ل ڤێ دەڤەرا کوردستانێ ژیان نەما
ئەڤرۆ نیوز:
ئەحمەد دینچەر چاڤدێرێ سیاسی ل باکورێ کوردستانێ بۆ رۆژناما ئەڤرۆ دیار کر کو ئەڤرۆکە شەر ژ چیایان کەڤتیە ناڤ باژێران و براستی ژی ئەو یەک شاشیەکا دیرۆکی بوو، ھاتنا ھێزێن گەنجان یێن سەر ب پارتیا کرێکارێن کوردستانێ بۆ ناڤ باژێران و گەفێن کو وان د دەمێن بۆری دا ل تورکیا دکرن بۆ ئەگەرێ ھندێ کو ھێزێن تورکیا ب جھێ ئۆپەراسیۆنێن سەربازی ل چیا ل دژی ھێزێن PKK ئەنجام بدەن ڤێجارێ ل دژی خەلکێ سڤیل ئەنجام ددەن و گۆت: (نھا پتر ژ دەە ھزار سەربازێن تورکیا ل گەل ھژمارەکا زێدە تانک و چەکێن گران ل باژێرێن جودا جودا یێن باکورێ کوردستانێ بجە بووینە و شەر کەڤتیە ناڤ باژێران و ل گۆر زانیاریێن ل بەر دەستێ من ھەتا نھا ب دەھان خەلکێ مەدەنی ھاتینە کوشتن و گەلەک مالێن خەلکی وێران بووینە و ژیان ل باکورێ کوردستانێ ھاتیە راگرتن و دەولەت نھا گوە نادەتە پارتیا دیموکراتیک یا گەلان و دخوازیت ب تەمامی باژێرێن باکورێ کوردستانێ بکەتە ژێر کۆنترۆلا خوە و نھا ب گشتی ھەوەکا سەربازی ل باکوری ھەیە).
ناڤھاتی د پشکەکا دی یا ئاخڤتنا خوە دا ئەو یەک ژی دیار کر کو زەرەرمەندێن سەرەکی یێن شەرێ نھا ل باکورێ کوردستانێ خەلکێ سڤیلن و براستی ژی سیاسەتا نھا PKK برێڤە دبەت زیانەکا مەزن گەھاندە مە و ئەو یەک د دەمێ ھەلبژارتنێن یەکێ مژدارێ ژی دا دیار بوو کو خەلکێ مە دڤێت PKK رێ بدەت کو پرسا کوردی ل تورکیا ل سەر بنەمایێن ئاشتیانە بھێتە چارەکرن، لێ مخابن ئەو د رژدن کو شەری بکەن و شەر ژی ئێخستنە ناڤ باژێران و نھا ژیان ل باکوری ب تەمامی ھاتیە راگرتن و گۆت: (رۆژانە ب دەھام خێزانێن کورد ژ بەر شەری نەچارن کو بەرێ خوە بدەنە باژێرێن تورکیا و ھەکە وەسا بەردەوام بیت دێ باکورێ کوردستانێ چۆل بیت و ئەو یەک ژی مەترسیەکا گەلەک مەزنە و دڤێت بلەز شەر بھێتە راگرتن).
ل ئالیێ دی ئالتان تان ئەندامێ پارتیا دیموکراتیک یا گەلان ل پەرلەمانێ تورکیا ژی د داخۆیانیەکێ دا نەرازیبوونا خوە ل ھەمبەر سیاسەتا PKK دیار کر و راگەھاند کو ڤەکێشانا شەری بۆ ناڤ باژێران شاشیەکا گەلەک مەزن بوو و زیان گەھاندە خەلکی، ب شەری و کۆلانا خەندەکان پرسا کوردی چارە نابیت، دڤێت PKK دەلیڤێ بدەتە ئالیێن سیاسی دا کو د ناڤ پەرلەمانێ تورکیا دا کار بۆ چارەکرنا پرسا کوردی بھێتە کرن، لێ مخابن شەرێ نھا دەلیڤەیا سیاسەتکرنێ ژ مە وەرگرتیە و رۆژ ب رۆژێ ژی لاوێن مە دھێنە کوشتن و وەلاتێ مە وەک سووریێ و عیراقێ وێران دبیت.