ئەڤرۆ نیوز مەترسیەکا مەزن ل سەر کوردان ئاشکەرا دکەت
ئەڤرۆ نیوز:
ئالۆزیێن قەزا خورماتوو پتر د ناڤبەرا کورد و تورکومانێن شیعی یێن دەڤەرێ دانە، چونکی ھژمارەکا مەزن یا ئاکنجیێن خورماتوو تورکومانێن شیعەنە و کەسایەتیەکێ تورکومان ژی رادگەھینیت، تورکومانێن کەرکووکێ و خورماتوو پتر ل گەل شیعەیێن عیراقێ نە و ل دەف وان مەزھەب بەری نەتەوێ دھێت و ھەتا نوکە نێزیکی ٤٠ وەلاتیێن تورکومان یێن بووینە قوربانی.
عیماد رەفعەت، رەوشنبیر و کەسایەتیێ تورکومان بۆ رۆژناما ئەڤرۆ گوت” ئاریشەیا تورکومان و کوردێن قەزا خورماتوو ئاریشەیێن مەزھەبی نە و چو پەیوەندی ب نەتەوا تورکومان ڤە نینە، چونکی ئەڤە چەندین سالە ل ھەرێما کوردستانێ، تورکومان ب ئازادی دژین و برایەتیەکا ب ھێز د ناڤبەرا نەتەوێن ھەرێما کوردستانێ یا ھەی، ئەوا ل خورماتوو د ناڤبەرا کورد و تورکومانان دا چێبووی پتر ئاریشەیەکا مەزھەبی یە و تورکومانێن کەرکووکێ و خورماتوو پتر مەزھەبێ شیعەنە و ھزرا مەزھەبی پتر کاریگەری یا ل سەر وان ھەی، نەکو ھزرا نەتەوی، ھەتا ژلایێ جڤاکی ڤە پتر کاریگەریا عەرەب و شیعان ل سەر تورکومانێن وێ دەڤەرێ یا ھەی ھەر ژ جلکا ھەتا ئاخڤتن و ھەلویستێ سیاسی ژی، گۆرەی ئامارێن مە ھەین، ب ئەگەرێ ئالۆزیێن خورماتوو، ھەتا نوکە ٩ وەلاتیێن تورکومان یێن ھاتینە کوشتن و ٣٠ وەلاتی ژی یێن برینداربووین و ١٨ خانیێن تورکومانان یێن ھاتینە سووتن، بەلێ ھەلویستێ مە وەکو تورکومانێن ھەرێما کوردستانێ یێ رۆھنە و ئەم دژی ھەر ئالۆزیەکێ یێن راوەستیاین ب تایبەتی ل گەل کوردان، ژ بەر کو مە دیرۆکەک پێکڤە یا ھەی و ھەتا ل ھەلبژارتنێن بۆری دا تورکومانێن شیعە دەنگ نەدایە لیستێن تورکومانی، بەلکو داینە لیستێن شیعی، ئەڤە ژی نیشانا مەزھەب گەرایە ل دەڤ تورکومانێن شیعە مەزھەب”.
عیمادی گۆت ژی” ھندەک لایەنێن ناڤخوە و دەولەتێن دەوروبەر، تورکومانێن عیراقێ بۆ خوە بکاردئینن، ئەم سێ ملیۆن تورکومانین ل سەرانسەری عیراقێ، ھێشتا مە پۆستەکێ سیادی ل بەغدا نینە، ئەڤە ژی ب ئەگەرێ ناکۆکیا د ناڤبەرا لایەنێن تورکومانە، بۆ نموونە ل کەرکووکێ کوردان سەرۆکێ جڤاتا پارێزگەھێ دایە تورکومانان، بەلێ مخابن تورکمان دناڤ خوەدا رێککناکەڤن، ئەڤ پرت و بەلاڤیا تورکومانان و بکارئینانا وان ژلایێ سەرکردێن عیراقێ و دەولەتێن دەوروبەر، زیانێن مەزن گەھاندینە پرسا تورکومانی ل عیراقێ و چو مفا نەبووینە، بەری چەند رۆژان شاندەکێ تورکومانێن ھەولێرێ سەرەدانا نڤیسینگەھا عەشایەرێن تورکومان ل کەرکووکێ کریە و ھەلویستێ تورکومانێن ھەرێما کوردستانێ داینە وان و ب رۆھنی مە گۆتیێ، ئەڤ رەوشە د بەرژەوەندیا گەلێ تورکومان دا نینە و دێ زیان ھەبن بۆ نەتەوا تورکومان، چونکی ل دەف مە چو جوداھی د ناڤبەرا گەلێ کورد و گەلێ تورکومان دا نینە، تنێ ل ھەولێرێ ١٣ قوتابخانێن زمانێ تورکومانی یێن ھەین، چەندین پۆستێن گرنگ مە یێن وەرگرتین و بزاڤ دھێنەکرن کو سەرکردایەتیا کوردی و حوکمەتا ھەرێما کوردستانێ پۆستێن پتر بدەنە تورکومانان، لەوما دبەرژەوەندیا تورکومانان دایە ب رێککەفتن ئاریشە بھێنە چارەسەرکرن و گوھێ خوە نەدەنە ھندەک کەس و لایەنێن دخوازن تورکومانان بەر ب شەڕەکێ مەزھەبی و نەتەوی ببەن”.