ب وێنە: خوارێن کوردەواری بۆ پێشمەرگەی به‌رهه‌ڤ دکەن
ئەڤرۆ نیوز، نه‌وزاد زاده:
سالەک و نیڤە گروپەکێ خوبەخش ل دھوکێ بناڤێ کارڤین خوارنێن کوردەواری بو پێشمەرگێن سەنگەران درۆستدکەن و ھەتا نھا خوارن بوو زێدەتری 48 ھزار پێشمەرگەیان ل 61 جھێن جودا جودایێن سەنگەران درۆستکرینە و دخوازن کو ھەموو تەخێن جڤاکی ل گورەی شیانێن خوە ھەڤکاریا پێشمەرگێن قارەمان بکەن و خوە ب پێشمەرگە ببینن.
دڤی واریدا فایزا سەلیم سەرپەرشتا گروپێ کارڤین بوو پشتەڤانیکرنا پێشمەرگەی بو ئەڤرۆ نیوز گۆت : ( گروپێ کارڤین ل ھەیڤا ئاب یا سالا بوری ھاتیە دامەزراندن و بوو چێکرنا خوارنێن کوردەواری بوو ھێزێن پێشمەرگەی کو ل وی دەمی پێکھتبوون ژ کومەکا ئافرەتێن خودان شیان ب ھەڤکاریا ھندەک زەلامێن چەلەنگ ، و دوڤدا لسەر داخوازیا ھژمارەکا زور یا ئەفسەر و فەرماندەیێن پێشمەرگەیان ب تایبەتی فەرماندەیێن ھێزا ئێک یا تایبەت و فەرماندە رەوان بارزانی گروپێ مە لژێر ناڤێ گروپێ کارڤین درێژی ب چێکرنا خوارنێن کوردەواری ھاتەدان و ھەتا نھا ژی ئەڤ گروپ یێ بەردەوامە و دێ بەردەوام ژی بیت و ئەڤ خەبات ژی درێژەدانە ب خەباتامەیا شورش و رزگاریخوازیا کوردستانێ کو ب شورشێن چیا دھاتنە ھژمارتن ل سالا 1997 ئەو دەما کو ئەز ب ھەڤکاریا ژنبرا خوە ل گوندێ سەرگەلێ نانپێژێن پێشمەرگەی بووین یا بەردەوامە و ئەڤە زێدەباری شوشتنا جلوبەرگێن پێشەرگەی د وان کاودانێن نەخوش دا ).
زێدەتر گۆت : ( چێکرنا خوارنێن کوردەوای ل گورەی داخوازی و ھژمارا پێشمەرگەیان دھێتە چێکرن کا ئەوان چوو جورێ خوارنێ دڤێت و ھژمارا وا چەندە و نھا ب بەردەوامی دحەفتیێ دا جارەکێ یان دوو جاران خوارن بوو پێشمەرگێن سەنگەران دھێنە چێکرن و ئەو خوارن ژی ھەر ل مالا خوە ئەز درۆستدکەم ).
فایزایێ د درژێژاھیا ئاخفتنێن خودا دیارکر ژی کو گروپێ وان ژ 31 کەسان پێکدھێت و گۆت ژی : ( مە خوارنێن کوردەواری بوو مێحوەرێ گوێر مەخمور ، سولتان عەبدوللا ، خازر ، باشیک ،ناوەران ،بەنداڤا موسل ، ئاسکێ موسل ، وانکێ ، بادوش ، تلسقوف ، زوممار ، کەسکێ، رەبیعە ، سنوونێ ، شنگالێ ، حەردان ، قەسەریج و چەند جھەکێن دن برینە ب گشتی تا نھا 61 مێحوەر و سەنگەر و جھان مە خوارن بوو برینە ، و ئەم ئەڤێ یەکێ ب ئەرکێ خوە دبینین و مەژی دڤێت مل ب ملێ پێشمەرگێ قارەمان خەباتێ بکەین و زور جاران ھندەک کەسان رێگری ژی ل مەکریە بەلێ ھندی پێشمەرگێ قارەمان د سەنگەران دابیت بەرامبەر دوژمنان ئەم ژی دێ بەردەوام بین و مە دڤێت جڤاکێ خوە تێبگەھینین کو بتنێ ئەرکێ پێشمەرگەیان نینە کوردستان بھێتە پاراستن ژ دوژمنان بەلکو ھەر کەسەک بەرپرسیارە ب پاراستنا کوردستانێ).
ناڤبری دیارکر ژی کو ئەو نھا بزاڤێ دکەن ژ بن ناڤێ گروپ دەرکەڤن و ببنە رێکخراوەک و دڤی واریدا گۆت : ( نھا ئەم یێ بزاڤێ دکەین کو مولەتا رسمی ژ حکومەتێ وەربگرین و ھەول و بزاڤان دکەین کو کارێن خوە بەرفرەتر بکەین و دەرگەە ژی یێ ڤەکریە کو ھەرکەس بکاریت ببیتە ئەندام دگەل مە و خزمەتا پێشمەرگەی بکەت).
ژلایەکێ دنڤە فەھیما یوسف خوشکا فایزایێ کو ئەو ژی ھەڤکارەکا سەرەکی دگروپی دا بو ئەڤرو دبێژیت : ( بەھرا پتریا ئەو خوارنێن کو ژلایێ گروپێ مە ڤە دھێنە چێکرن خوارنێن مینا ” ترشک ، ئیپراخ ، کوتلدەوک ، بریانی ، پەلاڤ نیسک ، دەوینک … ھتد ” بخوڤە دگرن و ئەڤ یەک ژی بیرا پێشمەرگەیان دئینن وێ یەکێ و وەسا ھزردکەن ھەر ل مالێن خوەنە و ئەم شوونا خێزانێن وان ل سەنگەران خوارنێن کوردەواری بوو وان درۆستدکەین).
ئەندامەکێ دن یێ گروپی بناڤێ دلخواز خورشید دیارکر کو چێکرنا خوارنێن کوردەواری ژلایێ گروپێ وان ڤە ب خوبەخشی یە و گۆت : ( تا نھا چوو کەس و لایەنەکێ ھەڤکاریا مە نەکریە و ئەم بتنێ وەکو گروپەک بێی ھیچ بەرامبەرک ئەڤی کارێ مروڤایەتی بوو پێشمەرگێن قارەمان دکەین )
زێدەتر گۆت : ( بەھرا پتریا جاران ئەو خوارنا ژلایێ گروپێ مە ڤە دھێتە چێکرن د ئێک دەم دا تێرا زێدەتر ژ 1000 پێشمەرگەیان دکەت بەلێ ب شێوەیەکێ گشتی دناڤبەرا ( 500 بو 1700 ) خوارن بو پێشمەرگەیان د ئێک دەم دا دھێتە چێکرن )
دلخوازی دیارکر ژی کو زور جاران چەکارێن داعش ب قەناسەیان گولە ھاڤێتنە وان و ددەتن دیارکر کو ئەو ژی بەرھەڤن وەکو پێشمەرگەی گیانی َخوە بکەن قوربانی و گۆت : ( ھێزێن ھەڤپەیمانان چەند جارەکان ئەم دیتینە دەما کو مە خوارن بوو پێشمەرگەیان دبرن و ئەوان ب تشتەکێ حێبەتی ئەڤ یەک ددیت و ب قارەمان دھژمارتین).
