ژێدەرێ کێشا کارەبا دھۆکێ ئاشکرا دبیت

ئەڤرۆ نیوز:
خالا سنووری یا ئیبراھیم خەلیل کو بۆ دەمێ 22 رۆژانە ھاتیە گرتن، ئاریشە بۆ پرۆژێ بەرھەمئینانا کارەبێ ل کواشێ دروستکریە.
ئومێد محەمەد، رێڤەبەرێ گشتیێ کۆنترۆلا کارەبا حوکمەتا ھەرێما کوردستانێَ بۆ ئەڤرۆ ئاشکرا کر کو گرتنا دەرگەھێ سنووری یێ ئیبراھیم خەلیل ئاریشە بۆ وێستگەھێن بەرھەمئینانا کارەبا ھەرێما کوردستانێ دروست کریە، چونکی 80% گازوایلا بۆ وێستگەھێن بەرھەمئینانا کارەبا کوردستانێ دھێتە دابین کرن ژ تورکیا دھێت ژبەر ڤێ چەندێ گرتنا دەرگەھی بوویە ئەگەر کو پتر ئاریشە بۆ پرۆژێ کارەبا کواشێ ل دھۆکێ دروست ببیت و گۆت: “وێستگەھا کواشێ 100% پشت بەستنێ ب گازوایلێ دکەت بەروژڤاژی وێستگەھێن سلێمانی و ھەولێر کو پشکەکا کێم ژ یەکەیێن وان پشتبەستنێ ب گازوایلێ دکەن، چونکی غازا سروشتی بۆ دھێتە دابینکرن”.
ناڤھاتی دیار کر کو پشتی دووڤچوونان پتری 20 ملیۆن لترێن گازوایلێ بۆ پرۆژێ بەرھەمئینانا کارەبێ ل کواشێ ھاتینە دابینکرن و نوکە چار یەکە کار دکەن کو ھەر یەکەکێ شیانێن دابینکرنا 125 ھەتا 130 مێگاواتێن کارەبێ ھەیە و ھەکە رۆژانە چەند ملیۆن لترێن گازوایلێ بۆ دھۆک نەھێنە دابینکرن، دێ دھۆک تووشی قەیرانا بێ کارەبیێ بیت.
ویستگەھا کواشێ یا بەرھەمئینانا کارەبێ بۆ کارپێکرنا ھەر یەکەیەکا کارەبێ رۆژانە پێدڤی ب 850 ھزار لترێن گازوایلێ ھەیە.

کۆمێنتا تە