قاسم شه‌شۆ گه‌فا دكه‌ت
ئەڤرۆ نیوز:
فەرماندەکێ پێشمەرگەی ل شنگالێ راگەھاند، ئەو ھێزێن پشتی ئازادکرنا شنگالێ ھاتینە دناڤدا، ئاڤاھیێن حکومی یێن داگیرکرین و چۆل ناکەن و ل دووڤ رێنمایێن حەشد شەعبی دلڤن و مووچیە ژ وان وەردگرن، قایمقامێ شنگالێ ژی دبێژیت یەپەکە یا د ھەفت ئاڤاھیێن حکومی ڤە ل شنگالێ و چۆل ژی ناکەت.
قاسم شەشۆ ئێک ژ فەرماندێن پێشمەرگەی ل شنگالێ دیارکر، پشتی ئازادکرنا شنگالێ ژ تیرۆرستان ژلایێ پێشمەگەی ڤە، ھندەک ھێز یێن ھاتین دناڤ باژێری دا و ئاڤاھیێن حکومی یێن داگیرکرین و د بەرھەڤ نینن چۆل بکەن، ئەو یێن ژ وەلاتەکی دی ھاتین و دخوازن ئیرادا خوە ل سەر شنگالیان ب سەپینن، ئەگەرێ چۆلنەکرنا وان ئاڤاھییان ئەوە کو دخوازن دەستێوەردانێ د کاروبارێن ناڤخوەیێن شنگالێ دا بکەن و رەوشا دەڤەرێ ئالۆز بکەن”.
شەشۆی گوت ژی” ئەو ھێز ل دووڤ رێنمایێن حەشد شەعبی لڤینان ل دەڤەرێ دکەن و مووچێن وان ژی حەشد شەعبی ددەت ب مەرەما تێکدانا رەوشا دەڤەرێ و پێدڤیە ھەموو لایەن پێگیری بریارێن حوکمەتا ھەرێما کوردستانێ و ئیدارا دەڤەرێ بنو ب خوەشی چۆل بکەن، ھەکە نە، پێدڤیە ب نەخوەشی بچنە دەرڤە”.
وی فەرماندێ پێشمەگەی ل شنگالێ گوت ژی” ئەم وەکو کوردێن ئێزدی تنێ ئێک ئالای دنیاسین، ئەوژی ئالایێ کوردستانێ و ئالاییچ ھەموو کوردستانیانە، ھەروەسا ل بن وی ئالای شنگال ھاتە ئازادکرن، لەوما ڕێ ب چوو ھێز و لایەنەکی نادەین بێرێزیێ بەرامبەر ئالایێ پیرۆزێ کوردستانێ بکەت”.
ژلایێ خوەڤە مەحما خەلیل قایمقامێ شنگالێ گوت” پشتی ئازادکرنا شنگالێ ل ١٣ ڤیچ مەھێ، ھەر زوو ھندەک ژ حزبان چوونە دناڤ فەرمانگەھێن حوکمەتێ دا و کرنە بارەگایێن حزبی، جڤاتا پارێزگەھا نەینەوا ژی داخوازا چۆلکرنا ١٣ فەرمانگەھێن شنگالێ دکەت کو بووینە بارەگایێن حزبی”.
ئەو مۆلەتا جڤاتا پارێزگەھێ دایە حزبان کو فەرمانگەھێن حکومی چۆلبکەن دوھی سێشەمبی ب دووماھی ھات، بەلێ یەپەکێ بریار بجە نەئینایە و فەرمانگەھێن حوکمەتێ ل شنگالێ چۆل نەکرینە”.
مەحما خەلیلی بۆ رووداوێ گوت” چار ئاڤاھیێن حکومی ددەستێ ھێزێن پارتی دابوون، دەمێ مە داخوازا چۆلکرنێ ژێ کری، وان چۆلکر، بەلێ ھەفت ئاڤاھیێن حکومی یێن ددەستێ ھێزێن یەپەکێ دا و ھەتا نوکە چۆل نەکرینە”.
شێخ شامۆ: دخوازین شنگال ببیتە موزەخانە
ھەتا نوکە ١٢ گۆرێن ب کۆم یێ ھاتینە دیتن
ئەڤرۆ، سالار دۆسکی:
نوونەرێ کوردین ئێزدی ل پەرلەمانێ کوردستانێ دخوازیت شنگال نەھێتە ئاڤاکرن، بەلکو ب ڤی رەنگێ نوکە بیت و وەکو خوە بمینیت و ببیتە، د ھەمان دەم دا بەحسێ پلانەکا نوو یا سەرۆکێ حوکمەتا ھەرێما کوردستانێ دکەت.
شێخ شامۆ ئەندامێ پەرلەمانێ کوردستانێ ژ فراکسیۆنا پارتی دیموکراتی کوردستان بۆ رۆژناما ئەڤرۆ گۆت” دیتنا مە ئەوە شنگال وەکو باژێرەکێ وێرانکری ژلایێ تیرۆرستێن داعشێ ڤە، وەکو خوە بمینیت و بیتە موزەخانە دا ھەموو جیھان بزانیت ڤان تیرۆرستێن درندە چ ب سەرێ ڤی باژێری ئینایە و شنگال بیتە ھێمایێ زورداریێ ل دژی مللەتێ کورد”.
شێخ شامۆی ھێشتا ژی گوت”دوبارە ئاڤاکرنا باژێرێ شنگالێ گەلەک یا ب زحمەتە، مە دڤێت شنگال ب ڤی رەنگە نوکە بمینیت، دا پتر ببیتە جھێ سرنج ڕاکێشانا جیھانی و خەلکێ درڤە سەرەدانا ڤی باژێری بکەن و ب چاڤێن خوە ببینن کا تیرۆرستێن داعشێ یێن دژی مرۆڤایەتیێ چ ل شنگالێ کریە و ئەو وێرانکاریێن ل شنگالێ کرین ببنە بەلگێن بەرچاڤ ل سەر ئەردی”.
نوونەرێ کوردێن ئێزدی ل پەرلەمانێ کوردستانێ خویاکر ژی” پتر ژ ٧٠% ژ باژێرێ شنگالێ ھاتیە وێرانکرن و کاڤلکرن، دیسان ھەتا نوکە گەلەک کومەلگەە و گوند و جھێن پتر زیان ڤێ کەفتین و تایبەت باشوورێ شنگالێ یێن دبن دەستێ داعشێ دا”.
گوت ژی”گەلەک زیان یێن گەھشتیە کوردێن ئێزدی ل دەڤەرێن(گرعزێر، کۆچ، سیڤا، تەل بەنات و تەل قەسەب) کو ئەڤە ھەموو کومەلگەھێن مەزنن و ھەتا نوکە نەھاتیە پاقژکرن ژ داعشێن تیرۆرست”.
ل دووڤ بۆچوونا شێخ شامۆی” ئەم ھێشتا یێن د قۆناغا ئازادکرنێ دا ل شنگالێ، حوکمەتا ھەرێما کوردستانێ پلان یا ھەی بۆ ئاڤاکرنا شنگالێ، دیسان سەرۆکێ حوکمەتا ھەرێما کوردستانێ (نێچیرڤان بارزانی) دپەیامەکا خوە دا ل گومەلکەھا دێرەلۆکێ ژی ئاماژە کرە وێ چەندێ کو حوکمەتا ھەرێمێ بەرنامە یێ ھەی بۆ داخوازکرنا جڤاکێ نێڤدەولەتی و عیراقێ و جیھانێ کو پشکداریێ د پرۆسا ئاڤاکرنا ڤی باژێرێ دا بکەن و ئەم ب ھیڤی نە سەرۆکێ حوکمەتێ پلانەکا باش و سەرکەفتی بۆ ئاڤاکرنا ڤی باژێری ھەبیت و بۆدجەکا باش بۆ بھێتە تەرخانکرن”.
ئەندامێ پەرلەمانێ کوردستانێ ژ فراکسیۆنا پارتی دیارکر ژی” یا فەرە ل سەر حوکمەتا عیراقێ ژی رۆلێ خوە د ئاڤاکرنا شنگالێ دا بگێریت، چونکی ھەتا نوکە ژلایێ ئیداری ڤە یا سەر ب پارێزگەھا نەینەوا ڤە و گرێدای مادێ ١٤٠ ێ یە و پێدڤی یە سازیێن حوکمەتا ھەرێما کوردستانێ فشارێ بێخنە سەر حوکمەتا بەغدا کو رۆلێ خوە د دوبارە ئاڤاکرنا شنگالێ دا بگێریت”.
ل دۆر گۆرێن ب کۆم یێن گوردێن ئێزدی ل دەڤەرا شنگالێ، شێخ شامۆی گوت” ھەتا ١٢ گۆرێن ب کۆم یێن ھاتینە دیتن و سێ گۆر ژوان د نوو بوون و پێشبینی دھێتەکرن کو ھێشتا گۆر ب کۆم دەربکەڤن”.
غیاس سورچی بۆ ئەڤرۆ:
سالا داھاتی ژی مووسل ناھێتە ئازادکرن
دەزگەھێن ئەمنی یێن کوردستانێ شیاینە ل نیڤا مووسل ل داعش بدەن
ھەولێر، قائید میرۆ
بەرپرسەکێ کورد ل پارێزگەھا نەینەوا بەحسێ رەوشا باژێڕێ مووسل و کاریگەریێن ئازادکرنا شنگالێ ل سەر رێکخستیا تیرۆرستیا داعشێ دکەت و ئاشکراکر، دەزگەھێن ئەمنی یێن ھەرێما کوردستانێ شیاینە گورزەکا کۆژەک ل تیرۆرستێن داعشێ بدەن ل ناڤا سەنتەرێ مووسلێ.
غەیاس سورچی، پەیڤدارێ مەلبەندێ ئێکەتی نیشتیمانی کوردستان ل نەینەوا بۆ رۆژناما ئەڤرۆ گۆت” ئازادکرنا قەزا شنگالێ ژلایێ ھێزێن پێشمەرگەی ڤە، کاریگەریەکا مەزن کریە سەر گروپا تیرۆرستیا داعشێ ل باژێڕێ مووسل، ئەم ئاگەھداری ھووردەکاریێن رەوشا وەلاتیێن مووسلین، پشتی ئازادکرنا شنگالێ و جادا ٤٧ یا نێڤدەولەتی، ھاتنوچوونا داعشێ بۆ سووریێ گەلەک یا ب زەحمەت کەفتی و تنێ ھندەک ڕێیێن ماین کو گەلەک ددورن بۆ ھاتنوچوونێ، ھەروەسا ناڤا رەوشا باژێڕێ مووسلێ ژی خرابتربوویە و ئەڤە چەند رۆژەکە بھایێ ئێک بۆتلێ غازێ یێ گەھشتیە ١٢٠ ھزار دیناران، گۆرەی پێزانینێن مە نێزیکی ھزار و ٥٠٠ مالێن کورد ل مووسل ماینە و نێزیکی ١٠٠ وەلاتیێن کورد چەکدارێن تیرۆرستێن داعشن، بەلی َھەتا نوکە داعش باوەری ب کوردێن داعش ناھێت و پۆستێن گرنگ ب وان نادەن ، ھندەک گروپێن چەکدار یێن ھەین شەڕێ داعشێ دکەن، ئەڤ گروپ سەر ب دەزگەھێن ئەمنی یێن ھەرێما کوردستانێ و یێن عیراقێ نە، چونکی مە پێزانین یێن ھەین کو جڤاتا ئاسایشا ھەرێما کوردستانێ چەندین پرۆسێن ئەمنی ل ناڤا مووسلێ ئەنجامداینە و ھژمارەکا تیرۆرستێن داعشێ د وان و ئەڤ چەندە جھێ دەستخوەشیێ یە”.
غیاسی گۆت ژی” کونترۆلکرنا مووسلێ گەلەک یا ب زەحمەتە و حوکمەتا عیراقێ ئەو شیان نینن مووسلێ ئازاد بکەت، چونکی حەیدەر عەبادی سەرۆک وەزیرێن عیراقێ راگەھاندبوو، پشتی ئازادکرنا رومادی، دێ شەڕێ ئازادکرنا مووسلێ دەستپێکەت، مخابن ھێشتا رومادی نەھاتیە ئازادکرن ژلایێ لەشکرێ عیراقێ ڤە، ھەکە بۆ سالا داھاتی ژی عیراق بشێت مووسلێ ئازاد بکەت، گەلەک باشە، ژ بەر کو ئەم دزانین شیانێن ھێزێن عیراقێ چەندە و ھزاران سەربازێن عیراقی ل مووسلێ بوون و نەشیان دو رۆژان بەرسینگا داعشێ بگرن”.
گوت ژی” پتریا داعشێن مووسلێ کەڤنە بەعسی و قاعیدەنە و نوکە یێ تولا ڤەدکەن و دەمێ ھاتینە مووسل تنێ ھزار چەکداربوون، نوکە ب ھزاران بەعسی یێن بووینە داعش، وەسا باشە کورد پشکداریێ د ئوپەڕاسیۆنا ئازادکرنا مووسلێ دا نەکەن، ھەتا عیراق بزانیت شیانێن پێشمەرگەی چەندن و شیانێن لەشکرێ وان یێ کو چەک و چوبەخانە رادەستی تیرۆرستان کرین چەندە، راستە ب شێوەکێ گشتی داعش ل سەردەستێ ھێزێن پێشمەرگەی شکەستن ئینایە، بەلێ تێرا لەشکرێ عیراقێ ھەر یامای”.