لیترەکا پانزینێ ل ھندەک پانزینخانان چوو ب 420 دیناران
ئەڤرۆ نیوز:
ئەندامەکا جڤاتا پارێزگەھا سلێمانیێ بۆ رۆژناما ئەڤرۆ دیارکر، ژبەر ھەبوونا ھەڤڕکیێ د ناڤبەرا بازرگانان دا، بھایێ پانزینێ ل پارێزگەھا سلێمانیێ یێ ئەرزان بووی و ھەتاکو ل ھندەک پانزینخانان لتر ب 420 دیناران دھێتە فرۆتن، دیارکر ژی کو ئەو پانزینا ئەرزان ژ ئیماراتێ و ئیرانێ دھێتە کڕین و پانزینا ل پالاوگەھێن ھەرێمێ دھێتە بەرھەمئینان یا گرانترە.
مینا سامی ئەنداما جڤاتا پارێزگەھا سلێمانیێ ژ فراکسیۆنا پارتی دیموکراتی کوردستان بۆ رۆژناما ئەڤرۆ گوت” بازرگان پانزینێ ژ ئیماراتێ و ئیرانێ دئینن و ھەڤڕکیێ د ناڤبەرا خوەدا دکەن و ل وان ھەردو وەلاتان ب ئەرزانی دکڕن بۆ نموونە لترێ ب 350 یان ب 370 دیناران دکڕن و ھەیە ژی ب 250 دیناران دکڕن و ل ڤێرێ ژی دفرۆتنێ دا ھەڤڕکیێ دکەن ل سەر بھایان، ھەڤڕکیا بازرگانان ژی ل سەر کوالیتیا پانزینێ یە و ل سەر بھایێ وێ یە ژی”.
ل دۆر کوالیتیا وی پانزینێ بازرگان ژ دەرڤە دئینن، مینا سامی گوت” لژنەکێ پشکنین بۆ کوالیتیا وی پانزینێ یا کری و دیاربوویە کو چو گرفت تێدا نینن”.
سەبارەت وێ چەندێ چاوان پانزینا ژ دەرڤە دھێتە کڕین یا ئەرزانترە ژ وێ پانزینا ل پالاوگەھێن ھەرێما کوردستانێ دھێتە بەرھەمئینان، مینایێ گوت” ئەو یا گرانە ژبەرکو ئەو پشت بەستنێ ل سەر پالاوتنێ دکەن و ل سەر وان کۆمپانیێن بۆ دەردئینیت و کۆمپانی ژی تشتەکی وەردگرن و حوکمەت ژی دفرۆشیت دا بۆ خوە مفایەکی ژێ وەرگریت وەکو داھاتەک و نوکە پانزینا حکومی ب 600 دیناران و 700 دیناران ژی دھێتە فرۆتن”.
دیارکر ژی” من ب خوە یا دیتی ل ھندەک پانزینخانان ل سلێمانیێ پانزین ب 420 دیناران دھێتە فرۆتن”.
