ئه‌م نه‌شالین!
ئه‌م وه‌كی وی رویڤینه ئه‌ڤێ گۆتی: به‌س من نه‌كه‌نه دكولكێ مریشكاڤه, ئه‌ز ژ دیكلێ دمك سۆر دترسم!. د كۆمه‌لا كورده‌واری یا به‌رێ دا زیره‌كی بوو و خوه‌ش مێری بوو تو دزیكه‌ر بایه, یان ته ژنه‌ك ڕه‌ڤابا و نامووسا خه‌لكه‌كی بنپێ كربا!, یان مێر كوشتبانه سه‌را ده‌واره‌كی, یان دل د موختاریێ دا هه‌با.. مرۆڤ دبیته ئه‌و ئه‌ڤێ ژێ چێبووی, روحا (كه‌له پیرتی) تا ئه‌ڤرۆ یا د خوینا مه‌دا, مالێ حوكمه‌تێ هاتبوو دزین و یێ دهێته دزین و هه‌ر ئێك ژی هندی خوه یێ پێداده‌ت.. هندی مه (به‌نكا سه‌نترال) نه‌بیت دێ هه‌ر دزیێت حوكمه‌تێ هێته‌كرن. ل ڤی ده‌می نه‌یا ب زه‌حمه‌ته حوكمه‌تا مه‌ژی بۆ وه‌لاتیێ خوه (ڤیزه) كارتێ چێكه‌ت و مووچێ وی بچیته سه‌ر كارتا حسابا به‌نكێ, (هه‌كه هات)! مه‌به‌ست ئه‌وه كو حوكمه‌ت دێ زانیت چه‌ند داهاتی دهێت و دچیت د حسابا وه‌لاتی دا. هه‌روه‌سا ل داموده‌زگه‌هێن میری فه‌ره سیسته‌مه‌كێ پێشكه‌فتی هه‌بیت ل سه‌ر مه‌زاختنا داهاتی. ب ڤی ئاوایی سیسته‌مێ به‌نكێ ڕێكخستنه‌كا ب سانه‌هی و دووڤچوونه‌كا سڤك په‌یدا دكه‌ت ل سه‌ر هاتنوچوونا پاری د وه‌لاتی دا. ل وه‌لاتێن ئه‌ورۆپا ژی د به‌رێدا به‌رپرسا پارێن وه‌لاتی دخارن, لێ پشتی سیسته‌م و قانوونێ ده‌ست و پێت نه‌شالان گرێدان نها لێدانا پاره‌ی نینه. (شورته‌كێ كاهره‌بێ) د ئاڤاهیێ خزینا مه‌دا دكاریت حسابێت ب ملیۆنێن دۆلاران به‌رزه بكه‌ت و نه‌هێلیت. به‌نكێن كه‌سان و بازرگانی نه ماله بۆ وه‌لاتیان, حوكمه‌ت دڤێت ببیته ده‌یكا مه‌زن و به‌نكا مه‌زن بۆ وه‌لاتیان. پێشكه‌ڤتنا وه‌لاتێن بیانی د سیسته‌ماندا جهێ شه‌رمزاریێ یه بۆ مه كو ئه‌م هێشتا یێ لسه‌ر سیسته‌مێ سالێن بیستان و چه‌رخێن كه‌ڤندا دژین. كونتولكرن و یاریكرن د بازارێ وه‌لاتی دا نابیت دده‌ستێ فلان و بێڤانی دا بیت, گه‌له‌ك جاران ئه‌م ل دووڤ بۆڕسا جیهانی ناچین! بازرگان ل دووڤ كه‌یفا خوه بازاری دكه‌ن ل گه‌ل ملله‌تی. به‌نكا وه‌لاتیێ مه ژی بن بالیفكن و جهێن ڤه‌شارتینه د مالان دا. باوه‌ریا ملله‌تی ب به‌نكا فلانی ناهێت به‌لكی بڕه‌ڤیت یان خوساره‌ت ببیت. دزی دێ كێم بیت ب ڕێژه‌كا بلند هه‌كه حوكمه‌تا مه له‌زێ بكه‌ت سیسته‌مێ به‌نكا سه‌نترال ئاڤا بكه‌ت كه‌رتێ تایبه‌ت نه جهێ باوه‌ریێ یه بۆ وه‌لاتیان. ئه‌م نزانین حوكمه‌تا كوردستانێ چ به‌رهه‌ڤی كرینه بۆ مه و نێزیك دێ بینه ده‌وله‌ت ژی!؟. ئه‌رێ دێ پارێ ده‌وله‌تا مه چ ناڤ بیت و یێ چاوا بیت؟ و چاڤلێكری نه‌بیت!, ئه‌رێ كه‌س به‌حسێ ناسنامێن كوردی ناكه‌ت كا دێ دچاوا بن؟ یان پاسپۆرتا كوردستانێ یا چاوایه؟ ما ئه‌م دێ بینه ده‌وله‌ت هێشتا وه‌ره‌قا ئه‌رزاقی و ناسناما عیراقی یا ده‌ستێن مه‌دا!؟, نیشانێن چ به‌رهه‌ڤیان ئه‌م نابینین. ده‌وله‌تبوون شه‌نسه‌كێ مه‌زنه بۆ گه‌له‌كان كو ئێدی ده‌ستێ خوه درێژی پارێ حوكمه‌تێ نه‌كه‌ن, ل خوه‌زڤرین و نووكرنا سۆزان هه‌رده‌م دره‌نگ نینه. ئه‌م نه‌شالین ب دزینا هزران, ئاوازان, هۆزانان و.. ئه‌ڤه نه كه‌سایه‌تی یه هۆسا!! دووماهیكا هه‌ر دزیكه‌ره‌كی پشت
شفشن و رێكه‌كا گرتیه.
