دهوك باژێره‌كێ بێ خودان و تژی قه‌یران
ده‌م هات خه‌لكێ دهوكێ خو ل ئاریشێن خو بكه‌ته خودان، چونكی وه‌كی به‌رپرس و سه‌رڤه‌گێر و كاربده‌ستێن مه هه‌ین بتنێ بوَ روَژێن هه‌لبژارتن و ده‌نگدانێ و راكێشانا سه‌ر سندوقان مه دنیاسن، و ب دروشمان خه‌لكێ دهوكێ دخاپینن، هه‌ر چه‌نده خه‌لكێ دهوكێ هه‌تا وی راده‌یی یێ ساده و سكار نینه، به‌لێ وه‌كی كورد دبێژن هه‌ر تله‌كێ ژانا خویا هه‌ی و هه‌ر برینه‌كی ژی هه‌ودانك دڤێت، له‌ورا خه‌لكی مه ب هه‌موو ره‌وش و كاودانێن نه‌خوشێن ڤی باژێرێ بێ خودان رازی دبیت و دكه‌ڤیته خلوه‌تا بێ ده‌نگیێ دا، لێ هه‌ر كاره‌كی نه‌روه‌ا سنوَرێ خوه‌یێ تایبه‌ت هه‌یه و ده‌مێ كێر گه‌هشته سه‌ر هێسكی ئێدی ئه‌و جوویا په‌نگیای دێ په‌قیت و ره‌نگه وه‌كی به‌ری ژی نه‌زڤڕیت..
وه‌كێ نوشدار دبێژن خو پاراستن باشتره ژ چاره‌سه‌ریا، لێ ب مخابنی ڤه سه‌روه‌ر و سه‌ردارێن باژێرێ دهوكێ نه باژێری د پارێزن و نه ل چاره‌سه‌ریا قه‌یرانێن وی دگه‌رن، هه‌روه‌كی یێ دگوهێ گایی دا نڤستین و دبیت هه‌كه ڤێ گوتارێ بخوینن دێ ب توندی به‌ره‌ڤانیێ ژ خو كه‌ن و بیێ دو دلی دێ بێژن ئه‌و گوَتن نه‌یا راسته و ئه‌م ب شه‌ڤ و روَژ نا راوه‌ستین، بیێ كو هزرا هندێ بكه‌ن قه‌یران یا ل دویف قه‌یرانی دنالیت و به‌رێ چاڤێ كه‌سه‌كی ژی ناگریت، ئه‌م هه‌موو دزانین چو وه‌لات و باژێر ل جیهانێ دبێ قه‌یران و ئاریشه نین، هه‌روه‌سا وان قه‌یرانان هنده‌ك كه‌س یێت هه‌ی خو لێ دكه‌نه خودان و هه‌موو ئاسته‌نگان لبه‌ر ناهێلن و راسته‌وخو ل چاره‌سه‌یان دگه‌رن، به‌رپرسێن و كاربه‌ده‌ستێن مه، ده‌مێ توَ پرسا قه‌یرانێ ژ دكه‌ی، بتنێ وه‌كی ته‌یرێ به‌باغی دبێژیت، ئه‌و كارێ به‌رپرسێن ب سه‌ر مه‌دایه و كارێ حوكه‌متێ یه، ئانكو ره‌ڤینا ژ به‌رپرسیاره‌تیێ، ئه‌رێ پرسیاره‌ك بوَ هه‌موو به‌رپرس و رێڤه‌به‌ران ده‌مێ حوكموت ته ده‌ستنیشان دكه‌ت بوَ به‌رپرسیاریێ و برێڤه‌برنا وكارێ دده‌ستێن ته‌دا، بوَچی توَ وی ده‌می باوه‌رناكه‌ی كو دێ بیه به‌رپرس و رێڤه‌به‌ر و دبیت بنێت هاونا دێ كونكه‌ی و هزار واسته و واستكاران ژی دێ گری و قه‌وانا خوه‌یا تایبه‌ت دێ ڤه‌گێری كو بتنێ ئه‌ز بوَ جهی یێ باشم و كه‌سه‌ك ژمن فه‌رتر نینه..
وه‌لات دده‌ستێن خودان وژدان و دلسوَزان دا پێشڤه دچیت و خوینا شه‌هیدان وی ده‌می ئارام دبیت، ده‌مێ هه‌موو شیان و حه‌ز و ڤیان بوَ خزمه‌تكرنا وه‌ولاتیان دهێنه ته‌رخانكرن، به‌روَڤاژی وێ چه‌ندێ هه‌موو گوَتن دورن ژ راستیێ و هه‌موو گوَتن گوڕی كریاره‌كێ بن و سه‌د هوَڕن ژی گوری ئستاپه‌كی بن، برێڤه‌برنا كاری نه‌كاره‌كێ ب سناهی یه كو هه‌ركه‌سك خو ل مه‌یدانا وێ ب هه‌لاڤێت چونكی زه‌لامێن ته‌نگاڤیان زوَر دكێمن و نوكه مه خه‌لكێ دهوكێ پێدڤی بتنێ بوَ زه‌لامان هه‌یه یێن ته‌گاڤیان خو باژێرێ دهوكێ بكه‌نه خودان هه‌كه نه به‌رفره‌هیێ كه‌سێ منه‌ت ب كه‌سكێ دی نینه و هه‌ر ئێك كوڕێ بابێ خو یه..
