤه و به‌لگه‌نه ل سه‌ر ڤێ ڕاستیێ, ژ ئالیه‌ك دن ڤه ئێك ملیوَن و نیڤ سوننه ل باژێرێ مووسل دژین و چ ده‌م وزه‌مانان ده‌ستهه‌ڵاتا شیعه‌یان ل سه‌ر خوه قه‌بوول ناكه‌ن و كورد ژی ناخوازن بێ ڕه‌زامه‌ندیا عه‌ره‌بێن سوننه شه‌ڕی ل مووسل بكه‌ن داكو ڕامانا شه‌ڕێ ئازادكرنێ ب شه‌ڕێ كورد و عه‌ره‌بان نه‌هێت گوهۆڕینێ. بلا ژ بیر ژی نه‌كه‌ین كو هێزا دارایی و بودجه‌یا عه‌بادی قودره‌تا خه‌رجیێن شه‌ڕێن وه‌كی مووسل نینن و ئه‌وی پێ باشتره د ڤێ قووناغێدا سۆپا و له‌شكرێ خوه بۆ پاراستنا به‌غدا بكاربینیت. ڤێجا ئه‌م گه‌هشتینه وێ باوه‌ڕێ كو پلانا ڕوَژئاڤا و ئه‌مریكا و هه‌ڤپه‌یمانێن وێ بۆ ئازادكرنا مووسل ژ ده‌ستێ داعش پێدڤی ب دووڤچوونه‌كا نوو و تازه هه‌یه, له‌وما بۆ ئه‌مریكا یا گرنگه جاره‌كا دن ب ڕه‌نگه‌كێ ڕادیكال و بنه‌ڕه‌ت پێداچوونه‌كێ بۆ ستڕاتیژیه‌تا خوَه دژی داعش بكه‌ت و شاشیێن 2003 ێ دوباره نه‌كه‌ت. هه‌تا مووسل ل بن كوَنتڕوَلا داعش دابیت, مه‌ترسیێن وان ل سه‌ر ته‌ڤایا دونیایێ دێ هه‌بیت. ئه‌ز دبینم بانگهێشتكرنا (مه‌سعود بارزانی) سه‌روَكێ هه‌رێما كوردستانێ بۆ كۆچكا سپی, پێنگاڤه‌ك ده‌ستپێكه ژ بوَ گوَهڕین و ڕاستڤه‌كرنا شاشیێن ستڕاتیژیه‌تا ئه‌مریكا, نه‌خاسمه ژ بوَ مه‌ره‌ما ئازادكرنا مووسل و پرسگرێكێن دن. كه‌واته ب دیتنا من كورد ((سندۆقا ره‌ش)) یا كه‌فتنا ستڕاتیژیه‌تا ئوَباما ینه.
