بلا تڤه‌نگێن چیای بێده‌نگ ببن
هه‌كه مه شیانێن هندێ نه‌بن, ئانكو نه وێرین د نڤیسینێن خوه دا به‌حسێ قه‌سابخانا ڕوبوَسكێ و تاوانا فه‌رینازێ و براكوژیا كێله‌شینێ بكه‌ین, هه‌كه مه هه‌لبه‌ت ب به‌لگه و دیكیوَمێنت ڤه, وێره‌كیا ده‌ستنیشانكرنا شاشی و هه‌ڵه و ئه‌گه‌رێن گه‌نده‌ڵیێ و نه‌رێنیێن سیاسه‌ت و كارگێریا وه‌لاتێ خوه نه‌بن, پا كاریگه‌ری و باندوَڕا كارێ رۆژنامه‌گه‌ری و نڤیسینا مه ژ پێخه‌مه‌ت چاكسازی و گورینكارێن ئه‌رێنی دێ چبیت؟!, پا چاوا دكارین ژ پێش خه‌لك و جه‌ماوه‌ر و شه‌قاما خوه‌ڤه ده‌نگه‌ك زه‌ڵاڵ و ڕاستگوَ بین و ڕاستیان بگه‌هینینه حوكمه‌ت و ژێده‌رێن بڕیار بده‌ست؟!! داكو ئه‌و ژی نه‌خشه‌ڕێكێن چاره‌سه‌ریێ دابڕێژن و ژیانه‌ك سیسته‌ماتیك بهێته ئاڤاكرن و بنیاتنان. د ڕۆژه‌ڤا ئیڕوَیا ده‌ڤه‌رێ و كوردستانێ ب تایبه‌ت و سه‌رتاسه‌ری جیهانێ ب گشتی, گوهۆڕینێن سیاسی و له‌شكریێن ب له‌ز و ڕوودان و كاره‌ساتێن ژ نشكاڤه سه‌رهه‌ڵدده‌ن, ڕه‌نگه هنده‌ك ژ ئه‌ڤان بۆیه‌ران گرێدایی بن ب هه‌ڤ و هنده‌ك ژی نه. شه‌ڕ و جه‌نگێن داعشان ته‌ڤایا فه‌لسه‌فه و پڕوَگرامێن سیاسی و ئابووری و جڤاكی ل جیهانێ به‌ر ب نسكوَ و هه‌ره‌سه‌كا گشتگیر برن و ئێدی جیهان نه‌چاربوو جاره‌ك دن ژ جێگر وبژارێن نوو و تازه بگه‌ریت, مینا هه‌ردو شه‌ڕێن جیهانیێن به‌رێ هزرا دامه‌زراندن و چێكرنا ته‌وه‌ر و هه‌ڤپه‌یمانی و ئایدیوَلوَژیا و به‌رژه‌وه‌ندیێن ئابووریێن هه‌ڤپشك بكه‌ت, له‌وڕا ستێرا شه‌نسێ مه كوردان ژ بوَ بده‌ستڤه‌ئینانا مافێن ڕه‌واێن چاره‌نڤیساز رۆژ ب رۆژێ بلند و گه‌ش دبیت و زلهێزێن جیهانێ هه‌رێما باشۆرێ كوردستانێ ب كاكلكا سه‌ربه‌خوه‌یا كوردان دزانن و پشته‌ڤانی و پشتگیریێ لێدكه‌ن و هه‌رێما كوردستانێ یا بوویه هژماره‌كا سه‌نگین د هه‌ڤكێشه‌ێن ئابووری و سیاسیێن میحوه‌رێ رۆژئاڤا و ئه‌مریكا دا دژ ب ته‌ورێ تیروَرستیا عه‌سكه‌رتارییه‌تا ئۆلپه‌رست و مه‌زهه‌بگه‌رایێ د رۆژهه‌ڵاته‌كا شێلی و تاریدا, ب وێ ئومێدێ كو د نێزیكترین ده‌مدا شاشیێن (سایكس پیكوَ) هه‌مبه‌ری گه‌لێ مه بهێنه ڕاست ڤه‌كرن. بێگومان ماده‌م ئه‌ڤه هزرو بۆچوون و مه‌ره‌مێن مه‌بن, دێ داڕشتنا پیلان و ته‌گبیرێن ژه‌هراوی ژ ئالیێ نه‌حه‌زێن گه‌لێ مه د به‌رده‌وام بن. دا ڤه‌گێڕانه‌كێ ژ بوّ ته‌گبیر و پیلانێن نه‌حه‌زان د ده‌مێ شه‌ڕێ داعش و بۆرینا نێزیكه‌ی ساڵه‌كێ ب سه‌ر شه‌ڕیدا بكه‌ین و بزانین ئه‌ڤ هه‌می پیلانه ل كیش مه‌تبه‌خ و ئاشخانێ هاتینه ئاماده‌كرن و وه‌كی زنجیره‌كێ چه‌ند ب هه‌ڤ گرێداینه و چه‌ند بووینه ئاسته‌نگ ژ بوَ گیرۆبوونا ئارمانجێن گه‌لێ مه؟!. شنگال باژێره‌كێ باشۆرێ كوردستانه و حوكمه‌تا هه‌رێمێ ل په‌ی ده‌ستهه‌ڵات و بودجه‌یا خوه بڕێڤه دبر هه‌ر چه‌ند یێ ڤه‌قه‌تیایی و ماددێ 140 بوو, لێ خاڵا لاواز مه كوردان بوو ژ ئالیێ ئولیڤه له‌وڕا تیروَریستێن داعش د ڤێ خالێدا ئه‌م پڕ ئێشاندین, د هه‌مبه‌ر ئه‌ڤێ برینێ دا نه پێدڤی بوو ده‌ستێن ده‌ره‌كی زێده‌تر برینێن ئێزدی و شنگالیان بكه‌وینن ب كوَنگره و ڕاگه‌هاندنا كانتوَن و چێكرنا عه‌سكه‌ریا (یه. پ. ش) و دامه‌زراندنا حه‌شدا شه‌عبی بوَ كوردێن ئێزدی, د به‌رده‌وامیا پیلان گێریێ, زوَربه‌ی ئه‌ندامێن (ئه. نه. كه. سێ) هاتن ده‌ستگیركرن و ده‌لیڤه نه‌دان ب شێوازه‌ك دیمۆكراسی كارێ پارتاتیا خوه بكه‌ن سه‌رباری هه‌ردو رێكه‌فتنێن هه‌ڤلێر و دهوَكێ, ئه‌ڤه هه‌می ل رۆژئاڤایێ كوردستانێ. ل باشۆر ئانینا حه‌شدا شیعه‌یان بوَ كه‌ركووكێ و ئازراندنا بابه‌تێ ب هه‌رێمكرنا وێ و ئازراندنا پرسا سه‌روَكاتیا هه‌رێمێ و پرسا ده‌ستووری ل ده‌روازه‌ین په‌ڕله‌مانێ كوردستانێ. ل رۆژهه‌ڵاتا كوردستانێ ژی شه‌ڕێ یاساغێ براكوژی ل كێله‌شینێ و له‌شكركێشیا ئیرانێ بۆ سه‌رسنۆرێن هه‌رێمێ, ئیروَ پرسگرێكه‌ك گرنگه و به‌ری نها مه‌سعود بارزانی هوَشداریا پیلانا هه‌لگیرساندنا شه‌ڕێ براكوژی ڕاگه‌هاندبوو. یا گرنگه تفه‌نگێن چیای بێده‌نگ ببن و بێ قه‌ید و مه‌رج و شه‌رت گه‌نگه‌شه ل بن سیبه‌را هه‌رێما كوردستانێ بهێنه كرن.
