ئۆجه‌لان: په‌كه‌كێ خه‌له‌تى كر و نوكه چ ب من نينه
ئه‌ڤرۆ نيوز:
رۆژنامه‌كا توركى ژ زارێ عه‌بدولا ئوجه‌لان به‌لاڤكر كو شه‌رێ نوكه يێ په‌كه‌كێ ل ناڤ باژێران يێ خه‌له‌ته و گه‌ل پشته‌ڤانيێ لێ ناكه‌ت، به‌لێ د نوكه دا چ ل به‌ر ده‌ستێ وى نينه.
رۆژناما “ته‌ره‌ف”يا توركى كو رۆژنامه‌كا ئۆپۆزسيۆنا توركيايه د ژمارا ئه‌ڤرۆ رۆژا پێنجشه‌مبى 24ى كانوونا ئێكێ يا 2015ێ دا، ژ زارێ به‌رپرسێن حوكمه‌تێ راگه‌هانديه: “عه‌بدولا ئۆجه‌لان، ل سه‌ر شه‌رێ ڤێ دووماهيێ يێ ناڤبه‌را په‌كه‌كێ و وه‌لاتێن توركيا ره‌خنه‌يان هه‌ر ل په‌كه‌كێ و هه‌ر ژى ل حوكمه‌تا توركيا دگريت”.
ب گۆره‌ى نوچه‌يێ رۆژنامێ كو مالپه‌رێ رووداو ژى ڤه‌گوهاستيه، ئۆجه‌لان داخوازيا ده‌سپێكرنا پرۆسا چاره‌سه‌ريێ دايه و گۆتيه: “ئه‌ز نه‌شێم چو بكه‌ن، چونكو په‌كه‌كه ب خه‌له‌ت خواندن بۆ ره‌وشێ كريه و بوويه دارده‌ستێ هێزێن نێڤده‌وله‌تى. ب هه‌لكه‌ندنا خه‌نده‌كان ژيانا خه‌لكى خستيه مه‌ترسيێ، گه‌لى ئه‌ڤه يا ديتى ژ به‌ر هندێ پشتگيريێ ل په‌كه‌كێ ناكه‌ن و چو شه‌ر بێ پشته‌ڤانيا گه‌لى سه‌رناكه‌ڤيت”.
عه‌بدولا ئۆجه‌لان رێبه‌رێ زينداكرى يێ پارتيا كرێكارێن كوردستانێ “په‌كه‌كه” ل 6ى هه‌يڤا نيسانا ئه‌ڤ ساله رێ پێ نه‌هاتيه دان ئه‌ندامێن خێزانا خوه و شاندێ ئيمرالى يێ هه‌ده‌پێ ببينيت.
سێ هه‌يڤه شه‌ره‌كێ دژوار ل هنده‌ك باژێرێن ده‌ڤه‌را باكوورێ كوردستانێ هه‌يه و شه‌رڤانێن YDG كو دهێته گۆتن سه‌ر ب په‌كه‌كێ نه ل ناڤ باژێران خه‌نده‌ك هه‌لكولاينه و ل دژى توركيا شه‌رى دكه‌ن.
ژ ئه‌گه‌رێ ڤى شه‌رێ سێ هه‌يڤى هه‌تا نوكه ب هزاران وه‌لاتى ل باكوورێ كوردستانێ نه‌چار بووينه مالێن خوه ب جهـ بهێلن، ب ده‌هان كه‌س ژێ هاتينه كوشتن و ب سه‌دان كه‌س ژى بريندار بووينه.