بوچی ئیرانێ ترس ژ پارچه‌بونا عێراقێ هه‌یه؟
ئیران كو ئه‌ڤروكه ئه‌و رێڤه‌به‌ریا جیهانا شیعه‌یان دكه‌ت، خوه وه‌كو جه‌مسه‌ره‌كێ مه‌زن د هه‌ژمێریت دململانه‌یێن سیاسی و مه‌زهه‌بی یێن ده‌ڤه‌رێ و جیهانێ دا، ب واقعی ژی ئه‌ڤ راستیه هاتیه سه‌لماندن، ب وی راده‌ی كو پشتی روخاندنا رژێما دیكتاتوریا به‌عس ل سالا 2003 دا، ئیرانێ ب ته‌مامی خوه بسه‌ر عیراقێدا سه‌پاند، پشتی ڤێ مێژوویێ ژی كومارا ئیسلامییا ئیرانێ وه‌كو هاریكار و پشت و په‌نایا وه‌لاتێ سووریایێ ده‌سته‌لاتا شیعی و هێزێن شیعی یێن حزبوللاه یا لوبنانی و حه‌ماسا فه‌لستینی و بزاڤا شیعه‌یێن به‌حرێنێ و حوسیێن یه‌مه‌نێ ئاماده‌یی و ده‌ست تێوه‌ردان هه‌بو د وه‌لاتاندا، پشتی ڤێ مێژوویێ ب تایبه‌ت پشتی شوره‌شێن بوهارا عه‌ره‌بی، ئیرانێ مفا ژ هه‌لوه‌شاندنا حكومه‌تێن عه‌ره‌بی یێن ده‌ڤه‌رێ وه‌رگرت و كاری ب شێویه‌كێ چڕ و به‌رفره‌ه ده‌ستێ خوه بكه‌ته دناڤا وان وه‌لاتاندا. نها ئیرانێ ده‌ستهه‌لاته‌كا تمام هه‌یه ل سه‌ر چوار پایته‌ختێن عه‌ره‌بی (به‌غدا، دیمه‌شق، به‌یروت، سه‌نعا) و دكاریت بگوره‌ی حه‌ز و سیاسه‌ت و ئایدولوژیا خوه برێڤه ببه‌ت، ئه‌و هیلالێ كو ژ ئیرانێ ده‌ست پێدكه‌ت و دناڤا ئاخا عێراقێدا دچیت تاكو دگه‌هیته سووریایێ و لوێرێ ژی بو لوبنانێ و غه‌زه و سه‌ر ده‌ریا ناڤه‌راست. بێگومان پارچه‌بونا عێراقێ بو سێ هه‌رێمان یان سێ وه‌لاتێن عه‌ره‌بێن شیعه و عه‌ره‌بێن سوننه و كورد، ئه‌ڤه خه‌ونا ئیرانێ ژ ناڤ دبه‌ت ژبه‌ركو ئه‌ڤ دابه‌شكارییه ڕووبه‌رێ جوگرافی و پێگه‌هێ شیعی بچووك دكه‌ت، بڤێ یه‌كێ ژی ڤه‌قه‌تییان و ژێك دوور كرن دێ كه‌ڤیته دناڤا مالا شیعیدا، چونكی هه‌رێما كوردستانێ و هه‌رێما عه‌ربێن سوننه ب ته‌نشت ئێكڤه دێ بنه دراوسێ دگه‌ل سووریایێ و توخیبێ شیعه‌یان ناگه‌هیته سووریایێ. له‌وما بڤێ دیفاكتویێ كو راستییا وێ یا تاله بنێرینا ئیرانێ، له‌و ئیران هه‌موو هه‌ول شییانێن خوه بكار دئینیت پێخه‌مه‌ت وێ یه‌كێ رێكێ ل پارچه‌بون و دابه‌شكرنا عێراقێ بگریت و عێراق وه‌كو ده‌وله‌ته‌كا ئێكگرتی بده‌سته‌لاته‌كا شیعی بمینیت. بو ڤێ مه‌به‌ستێ ئیران هه‌ولا رازیكرنا كورد عه‌ره‌بێن سوننه دده‌ت بو وێ یه‌كێ ده‌سبه‌ردارێن هه‌رێمه‌كا سه‌ربخوه ببن، تا وی ئاستی هه‌ولا به‌رته‌نگكرن و لاوازكرنا هێز و لایه‌نێن كوردی ل هه‌رێما كوردستانێ ل لایه‌كی و هێز و لایه‌نێن عه‌ره‌بێن سوننه ل لایه‌كێ دی داكو هێز و ئیراده‌یا سه‌رخوه‌بونێ ل لایێ ڤان دوو هێزان به‌رته‌نگ و لاواز بكه‌ت، ب هه‌مان شێوه هه‌ولێن چڕ دده‌ت پێخه‌مه‌ت مانه‌ڤه‌یا سووریایه‌كا ئێكگرتی و بتایبه‌تی مانه‌ڤه‌ییا به‌شار ئه‌سه‌د لسه‌ر ده‌سته‌لاتداریێ. لێ هه‌ر چاوان بیت و هه‌ولێن وان هه‌ر چو بن، هاوكێشه‌یێن سیاسی و واقعێ ئه‌ڤرۆ دبێژیته مه كو ئێدی مانه‌ڤه‌یا عێراقێ و بتایبه‌ت سووریایێ ب ئێكگرتی ئه‌گه‌ره‌كێ لاوازه، ئه‌ڤه ژبلی پێشبینیێن شاره‌زا و پسپورێن سیاسی و به‌رپرسێن بالا یێن ئه‌مریكی و روژئاڤای لسه‌ر وێ یه‌كێ كو د پێشه‌روژه‌كا نێزیكدا گوهرین دێ هێنه كرن ل سه‌ر نه‌خشه‌یێ عێراق و سووریایێ و ئێدی وه‌لاته‌ك نامینیت بناڤێ عێراق و سووریا.
