رێ نادەن ب خوازم
ئه‌ڤرۆ نيوز:
گەنجەکێ ٢٥ سالی فەرمانبەرە بۆ رۆژناما ئەڤرۆ دلێ خوە ڤەدکەت و دبێژیت: ئەز حەز ژ کچەکا مروڤا خوە دکەم ئەو ٢٣ سالە و پەیمانگەە ب دوماھی ئینایە ھەر چەندە وێ ئاگەە ژێ نینە و ھێشتا من ڤیانا خوە بو وێ دیار نەکریە، لێ ژبەرکو من ڤیا ڤی بابەتی دگەل مالا خوە ڤەکەم و پاشی بێژمە وێ کا دێ یا رازی بیت کو شوو بمن بکەت، لێ من ئەڤ بابەتە د گەل مال ڤەکر قەت د رازی نەبوون و گوت خوە چاوان بیت ئەم بۆ تە وێ کچێ ناخوازین ئەوا دەزگرێ وێ نیشانی کری و ھێلایی، ئەڤجا دەست ژێ بەردە، ئاریشە ژی ئەوە کچک بەری دو سالان دابوو کوڕ خالەتێ وێ پشتی چەند ھەیڤەکا ژ بەر کو ھندەک کێشە د ناڤبەرا وان دا پەیدا بوون ھەر د ماوێ دەزگریێ دا ژێکڤە بوون زانین تشتەکێ نورمالە ل دەف من، بەلێ ئاریشە ھەموو خێزانا منە، ئەڤجا ھیڤیە ھوون چ دبێژن و ئەز چ بکەم؟
گەنجێ ھێژا:
باشترە تو ل سەر وان ئەگەرا راوەستی ئەڤێن بووینە ئەگەرێ ھەلوەشاندنا بەری نوکە ژ بەر کو بێ گومان ئەو ئاریشە ژ ئەنجامێ رەفتارەکێ یە و ھزرا خوە بکە تو دێ کاری د گەل کەسایەتیا وێ کچێ گونجی یان نە؟
مخابن د دجڤاکێ مە دا ئەڤ دیتنە ھەبن کو خوە دوور دکەن ژڤان بابەتا و ب چاڤەکێ کێم تەماشەیی وێ کچێ دکەن و ب راستی ماوێ دەزگریێ تێستکرنە بۆ پرۆجێکتێ پێکئینانا خێزانێ و دێ دیار بیت کا دێ یێ سەرکەفتی بیت یان نە، ئەڤجا کارەکێ نورمالە بۆ ھەردولا و نەخاسمە رەفتار و کەساتیا ھەر کەسەکی دیار دبیت ب نێزیکبوونێ ئەڤجا راستیا ھەردوا دیاربیت ل دەف ئێکدو دوور ئاشۆپا ھەردو تێدا دژیان و ژێک ڤەبوونا ڤی دەمی گەلەک باشترە ژ یا پشتی وی دەمی.
پشتی ھەردو خالێن چوویێ باشترە تو وەکو گەنج دڤی ژی دا سەربەخویا وەرگرتنا بڕیارا و ھەردەم ژبیر نەکە رێزێ ل دیتنێن کەسێن دی بگری و نەخاسمە دایکوبابان ژ بەر کو کار گرێدایی تەنە و ژیانا تە و ئایندێ تە لەوما ھەر کارەکێ تە قەناعەکا ئاڤاکری ل سەر بنەمایێن دروست پێ ھەبیت دیتن و بڕیارێن خوە تە ھەبن ئەڤجا ھەول بدە پەیاما خوە ب رەنگەک روون و ئاشکەرا بگەھیننە خێزانا خوە و بەرەف ئارمانجا خوە ھەرە.