رۆژا پارێزگه‌هبوونا دهۆكێ پیرۆز بیت
رۆژا 27 ی مه‌ها گولانێ، رۆژا پارێزگه‌هبوونا باژێڕێ دهۆكێ یه، كو ل سه‌ر ده‌مێ خۆ داخوازه‌ك بوو ژ داخوازیێت بزاڤا رزگاریخوازا كوردی و شۆڕه‌شا ئیلۆنا مه‌زن و به‌نده‌ك بوو ژ به‌ندێت رێككه‌فتنا 29 ی خزیرانا سالا 1966 ێ لناڤبه‌را سه‌ركردایه‌تیا شۆڕه‌شا ئیلۆنێ و حوكمه‌تا عه‌بدورره‌حمان به‌ززاز، كو ل وی سه‌رده‌می سه‌رۆك وه‌زیرێ ئیراقێ بوو.
راسته به‌ندا پارێزگه‌هبوونا دهۆكێ ل سالا 1966 ێ ده‌ركه‌فتبوو، لێ ئه‌و بڕیار بدرستی ل رۆژا 27 ی گولانا سالا 1969 ێ ده‌ركه‌فت، پشتی سه‌روبه‌رێ سیاسیێ ئیراقێ هاتیه گهۆڕین.
ل رۆژا 1 ی مه‌ها 11 ژ سالا 1969 ێ، ئێكه‌مین پارێزگارێ دهۆكێ ده‌ستبكار بوو، ئه‌و ژی ره‌حمه‌تی عه‌گید سه‌ددیق ئامێدی بوو، و وی سه‌رده‌می دانوستاندنێت سیاسی لناڤبه‌را حوكمه‌تا ئیراقێ و سه‌ركردایه‌تیا شۆڕه‌شا ئیلۆنێ هه‌بوون و فێقیێ وان دانوستاندنا بوو رێككه‌فتنا 11 ی ئادارا سالا 1970 ێ، ئانه‌كو پشتی چار مه‌ها ژ پارێزگه‌هبوونێ!!
ل رۆژا ده‌ست بكاربوونا پارێزگاری، جه‌ماوه‌رێ دهۆكێ ل وێ مه‌یدانا پێشیا رێڤه‌به‌ریا پۆلیسان ل ناڤه‌ندا باژێڕی كۆم بوو و ئاهه‌نگ گێڕان و ئه‌ز ژی ئێك ژ وان گه‌نجان بووم یێت ل وێرێ ئاماده‌بوویم، پشتی ده‌مه‌كی پارێزگارێ نوی عه‌گید سه‌ددیق گه‌هشت و سلاڤی جه‌ماوه‌رێ خڕ ڤه‌بووی كر و په‌یڤه‌ك خواند و پیرۆزی ل خه‌لكێ دهۆكێ كر ژ بۆ پارێزگه‌هبوونێ.
ئێكه‌م جهێ پارێزگاری ده‌وام لێ كری، هه‌ر جهێ قه‌یمقامیێ بوو د ناڤ رێڤه‌به‌ریا كه‌ڤن یا پۆلیسا دا، پشتی چه‌ند حه‌فتیه‌كا، بۆ رێڤه‌به‌ریا به‌ستنا تویتنێ هاته ڤه‌گوهاستن، ئه‌وا نوكه لقێ ئێكێ پارتی ده‌وامێ لێ دكه‌ت، وی پارێزگاری چار مه‌ها به‌رده‌وامی دا كارێ خۆ هه‌تا رێككه‌فتنا 11 ێ ئادارا سالا 1970 ێ هاتیه راگه‌هاندن. پشتی وی ئێكێ دی هات بناڤی محه‌مه‌د ره‌سوول، كو كورده‌كێ گۆیی بوو ژ مویسلێ و لسه‌ر حسابا حزبا به‌عس هاته دامه‌زراندن. پشتی ده‌مه‌كێ كورت، ل په‌ی رێككه‌فتنا ئادارێ، حزبا پارتی نوینه‌رێ خۆ كره پارێزگارێ دهۆكێ، ئه‌و ژی هاشم ئاكره‌یی بوو، نێزیكی سێ سالا وه‌ك پارێزگار ما ل دهۆكێ.
هه‌ر چه‌وا بیت، هه‌تا سه‌رهلدانا سالا 1991 ێ ژی دهۆك باژێڕه‌كێ بچووك بوو و حوكمه‌تا ئیراقێ پویته پێ نه دكر، لێ ده‌مێ ده‌سهه‌لات كه‌فتیه ده‌ستێ كوردان بخۆ، سال بۆ سالێ دهۆك هه‌ر یا گه‌ش دبیت و مه‌زن دبیت و نوكه دهۆك جوانترین باژێڕێ كوردستانێ یه.
