ئەڤرۆ فیستیڤالا کەلتۆر و پێکڤەژیانێ دێ ل دەڤەرا ئامێدیێ د ھێتە گێران
ئه‌ڤرۆ نيوز:
ئەڤرۆ رۆژا ئێکشەمبی رێکەفتی ٢٠-٩-٢٠١٥ سێیەمین فیستیڤالا کەلتۆری و پێکڤەژیانێ ل دەڤەرا ئامێدیێ ل ژێر درووشمێ (کەلتۆر و پێکڤەژیان ل میرگەھا بادینان) ژلایێ رێڤەبەریا گشتی یا رەوشەنبیری و ھۆنەری_دھۆک، رێڤەبەریا رەوشەنبیری و ھونەری_ئامێدیێ و ب ھەڤکاریا رێکخراوا یونسیڤ ل دەمژمێر ٢:٣٠ پشتی نیڤرۆ ل یاریگەھا ئامێدیێ یا وەرزشی ل بانیا مێرستەکێ دێ ھێتە گێران.
نەورۆز شەعبان رێڤەبەرێ رەوشەنبیری و ھونەری ل ئامێدیێ بۆ رۆژناما ئەڤرۆ خویا کر پێکڤەژیانێ ل دەڤەرا ئامێدیێ وەکریە کو ئەو ڤێ فیستیڤالێ رێک بێخن، ژبەرکو ھەر دەڤەرەکێ تایبەتمەندیا خوە ھەیە و دەڤەرا ئامێدیێ ژی ب کەلتۆری و پێکڤەژیانا ئۆلی ب یا ناڤ و دەنگە و ئەڤ فیستیڤالە ب پشتەڤانیا رێکخراوا یونسیڤ دێ ھێتە گێران و گۆت “بەری نوکە دو فیستیڤالێن دی ل سالێن ٢٠٠٦ و ٢٠٠٧ ھاتینە گێران و ئەڤ ناڤێ ئەڤ سالە مە ل سەر دانای بۆ ھندێ بوویە کو ببیتە فیستیڤالەکا سالانە ل ڤێ دەڤەرێ، لەورا بریار ھاتیەدان کو ئەڤ فیستیڤالە سالانە ل دەڤەرا ئامێدیێ بھێتە گێران و ئەم یێ کار دکەین بۆ سالا بھێت کو ل سەر ئاستێ ھەرێمێ ڤێ فیستیڤالێ بکەین و د ئایندەیدا مە ل بەرە ڤێ فیستیڤالێ بەرفرەە بکەین و ببیتە فیستیڤالەکا نێڤدەولەتی”.
ھەروەسا رێڤەبەرێ رەوشەنبیری و ھونەری ل ئامێدیێ گۆت “ئەم گرنگیێ پتر ب لایەنێ کەلتۆری و پێکڤەژیانێ ددەین و چەندین برگێن پێکڤەژیانێ دێ ھێنە نیشادان و د ناڤا فیستیڤالێ دا دێ سترانێن فلکلۆری یێن کوردی و سریانی و عەرەبی و سترانێن چەند دەڤەرێن دی دێ ھێنە گۆتن”.
نەورۆز شەعبان دیار کر کو وەکو پێدڤی خزمەت بۆ دەڤەرا ئامێدیێ نەھاتیە کرن، لەورا مە وەک سازیێن رەوشەنبیری ل ڤێ دەڤەرێ ھزر ل ھندێ کر کو فیستیڤالەکا سالانە رێک بێخین کو خەلک سەرەدانا ڤێ دەڤەرێ بکەن و ئەڤ چەندە دێ بیتە پالپشتیەک و ژێرخانەکا ئابووری بۆ خەلکێ ڤێ دەڤەرێ و گۆت “مە دڤێت ئەو کەلتۆرێ ھندە سالان ڤەشارتی نیشا خەلکێ بدەین، سەرەرای ھەبوونا کریزا ئابووری، لێ خەلکێ مە شیایە خۆبەشخانە ھاریکاریا مە بکەن بۆ سەرخستنا ڤێ فیستیڤالێ”.
