چاڤدێرەکێ سیاسی باشترین رێ بۆ دەربازبوون ژ قەیرانێ ئاشکەرا دکەت
ئەڤرۆ نیوز:
چاڤدێرەکێ سیاسی بەحسێ ڕێیێن ئەنجامدانا چاکسازیان ل ھەرێما کوردستانێ دکەت و ئاماژە ددەتە وێ چەندێ کو چو چاکسازی بێ ئیرادە ناھێنەکرن و ئەڤە ب تنێ پارتی دیموکراتی کوردستان و ئێکەتی نشتیمانی کوردستان پێ چێ دبیت.
ڕامان ئوسمان چاڤدێرێ سیاسی بۆ رۆژناما ئەڤرۆ گۆت” بەری چاکسازی بھێـتەکرن، دڤێت ل دەسپێکێ کار بھێتەکرن کا کێشە ل کیرێ یە، ب دیتنا من کێشا ھەرێما کوردستانێ ژ سیستەمی یە، ئەڤجا سیاسی، ئابووری، قانوونی و ھەتا جڤاکی، ھەرێم ب وێ ڕامانێ گەھاندیە کو یا لەنگە و باشتر نەشێن بەرسڤا وەلاتیێ کورد بھێـتەدان، لەوا دبینم یا باشتر ئەوە سیستەمێ ئەم ل سەر دچین پێدڤیە بھێتە گوھۆڕین”.
ڕامانی زێدەتر گۆت” ھەر چ بھێـتەکرن و سیستەم نەھێتە گوھۆڕین، دێ ئەو بزاڤ ھەموو یێن میکاج کری بن و ب تنێ دێ بزاڤێن بەروەخت بن، پێدڤیە ئەڤە بھێـتەکرن دا خەلک ھەست ب ئارامیا دەروونی بکەت، چونکی نوکە کاودانێن گەلەک بەرتەنگن کو خەلک کەفتیە تێدا”.
خویاکر ژی” پارتی دیموکراتی کوردستان و ئێکەتی نشتیمانی کوردستان پشکەکن ژ چێبوونا گرفتێ و ھەر ئەو ب تنێ دشێن ڤان کێشان چارەسەر بکەن، لەوما ھەر دبێژم ھەر گوھۆڕینا بھێتەکرن یا ڕیشەیی و گوھۆڕینا سیستەمی نەبیت، نابینم یا سەرکەفتی بیت و ئەڤە ب تنێ ب ئەڤان ھەر دو حزبان ڤە دھێت و تنێ ئەڤ ھەردو حزبەنە کو دشێن ڤی مللەتی ژڤێ قەیرانێ دەربازبکەن”.
ل دووڤ بۆچوونا ڕامان عوسمان” باشترە حوکمەتەکا نوو بھێتە پێکئینان و ھندەک کەسایەتیێن ژ ھەژی بھێنە بەربژارکرن کو تەکنوکرات بن، دیسا کار بھێـتەکرن بۆ چارەسەرکرنا بابەتێ سەرۆکاتیا ھەرێما کوردستانێ و کار بھێـتەکرن کو پەرلەمانێ کوردستانێ ڕوونشتنێن خوە ئەنجام بدەت و بھێتە کاراکرن، دیسا ھەموو بزاڤ بھێنەکرن کو ھەرێما کوردستانێ و بەغدا بگەھنە ڕێککەفتنێ و تایبەت ل سەر کێشێن دارایی، دیسا بادەکا پەترۆلێ پتر زەلالی تێدا ھەبیت و ژ دەستێ بەرپرس و کۆمپانیێن حزبی بھێتە دەرخستن و سیستەمێ مووچەی ب شێوەکێ دادپەروەرانە بھێـتە ڕێکخستن”.
ڤی چاڤدێرێ سیاسی ئەو ژی گۆت” ھێزێن سیاسی ل کوردستانێ ھەکە ئیرادا ئەنجامدانا چاکسازیان نەبیت، بووینە پشکەک ژ گەندەلیێ، دیسا نابینم چ پارتێن سیاسی بۆچوونەکا رۆھن بۆ پاشەرۆژا کوردستانێ و پێشڤەبرنێ ھەبیت، بەلکو زێدەتر کارێ سیاسی یێ ڕۆژێ یە، دیسا ئەو قانوونێن حوکمەتا ھەرێما کوردستانێ کاری بۆ دکەت، پشکەکا ھەرە مەزن یا ڤان قانوونان دباش نینن و بکێر ڤی سەردەمی ناھێن و یێن بووینە کێشە بۆ کارێ وەلاتیان، دیسا نە ئومێدی دناڤ وەلاتیان دا پەیدا بوویە و نە باوەری بۆ چێبوویە”.
