نابیت ھندەک حزب بریارێ ل سەر چارەنڤیسێ مە بدەن
ئەڤرۆ نيوز:
سکرتێرێ حزبا دیموکراتی بێت نەھرێن راگەھاند، سەرۆک بارزانی رەتکر کورسیێن کۆتا ل پەرلەمانی بھێنە کێمکرن و بۆمە دیارکر کو دێ پشتەڤانیا مافێن مە کەت و نە ب تنێ بەرەڤانیێ، بەلکو دێ شەڕی بۆ مافێن ھەوە کەم.
رۆمیۆ ھەکاری سکرتێرێ حزبا دیموکراتی بێت نەھرێن بۆ مالپەرێ فەرمیێ پارتی گوت” د کۆمبوونا د ناڤبەرا سەرۆکێ ھەرێما کوردستانێ و لایەنێن سیاسی دا، بەحس ل پرسا سەرۆکاتیا ھەرێمێ ھات کرن و سەرۆک بارزانی بەحسێ دەستپێکا پەیدابوونا کێشێ کر کو ل ٢٣ خزیرانێ روودای و ھەتا ب ئەڤرۆ گەھشتی”.
رۆمیۆی گوت ژی” ئەم ئێک ژ وان حزبان بووین کو مە دلگرانیا خوە دیارکری کو ھندەک لایەن بەحسێ کێمکرنا کورسیێن کۆتا ل پەرلەمانێ کوردستانێ دکەن، ئەم دژی وێ بۆچوونێ نە و نابیت ھندەک حزب ل شوینا مە بریارێ ل سەر پاشەرۆژا مە بدەن کو مافێ مەیە و مە داخوازکر مافێ پێکھاتان د دستووری دا بھێتە جێگیرکرن، بۆ وێ چەندێ د پاشەرۆژێ دا چو مەترسی ل سەر پێکھاتان نەبیت، سەرۆک بارزانی ژی د بەرسڤا مە دا گوت ئەز پشتەڤانیا مافێن ھەوە دکەم و نەک تنێ دێ بەرەڤانیێ ژێ کەم، بەلکو دێ شەڕی بۆ مافێن ھەوە کەم”.
گوت ژی” سەرۆک بارزانی د کۆمبوونێ دا دیارکر ژی کو پەرلەمانی شەرعیەتا خوە یا ژدەستدای، چونکی کارێ پەرلەمانی و سەرۆکێ پەرلەمانی کارەکێ حزبی بوو نەک کارەکی پەرلەمانی و ناچینە وی پەرلەمانی ھەتا خۆلەکا دی یا پەرلەمانی دھێتە ھەلبژارتن، ژ بەر کو پەرلەمانی نەشیا بابەتی ئێکلا بکەت و چارەکێ بۆ کێشێ ببینیت، ئانکو چارەکرنێ کێشێ کەفتە دەرڤەی ھۆلا پەرلەمانی”.
