ل دۆر هاتنا ھێزێن تورکی بۆ عیراقێ روسیا شکەستن ل جڤاتا ئاسايشێ خوار
ئەڤرۆ نیوز، ئەیاد بەرواری:
بالیۆزێ روسی ل نەتەوێن ئێکگرتی (فیتالی تشورکین) دلتەنگیا وەلاتێ خوە راگەھاند، ژ ب دەستڤەنەئینانا ئارمانجا روسیا ژ کۆمبوونا گرتی یا جڤاتا ئاسایشا نێڤدەولەتی ل شەڤا سێشەمبی 8ى كانوونا ئێكێ 2015 ێ، ل دۆر پرسا بەلاڤبوونا لەشکرێن تورک ل نێزیک مووسل و ئاماژە دا کۆمبوونا جڤاتا ئاسایشا نێڤدەولەتی چو بڕیار ل دۆر نەچارکرنا ئەنقەرێ بۆ وەرگرتنا پێرابوونێن پێدڤی ل دۆر ڤێ پرسێ دەرنەکرن.
ل دووڤ (ھاڤینگتۆن پۆست) بالیۆزێ روسی دیارکر: “کۆمبوون گەلەک یا گرنگ بوو، مە دخواست بەیاننامەکێ بۆ رۆژنامەڤانان ل دۆر بێرێزیێ ل بەرامبەر سەروەریا ئەردێ عیراقێ بخوونین، بەلێ ھندەک ئەندامێن جڤاتێ نە خواست نەکە ئەو بابەتە رەھندێن مەزنتر ب خوەڤە بگریت و جڤاتا ئاسایشا نێڤدەولەتی چو گرنگی ب ڤێ پرسێ نەدا”.
داخۆیانیێن ھەردو بالیۆزێن روسیا و عیراقێ ل نەتەوێن ئێکگرتی، ھەڤدژیەک تێدا ھەبوو ل دۆر وی لایەنێ داخواز پێشکەشی جڤاتا ئاسایشا نێڤدەولەتی کری بۆ ئەنجامدانا وێ کۆمبوونا گرتی”.
بالیۆزێ روسی دیارکر” عیراقێ نامەک بۆ جڤاتا ئاسایشێ ڤرێکر و ڤێ چەندێ ئەم ھانداین وێ کۆمبوونا گرتی ئەنجام بدەین و سەرۆک وەزیرێن عیراقێ و بەرپرسێن دی یێن عیراقی ب ڕەنگەکێ دیار نەرازیبوونا خوە بەرچاڤ کربوو”.
ژ لایێ خوە ڤە بالیۆزێ عیراقێ ل نەتەوێن ئێکگرتی (محەمەد عەلی ئەلحەکیم) د داخۆیانیەکێ دا بۆ رۆژنامەڤانان، رەتکر کو عیراقێ داخوازا کۆمبوونا جڤاتا ئاسایشا نێڤدەولەتی کربیت ل دۆر ھەبوونا لەشکری یا تورکی ل نێزیک مووسلێ و گوت” ئەم دخوازین وێ پرسێ د ناڤبەرا بەغدا و ئەنقەرە ب ڕەنگەکێ دو قۆلی چارە بکەین و ھەکە ب پێدڤی ببینین، دێ نامەکێ بۆ جڤاتا ئاسایشا نێڤدەولەتی ھنێرین، بەلێ ھەتا نوکە مە چو نامەیێن ب ڤی ڕەنگی نە ھنارتینە”.