ئەڤرۆ تەرمێن سێ گەنجێن ئێزدی دێ گەھنە کوردستانێ
ئه‌ڤرۆ نيوز:
بەرپرسێ راگەھاندنا بنگەھێ لالش یێ کۆمەلایەتی و رەوشەنبیری دیار کر کو ژڤانە ئەڤرۆ ٧-١٠-٢٠١٥ تەرمێن سێ گەنجێن ئێزدی کو ل گەل ٧٢ کەسێن دی ژ بولگاریا بەر ب نەمسا دچوون و د ترۆمبێلا کامیون دا خەندقین، بگەھنە ھەرێما کوردستانێ.
جەعفەر سمو بەرپرسێ راگەھاندنا بنگەھێ لالش یێ کۆمەلایەتی و رەوشەنبیری بۆ رۆژناما ئەڤرۆ خویا کر ل دووماھیا ھەیڤا ھەشت د ناڤبەرا ٢٦ ھەتا ٢٨ ئەوێ ترۆمبێلێ گەلەک کۆچبەر ھەلگرت بوون و قەچاغچی ژ بولگاریا دبرنە نەمسا، ژ نەبوونا ئوکسجینی ٧٢ وەلاتی تێدا خەندقین و گۆت “ئەو ھەرسێ گەنجێن ئێزدی خەلکێ کۆمەلگەھا خانکێ نە”.
بەرپرسێ راگەھاندنا بنگەھێ لالش یێ کۆمەلایەتی و رەوشەنبیری ئاشکرا ژی کر کو ناڤێن وان (ئەلند و ئێلین و ھێرش) کو دو خویشک و برانە و ئێک مامێ وانە و خەلکێ کۆمەلگەھا خوانکێ نە سەر ب قەزا سێمێلێ ڤە و گۆت “ژڤانە ئەڤرۆ ٧-١٠ ل فرۆکخانا ھەولێرێ و دەمژمێر ٣ ئێڤاری د رێورەسمەکێ تایبەت دا پێشوازی ل جەنازێن وان بھێتەکرن”.
