دراما و شانۆ د قووناغێن لاواز دا د بۆرن
ئەڤرۆ نیوز:
کچەکا شانۆڤانا کورد کو ئەو ب خوە خەلکا رۆژھەلاتێ کوردستانێ یە، لێ بۆ دەمێ چەند سالانە ل ھەولێرێ دژیت بۆ ئەڤرۆ دیارکر وێ گەلەک ئاستەنگ دەربازکرینە ھەتا شیایی ئارەزویا خوە بجە بینیت و گۆت: بیێ ھونەر ئەز نەشێم بژیم.
لەیلا مەجیدی گۆت: ھەرچەندە ئەز دەرچۆیا پشکا شێوەکاری مە، لێ من گەلەک حەز ل سەر شانۆیێ و فۆتۆی ھەیە و ھەتا نوکە وەکو ئەکتەر من پشکداری دھژمارەکا شانۆگەری و فلماندا کریە، و نوکە وەکو وێنەگر ل سەر ھێزێن پێشمەرگەی دگەریێم و فوتۆیان دگرم.
ھێشتا گۆت: ژبلی کارێ فوتۆی نوکە ئەم مژوولی چێکرنا فلمەکی نە ب ناڤێ (دوەم مێژویا شمشێر) نوکە ل باژێرێ ھەولێرێ دھێتە وێنەکرن و ل ڤان نێزیکان دێ ب دووماھی ھێت، ھەروەسا بەری چەند رۆژان فلمەکێ سینەمایی ژی مە ب دووماھی ئینایە.
دووڤدا گۆت: بەری ھاتنا ھەیڤا رەمەزانێ مە کار ل سەر شانۆگەریەکێ دکر ئەو ژی دقۆناغا دووماھیێ دایە.
ل دووماھیێ گۆت: پێدڤیە پتر گرنگی ب شانۆیێ بھێتە دان چونکو گەلەک مللەت ب شانۆ و دراما و سینەمایێ خوە ب جیھانێ ددەنە نیاسین، لێ مخابن ل کوردستانێ بەرۆڤاژی دراما و شانۆ د قوناغێن لاوازدا دبۆرن و حەتا نوکە مە کێشەیا نڤیسەرێن دەقێن ھونەری ھەیە.
