سلاڤه‌ك ژ سازانێ بۆ دایكا من ل گۆڕستانێ
سلاڤ ل گۆرێ ته‌بن دادێ، پشتی تو مری دادێ، په‌رله‌مان مر، حوكمه‌ت مر، حزب مرن، پشتی تو مری دادێ ئه‌م یێ خه‌ونا ب سازانێ ڤه دبینین و هێدێ هێدێ سازان یا دبیته قازان و میر و گر دێ ژێ خۆن و فه‌قیر دێ گویزا ل بن گوهێ خۆ ده‌ن، پشتی ته دادێ كوردستان یا دبیته دارستان و ملله‌ت یێ دبیته ته‌ره‌زان.
پشتی تو مری دادێ دونیا مر، جیهان مر، خه‌لك مر، ئه‌و ده‌نگێ ژ ئه‌سمانی سه‌له‌وات ددان قوت بوو، ئه‌و بالندێ ب ده‌نگێ ئاسمانی ئاواز دخواندن كۆچبه‌ر بوو، پشتی تو مری دادێ په‌یڤان رامانانێن خوه ژ ده‌ستدان و خۆشیێ ئه‌گه‌رێن خوه به‌رزه كرن.
دایكا من مر و دلۆڤانیێ ئامیرێن خوه هه‌رفاندن و كوچه‌ر بوو و بانێ مه كه‌ت و جلك دڕیان و له‌ش رویس بوو.
پشتی تو مری دادێ شه‌ڤێن مه هه‌می به‌هینه و ب تنێ رۆناهیا ستێران دبینین و گلۆپێن مه‌یێن كز بووین و ژیان یا بوویه گۆڕستان. پشتی تو مری دادێ ئه‌م یێن دماینه ب نیڤ په‌رله‌مانی و ب نیڤ حوكمه‌تێ و كه‌ره‌كێ حزبان، نه مه‌ردینی ما و نه ڤیان و نه لێبۆرین، وه‌لات یێ بوویه هه‌ر په‌ز و پێبكا خۆ، نه ئێدی دل ڤیانێ به‌خش دكه‌ن و نه سینگێ مه هێمنیا بێ به‌رامبه‌ر تێدا مایه، هه‌كو تو مری دادێ جه ژی ل ده‌وروبه‌رێن من مر.
سلاڤ ل گیانێ ته‌بن دادێ، هه‌رده‌م ته دگۆته من تو و برایێن خوه ئێك و دو بگرن و پشتا ئێك و دو به‌رنه‌ده‌ن، به‌لێ دادێ هزار ره‌حمه‌ت ل گۆرا ته‌بن من ژ نوو زانی ئێكگرتنا برا چه‌ند یا گرنگه، من ژ نوو زانی ده‌مێ د په‌رله‌مانی دا برا دژاتیا برای دكه‌ت چ ب سه‌رێ ملله‌تی دهێت.
پشتی تو مری دادێ نه‌په‌نیا نهێنیا من مر، تو ئه‌و ماچا خودایی بووی یا ته دانایه سه‌ر ئه‌نیا من و دێمێ من نیشانێن ژیانێ نه‌خشه دكرن، تو ئه‌و قیبلا من بووی یا من هه‌می بارێ دلێ خوه ئاراسته دكرێ، تو مری دادێ ماچ و قیبله هه‌ردو مرن، نه ژیان ما ژیان، ته‌عل و شرین وه‌كهه‌ڤبوون، تاری و رۆناهی یه‌كسان بوون و ئه‌ز ئێدی چو تشتان نابینم.
ژیانا بێ دایك چ رامان هه‌یه؟ بخودێ ئه‌ز مه‌نده‌هۆش دمینم.. چه‌وا زه‌لام ل ژنه‌كێ عاشق دبیت ژ بلی دایكا خوه؟؟؟ پا كا ئه‌و گه‌رما ده‌مه‌كی سه‌رما چیا ژ من دره‌ڤاند، كا ئه‌و زه‌ند و باسكێن ده‌مه‌كی من مێژوویا خوه تێدا دخواند. ئه‌ڤرۆ من زانی بۆچی خودێ كلیلا به‌هشتێ كریه د ده‌ستێ دایكێ دا و به‌هشت كره د بن پێن وێ ڤه، چونكو دایك د ناخێ خوه‌دا به‌هشته، ئه‌و چ شیره‌ته ب سینگێ خوه دایه من و هه‌می پێدڤیێن من د ناڤ دا، خوارن، ڤه‌خوارن، ده‌رمان، هێمنی و سێرا هه‌ڤگه‌هشتنێ، ئه‌ز دزانم ئه‌و شیرێ ژ به‌هشتێ یه.
ئه‌رێ دادێ هزار سلاڤ ل گۆڕێ ته‌بن، ئه‌رێ تو ب تنێ كه‌سه‌ك بووی و ته ئه‌ز فێری هه‌می رامانێن ژیانێ كرم، به‌لێ 111 كه‌س ل په‌رله‌مانی و كه‌ره‌كێ وه‌زیرا و دونیایه‌كا حزبان نه‌شیاینه چپكه‌كا وی شیری ژی بۆ من دابین بكه‌ن، تو چه‌ند یا مه‌زن بووی دادێ؟
ئه‌رێ دادێ ل بیرا منه هه‌می گاڤان ته دگۆته من داووو.. سه سه‌یه به‌لێ ده‌مێ هه‌ستیكان دخۆت هزرا (.. .. .. . ) خۆ دكه‌ت، به‌لێ دادێ ئه‌ڤرۆ هه‌ستیك خوارن یا بوویه رۆژانه و كه‌س هزرا (.. .. .. . ) خۆ ناكه‌ت، دل د سینگان دا یێن بووینه به‌ر، زك یێن بووینه سێزده به‌ر، به‌ریك یێن بووینه ئاڤرێژ، چاڤ یێن بووینه خزمه‌تكارێن پێسیرێ و پێسیر ب شه‌ڤ رۆژ د خزمه‌تێ دایه.
ئه‌رێ دادێ پشتی بابو ژی مری و ماو نه‌ساخ بووی برایێن من سه‌را میراتی لێكه‌فتن، هنده‌كا جیران ئینانه هاری خوه دا پتر مالی ژ برایێن خوه چێكه‌ت و هنده‌كان ژی په‌نا بۆ دادگه‌هێ دبر. ئه‌رێ دادێ هه‌كه بابو یێ ساخ با و مامو ژی ژ نه‌كه‌تیا وێ نه‌خۆشیێ، پشتی 22 دا 24 هێت، ئانكو 23 هه‌یڤێ نه دما د سالنامێ دا. ئه‌رێ دادێ پشتی تو و بابو مرین، هنده‌كا ب ناڤێ خودێ سه‌رێن مه بڕین و هنده‌كا ب ناڤێ خزمه‌تێ نانێ مه خوار، هنده‌كان ژی سینگێ خوه كره مه‌رتال بۆ پاراستنا سنۆرێن مه دادێ و زارۆیێن خوه كرنه سێوێ، دا زارۆیێن هنده‌كێن دی ببنه خفش و غه‌زال و هلباسكی ئاڤاهیێن بلند ببن، زارۆیێن هنده‌كا نان لێ هزره‌ته و زارۆیێن هنده‌كان مال لێ هزره‌ته چونكو ژ به‌ر گه‌شت و گه‌ریانان ناگه‌هن بهێنه مال.
هندی بكه‌م و بێژم دادێ پشتی مرنا ته نه‌خۆشیێن من ب دووماهی ناهێن، ب تنێ دێ بێژم دادێ خوزی تو نوكه یا ساخ بای و ته هنده‌ك شیره‌ت ل سیاسه‌تمه‌داران كربان به‌لكو گه‌هشتبانه سازانێ، به‌لێ نه تو ساخ دبی و نه بابو دژیته ڤه و نه مامو رادبیته‌ڤه و نه ژی برایێن من رێكدكه‌ڤن.
هزار سلاڤ ل گۆرا ته بن دادێ و جهێ ته به‌هشتا به‌رین بیت و ژ به‌هشتێ ژی جهێ ته فیرده‌وس بیت.
