حەفت ھەیڤە بۆدجە و فەرمانبەر بۆ باژێرڤانیەکێ نەھاتینە دابینکرن
ئەڤرۆ نيوز:
رێڤەبەرێ ناحیا بجیل بۆ رۆژناما ئەڤرۆ دیار کر کو ئەڤە حەفت ھەیڤە باژێرڤانیا گوندێ کەلاتێ ھاتیە ڤەکرن و حەتا نھا ئاڤاھی و فەرمانبەر بۆ نەھاتینە دابینکرن.
بروا فاروق سەعید رێڤەبەرێ ناحیا بجیل خویا ژی کر کو ژ بلی ئاڤاھی چ بۆدجە ژی بۆ باژێرڤانیا گوندێ کەلاتێ نەھاتینە مەزاختن و گۆت “ل دەستپێکا ڤەکرنا ڤێ باژێرڤانیێ داخوازا ١٥ فەرمانبەران بۆ ھاتبوو کرن کو پێدڤینە و حەتا نھا بەس سەرۆکێ باژێرڤانیێ دەست بکار بوویە بێ فەرمانبەرو بۆدجە”.
رێڤەبەرێ ناحیا بجیل ئاشکرا ژی کر کو رۆژانە ترۆمبێلێن باژێرڤانیا بجیل سەرەدانا وی گوندی دکەن ژ بۆ راکرنا بەرمایکێن وان ھەر وەکی چ باژێرڤانی ل وێ دەڤەرێ نەھاتینە ڤەکرن و گۆت “داخوازێ ژ لایەنێن شولەژێ دکەین فەرمانبەر و بۆدجە بۆ باژێرڤانیا کەلاتێ بھێنە دابینکرن، داکو وەکو ھەموو باژێرڤانیێن دی خزمەتا دەڤەرێ بکەت”.
ھەروەسا بروا فاروق سەعید رێڤەبەرێ ناحیا بجیل گۆت “گوندێ کەلاتێ مەزنترین گوندە ل دەڤەرا بجیل لەوما ڤەکرنا باژێرڤانیێ گەلەک یا پێدڤی بوو بەس حەتا نھا ژ بەر وان ئەگەرێن مە دیار کرین وەکو پێدڤی کارێ خوە ل دەڤەرێ نەکریە”.
