300 کەس ل ھەرێمێ چاڤەرێ سێدارەدانێ دکەن
سەرۆکا لیژنا قانوونی ل پەرلەمانێ کوردستانێ راگەھاند، ئەڤە چەندین سالە دادگەھێن ھەرێما کوردستانێ حوکمێ سێدارەدانێ بۆ تاوانباران دەردکەن، بەلێ حوکمێ وان ناھێتە بجھئینان و ھەر وەکو حوکمێ ھەتا ھەتا زیندانکرن سەرەدەری ل گەل دھێتە کرن و گۆت: نھا نێزیکی 300 تاوانبارێن ھەرێمێ حوکمێ سێدارێ ل سەر ھەیە و چاڤەرێ مرنا خوە دکەن.
ئەڤرۆ، ئەمیر ئەترووشی:
ڤالا فەرید، سەرۆکا لیژنا قانوونی ل پەرلەمانێ کوردستانێ بۆ ئەڤرۆ دیار کر، رۆژ بۆ رۆژێ دادگەھێن ھەرێما کوردستانێ حوکمێ سێدارێ ل سەر تاوانباران دەردئێخن و ھوسا رێژا تاوانبارێن سێداری د ناڤ چاکسازیان دا زێدەتر لێ دھێت، بەلێ حوکمێ وان ناھێتە جێبەجێکرن و ھەروەکو زیندانیەکێ ھەتا ھەتا سەرەدەری ل گەل دھێتە کرن.
ڤالا خویاژی کر، نەجێبەجێکرنا حوکمێ سێدارێ بوویە ئەگەرێ زێدەبوونا کێشێن جڤاکی، چونکو ھندەک تاوانبار ھەنە گەلەک د درندەنە و ھەکە نەھێنە سێدارەدان رەنگە مەترسیێ ل سەر جڤاکی پەیدا بکەن و گۆت: باشترە ئەڤ سزایە ئێدی نەمینیتە ھەلاویستی و بھێتە جێبەجێکرن.
ناڤبریێ ئاشکرا کر کو سزایێ جێبەجێکرنێ ھاتیە راگرتن و نھا ژی چو پرۆژەیاسا ل پەرلەمانێ کوردستانێ ل بەر دەست نینن بۆ پەرلەمانی بھێنە بلندکرن و کەسێ خوە ل ڤێ یەکێ نەکریە خودان و گۆت: پێدڤیە سزایێ وان تاوانباران بھێتە بجھئینان و ئێدی د ناڤ چاکسازیان دا نەمینن.
د. ئەحمەد نەجمەددین رێڤەبەرێ گشتی یێ چاکسازی و کۆمەلایەتی ل وەزارەتا کار و کاروبارێن کۆمەلایەتی دیار کر کو ھەتا نوکە ل کوردستانێ کار ب سزایێ سێدارێ ناھێتە کرن و گۆت: رێڤەبەریا مە چەندین جاران داخوازا ئێکلاکرنا چارەنڤیسێ وان زیندانیان کریە، لێ ھەتا نوکە بەرسڤ ل سەر چارەنڤیسێ وان نەھاتیە دان”.
ژێدەرەکی ژ وەزارەتا ناڤھاتی رۆژناما ئەڤرۆ ئاگەھدار کر کو ھندەک زیندانی ھەنە ئەڤ پتری 15 سالانە چاڤەرێ یە بھێنە سێدارەدان، لێ ھێشتا حوکمێ وان نەھاتیە جێبەجێکرن.
ل دوور ئەگەرێن نە جێبەجێکرنا بڕیارێ، ئەحمەد نەجمەددین گۆت: نەجێبەجێکرن بۆ بڕیارەکا سیاسی دزڤریت. جێبەجێکرن ژی ب تنێ ل دووڤ بڕیارا سەرۆکێ ھەرێمێ یە. دەربارەی وێ چەندێ کو ھندەک تاوانبار بەری چەند سالەکان ھاتینە سێدارەدان و بۆچی نوکە بڕیار ھاتیە راوەستاندن، دبێژیت: ئەو تاوانبارە ھەموو ئەو بوون یێن ب خیانەتا گەلێ کورد و ب کریارێن تیرۆرستی ھاتینە سێدارەدان.
رێڤەبەرێ گشتی یێ کار و کاروبارێن کۆمەلایەتی دا زانین کو وان سێ جاران داخواز ژ جھێن پەیوەندیدار کریە کو چارەنڤیسێ وان ئێکلا بکەن یان ژی یاسایەکا دی دەربێخن کو حوکمێ وان ببیتە ھەتا ھەتا د زیندانێ دا یان ژی حوکمەکێ دی، دا کو چاڤەرێ حوکمێ خۆ نەکەن، لێ ئەو دخوازن رێڤەبەریێن چاکسازیان ڤێ داخوازێ ژ سەرۆکێ ھەرێمێ بکەن. گۆت ژی “ئەو وەلاتێن بریارا سێدارێ دھێتە جێبەجێکرن ژ وەلاتین دی کێم کێشە ترن”.
ھەروەسا ل عیراقێ نێزیکی 1500 کەس ل ژێر حوکمێ سێدارێ نە و ب تنێ د ئەڤ سالە دا نێزیکی 20 ھزار کەس ل جیھانێ کەفتینە بەر ڤی حوکمی و پتریا وان ژی وەلاتێ چین و ئیران و عیراقێ نە.
عەبدولجەبار عەبولرەحمان، ڤەکۆلەرێ جڤاکی بۆ ئەڤرۆ دیار کر کو نەجێبەجێکرنا حوکمێ سێدارێ ل وەلاتێ مە رەنگە ببیتە ئەگەر کو ئەو کەسێن تاوانێ دکەن ل خوە نەزڤرن و بەردەوامیێ ب تاوانان بدەن و گۆت: باشترە حوکمێ سێدارێ ئەوێ دادگەھێ دایە تاوانباری بھێتە سێدارەدان.
شارەزایێ جڤاکی نە ڤەشارت کو خودێ ژی گۆتیە دڤێت ھندەک کەسێن خراب ل ناڤ دونیایێ نەمینن دا ھندەک کەسێن دی ل شوونا وان بھێن و بەردەوامیێ ب ژیانێ بدەن، لەوما باشترە ھەر تاوانبارەکێ حوکمێ سێدارێ بکەڤیتە سەر بگەھنە سزایێ خوە، چونکو ئەو بێگومان مرۆڤەکێ خرابە و پێدڤی وی سزایە، دا کو بۆ ھندەک کەسێن دی ژی ببیتە سەربۆر و ژ تاوانێ بترسن.