رێكخراوێن جڤاكێ مه‌ده‌نى ل دهۆكێ به‌ياننامه‌ك به‌لاڤكر
ئه‌ڤرۆ نيوز:
رێكخراوێن جڤاكێ مه‌ده‌نى ل دهۆكێ به‌ياننامه‌كێ ل دۆر ره‌وشا نوكه يا پارێزگه‌ها سلێمانيێ به‌لاڤ دكه‌ن و ئاماژێ ب وێ چه‌ندێ دكه‌ن كو وه‌لات يێ د ناڤ كۆمه‌كا قه‌يرانان را ده‌بارز دبيت و يا ژ هه‌موويان به‌رچاڤتر شه‌رێ داعشه، ژ به‌ر هندێ ژى دڤێت ئێكرێزيا خوه ب پارێزين.
هه‌ر د به‌يانناما وان دا ئاماژه ب وێ چه‌ندێ كريه كو ئه‌و پشته‌ڤانيا گرتنه به‌را هه‌موو رێيێن مه‌ده‌نى دكه‌ن، د هه‌مان ده‌م دا دژى هه‌ر رێيه‌كا ب توندوتيژى نه و دخوازن ئه‌ڤ توندوتيژيه بهێنه راوه‌ستاندن.
به‌ياننامه
رێكخراوێن جڤاكى مه‌ده‌نى ل سنورێ پارێزگه‌ها دهوكێ
د ده‌مه‌كیدا كوردستان دبارودوخه‌كێ گه‌له‌ك نازك و نا له بار دا ده‌رباز دبیت و كومه‌كا قه‌یران ب خوڤه دگریت یا ل هه‌مویان ژى به‌رچافتر روو ب رو بوونا شه‌رێ تیروستێن داعشه و دیسان قه‌یرانا نه چاڤه‌رێكریا دارایى و هه‌بونا زێده‌تر ل (1500000) ملیونه‌ك و پینچ سه‌د هزار په‌نابه‌رو ئاواران د هه‌مان ده‌م دا ئه‌ڤه بۆ ماوێ (3) هه‌یڤانه زێده‌تر مووچێ فه‌رمانبه‌ران نه‌هاتیه دان و سه‌ر ئه‌نجام ئاریشێن جڤاكى و جوراو جور لێ په‌یدا بوینه ژ به‌ر ئه‌ڤێ چه‌ندێ و بۆ ئه‌ڤێ قوناغێ ئێك رێزى و ئێكگرتنا ناڤ مالا كوردى و كوردستانێ ل هه‌ر ده‌مه‌كێ دى پێدڤى تره .
مه چاڤه‌رێ دكر كو هه‌موو لایه‌نێن سیاسى ب په‌رله‌مان و حكومه‌ت ڤه هه‌ول بده‌ن بۆ ده‌ربازبوونا هه‌رێما كوردستانێ ژ ڤان قه‌یرانان ب تایبه‌ت ژى په‌یداكرنا مووچێ فه‌رمانبه‌ران چونكه فه‌رمانبه‌ر ته‌خه‌كا ناڤنجى نه و ژیانا وان گرێدایى مووچێ هه‌یڤانه‌یه .
د گه‌ل هندێ دا ئه‌م وه‌كو رێكخراوێن جڤاكى مه‌ده‌نى ل سنورێ پارێزگه‌ها دهوكێ پشته‌ڤان و پالپشتیا مافێن ره‌وایێن خه‌لكینه و ب تایبه‌ت ژى كو ب رێكێن مه‌ده‌نى و دیموكراسى و دوور ل توندوتیژى داخوازا مافێن خو بكه‌ن و ده‌ستهه‌لات ژى به‌رسڤا دروست و قانع بۆ هه‌بیت .
ئه‌ڤ قوناغا هه‌ستیار رێكێ ناده‌ت ئه‌م ب توندوتیژى داخوازا مافان بكه‌ن. به‌لكو به‌روڤاژى ئه‌ڤ چه‌نده دێ بیته جهێ دلخوشیا دوژمن و نه حه‌زو نه‌یارێن خه‌لكێ كوردستانێ . دیسان دێ بیته جهێ دلگرانى و نه ئارامیا پیشمه‌رگه‌هێن قاره‌مان ل سه‌نگه‌ران.
ژ به‌ر هندێ هه‌ر چ زوویه دڤێت:
1- لایه‌نێن سیاسى ب دیالوك ئاریشا سه‌روكاتى یا هه‌رێمێ و ئاریشێن دى چاره‌سه‌ر بكه‌ن.
2- حكومه‌ت هه‌ول بده‌ت به‌رسڤه‌كا راست و ره‌وا بۆ خوپیشانده‌رێن راسته‌قینه هه‌بیت.
3- ئه‌م ب هه‌موو ره‌نگان دژى هه‌ر كارو كریاره‌كا توندوتیژى نه، ب ئه‌ڤێ ره‌نگى بتنێ دوژمن مفادارن ژ به‌ر هندێ دڤێت ئه‌ڤ توندوتیژیه بهێته راوه‌ستاندن.
4- داخوازێ دكه‌ین كو هه‌موو هاوه‌لاتیێن كوردستانێ ب رێكێن مه‌ده‌نى و شارستانى و ئاشتى داخوازا مافێن خویێن ره‌وا بكه‌ن،دوور ژ كه‌لتورێ هێرشكرنا سه‌ر باره‌گایێن لایه‌نێن سیاسى و مالێ گشتى و سه‌روسامانێ خه‌لكى و ده‌زگه‌هێن راگه‌هاندنێ.
5- داخوازێ دكه‌ین كو ئه‌و قه‌یران و ئاریشێن سیاسى ئه‌وێن هه‌ین ژێك بهێنه جوداكرن و ڤاڤارتن داكو به‌رچاڤ روونى بۆ هاوه‌لاتیان ژى هه‌بیت.
6- داخوازێ ژ لایه‌نێن سیاسى دكه‌ین هێرش و تومه‌تان ل سه‌ر ئێك و دوو راوه‌ستینن و زێده‌تر به‌ره‌ڤ لێبورین و هه‌ڤ قه‌بولكرن و دیالوكێ بچن.
7- داخوازێ ل هه‌موو ده‌زگه‌هێن راگه‌هاندنێ دكه‌ین كو به‌رپرسانه و پیشه‌یانه و سه‌ره‌ده‌ریێ دگه‌ل هه‌ر روماله‌كێ بكه‌ن،چونكه وان كاریگه‌ریه‌كا راسته‌وخو ل سه‌ر خه‌لكى هه‌یه.
8- داخوازێ ل هه‌موو ده‌زگه‌هێن ئێمناهیێ دكه‌ین ژ پولیسێن چالاكیێن مه‌ده‌نى و ئاسایشێ كو ب ره‌نگه‌كێ وه‌لات پارێزى هه‌ول بده‌ن گیانێ هاوه‌لاتیان و مالێ گشتى ب پارێزن . دگه‌ل رێزگرتنێ
رێكخراوێن جڤاكى مه‌ده‌نى ل سنورێ پارێزگه‌ها دهوكى
11/ 10 / 2015
