پێدڤیه زیاندارێن توپبارانكرنا توركی بهێنه قه‌ره‌بووكرن
ئه‌ڤرۆ نیوز، ئه‌یاد به‌روارى:
ئه‌ندامه‌كێ په‌رله‌مانێ كوردستانێ ل سه‌ر لیستا پارتی دیموكراتی كوردستان راگه‌هاند، پێدڤیه وه‌لاتیێن زیانداربووین ژ توپبارانكرنا توركی ل دووڤ قانوونێن نێڤده‌وله‌تی بهێنه قه‌ره‌بووكرن.
دكتور عه‌دوللا جاسم ئه‌ندامێ په‌رله‌مانێ كوردستانێ كو دوهی ل گه‌ل شانده‌كێ په‌رله‌مانتارێن كوردستانێ سه‌ره‌دانا هنده‌ك ده‌ڤه‌رێن تووشی توپبارانكرنا توركیا بووین كری، بۆ ئه‌ڤرۆنیۆز گوت” مه سه‌ره‌دانا چه‌ندین ده‌ڤه‌رێن تووشی توپبارانكرنا توركی بووین وه‌كو سه‌رگه‌لێ و بنگه‌لێ و هنده‌ك ده‌ڤه‌رێن دی و مه دیت زیانا گه‌هشتیه زه‌ڤیێن چاندنێ یێن گه‌له‌ك وه‌لاتیان و هه‌تا زیان یێن گه‌هشتینه ژێده‌رێن ئاڤێ ژى ل وان گوندان”.
گوت ژى” وه‌لاتیان وان گوندان داخوازدكر په‌كه‌كه ژ گوندین وان دووربكه‌ڤن”.
داخوازكر ژی ” وه‌لاتیێن زیاندار ل دووڤ قانوونێن نێڤده‌وله‌تی بهێنه قه‌ره‌بووكرن ژبه‌ركو زیانه‌كا مه‌زن یا گه‌هشتیه گه‌له‌ك وه‌لاتیان كو زه‌ڤیێن وان یێن چاندنێ ژناڤ چووینه ژ ئه‌گه‌رێ توپبارانكرنا فرۆكان و مه داخوازكریه كو هه‌موو زیانێن وه‌لاتیان بهێنه دیاركرن ل سه‌ر ئاستێ هه‌موو ناحیان ژلایێ قایمقامیا دهۆكێ ڤه دا كو بشێین ل سه‌ر كار بكه‌ین وه‌كو په‌رله‌مانتار ل گه‌ل په‌رله‌مانێ كوردستانێ و جڤاتا وه‌زیران و پارێزگه‌ها دهۆكێ و جڤاتا پارێزگه‌ها دهۆكێ ژبۆ قه‌ره‌بووكرنا وه‌لاتیێن زیاندار.”.