دیوانا چاڤدێریا دارایی: فەرمانبەرێن ھەرێمێ پارە بۆ حەشد شەعبی ھنارتینە
ئەڤرۆ نیوز:
سەرۆکێ دیوانا چاڤدێریا دارایی ل ھەرێما کوردستانێ کۆمکرنا ھەڤکاریان ژلایێ ھژمارەکا فەرمانبەرێن ھەرێما کوردستانێ بۆ میلیشیاتێن حەشد شەعبی ئاشکرا دکەت ودبێژیت، ئەو ھاریکاریا دراڤی بۆ حەشد شەعبی ب ڕێیا بانکەکا ئەھلی یێن ھاتینە کۆمکرن و ھنارتن بۆ وان میلیشیا شیعی، ھەروەسا دیارکر، چاڤدێریا دارایی داخواز ژ سەرۆکایەتیا جڤاتا وەزیران کریە، ھەر ژ نوکە و وێڤە پڕۆژێ بودجا سالا 2017ێ بھێتە بەرھەڤکرن و ل گۆرەی داھاتێ ھەرێما کوردستانێ بھێتە خەملاندن و بێ سەروبەریا بەرێ د پرسا بودجەی دا نەمینیت.
خالد چاوشلی، سەرۆکێ دیوانا چاڤدێریا دارایی ل ھەرێما کوردستانێ بۆ ڕۆژناما ئەڤرۆ گۆت” من پێزانین یێن ژ خەلکی ل باژێڕێ ھەولێرێ وەرگرتین کو ژلایێ بانکەکا ئەھلی پارە وەکو ھاریکاری بۆ میلیشیێن حەشد شەعبی ھاتینە کۆمکرن و ژ مووچێ فەرمانبەران ھاتینە بڕین، بەلێ ئەز نوزانم دروستە یان نە، فەرمانبەرێن پارە بۆ حەشد شەعبی کۆمکرین، خەلکێ ھەرێما کوردستانێ نە و ھندەک ژوان عەرەبن، ئاریشە ئەوە کو ئەو بانک یا حوکمەتێ نینە کو دبن چاڤدێریا دیوانا چاڤدێریا دارایی دا بیت، نوکە ئەم وەکو دیوان یێ ھەماھەنگیێ ل گەل سەرۆکایەتیا جڤاتا وەزیران ل ھەرێما کوردستانێ دکەین بۆ چاڤدێریا پڕۆسا فرۆتنا پتەڕۆلا ھەرێما کوردستانێ، چونکی ھەتا نوکە ئەو پرۆسە یا زەلال نەبوو، دیسا چاڤدێریا گرێبەستێن پەتڕۆلێ و فرۆتنێ و داھاتیێن وێ نەھاتیەکرن، ل ڤێ دووماھیێ، سەرۆکایەتیا جڤاتا وەزیران داخواز ژ چاڤدێریا دارایی کریە کو ھەڤکاریا وان بکەین و ھووربینیێ تێدا بکەین، ڕاستە گەلەک دەزگەھێن دی ھەبوون د بیاڤێ پەتڕۆلێ دا کاردکرن، بەلێ ھەموو دکەسایەتی بوون و دیوانا چاڤدێریا دارایی تێدا نەبوویە، مە داخواز ژ سەرۆکایەتیا جڤاتا وەزیران کریە کو ھەر ژنوکە کار بۆ بەرھەڤکرنا بودجێ سالا داھاتی بکەن، ئەوژی ب گۆرەی داھاتی و خەرجیێن ھەرێما کوردستانێ و ئەو بێسەروبەریا سالێن بۆری نەمینیت”.
چاوشلی گۆت ژی” پێدڤیە چاکسازی ل ھەرێما کوردستانێ بھێتەکرن و ھەتا نوکە بۆ پڕۆژێ چاکسازیا سەرۆکێ ھەرێما کوردستانێ داخواز ژمە نەھاتیەکرن، ھەر دەمێ داخواز ھاتەکرن، دێ دھەڤکاربین بۆ چاکسازیێ، بەلێ یا خویایە کو چاکسازی ددەمەکێ زوو دا ناھێتەکرن و پڕۆسەکا ب زەحمەتە، بۆ نموونە نوکە بەحسێ برنا دەرڤە یا پارەی دھێـتەکرن، بانکێن ئەھلی دبن چاڤدێریا حوکمەتی دا نینن و چاڤدێریا دارایی ئاگەھداری کارێن وان نینە، ھەکە پارە چبیتە دەرڤە ژی، ب ڕێیا بانکێن ئەھلی بوویە، ژ بەر کو چو چاڤدێریەک ل سەر نینە و ب کەیفا خوە کاردکەن، ب گۆرەی قانوونا فیدڕال گۆھۆڕین و ڤەگوھاستنا پارەی بۆ دەرڤە ب ڕێیا بانکا ناڤەندیا عیراقێ یە، ھەکە ھەر بانکەکا ئەھلی ل ھەرێما کوردستانێ و عیراقێ پارە بربیتە ژ دەرڤەی عیراقی، بانکا ناڤەندی یا ئاگەھدارە، گەلەک ڕێیێن دی یێن ھەین بۆ برنەدەرڤەیا پارەی و دبیت ب ڕێیا خالێن سنوری یێن عیراقێ بیت، نەکو یێن ھەرێما کوردستانێ، بابەتێ پارەی گەلەک یێ ھەستیارە و ھەکە ھەڤکاریا دادگەھێ و بانکا ناڤەندی نەبیت، ب زەحمەت بگەھینە ئەنجامەکی، چونکی وەکو من ئاماژە بۆ کری، مە چو دەستھەلات ل سەر بانکێن ئەھلی و تایبەت نینە و ھەر پارەیەکێ ھاتبیتە گۆھۆڕین و چبیتە دەرڤە، ناڤەند ژێ بەرپرسە و ئەو ل سەر دئاگەھدارن”.
