ل گەل کێمکرنا فەرمانگەھان دێ فەرمانبەر ژی ھێنە کێمکرن؟
ئەڤرۆ نيوز:
پشتی لژنا بلند یا ڕوو ب ڕووبونا قەیرانان سەبارەت بڕیار و ڕێنمایێن جڤاتا وەزیران بۆ چاکسازیێ و ڕێکخستنا ھەیکەلێ حوکمەتێ ل گەل وەزارەتان کۆمبووین، دەنگویەک بەلاڤبوو کو فەرمانبەرێن چەندین رێڤەبەریان دێ چنە ب سەر وەزارەتا کار و کاروبارێن جڤاکی و مووچێن وان دێ کێم بن و چەندین رێڤەبەری دێ ھێتە ھەلوەشاندن، بەلێ شیرەتکارەکێ سەرۆکێ حوکمەتا ھەرێما کوردستانێ ڤێ چەندێ ڕەت دکەت.
دلشاد شەھاب شیرەتکارێ سەرۆکێ حوکمەتا ھەرێما کوردستانێ و ئەندامێ لژنا بلند یا ڕوو ب ڕووبونا قەیرانان بۆ باس گۆت” ب چو شێوەکی بڕیار نەھاتیە دان کو فەرمانبەر بچنە ب سەر وەزارەتا کار و کاروبارێن جڤاکی ڤە، تەرشیقکرنا حکومی و وەزارەتان، ب ڕامانا مووچە بڕین و بێکارکرنا فەرمانبەر و کارمەندان و ڤەگوھاستنا وان نینە، بەلکو بۆ ڕێکخستنا میلاکات و ھێزا کاری و کێمکرنا خەرجیانە”.
دلشادی زێدەتر گۆت” چو بڕیارەک نینە بۆ کێمکرنا فەرمانبەران یان ھنارتنا وان بۆ مال، یان ژی بچنە ب سەر وەزارەتەکا دی ڤە، ھەکە ل فەرمانگەھەکێ فەرمانبەرێن زێدە ھەبن و حوکمەتێ ل جھەکێ دی کار ب وان فەرمانبەران ھەبیت، ئەو تشتەکێ ئاسایی یە یەکێن ئیداری ل سنورێ ئیداا خوە داخوازا وان فەرمانبەران بکەن، بەلێ فەرمانبەرێن زێدە بھێنە کۆمکرن و بچنە ب سەر جھەکی یان فەرمانبەر بھێنە ھنارتن بۆ مال، چو بنەمایەک بۆ ڤێ چەندێ نینە”.
ل دووڤ پێزانینێن حوکمەتێ، ل ھەرێما کوردستانێ ملیۆنەک و 400 ھزار مووچەخۆر یێن ھەین کو ژ وێ ھژمارێ 720 ھزار مووچەخۆرێن بنەرەتی و 25 ھزار گرێبەست و بۆ ھەر ھەیڤەکێ ژی 870 ملیار دینار بۆ ھەموو مووچەخۆران دپێدڤی نە.
دلشاد شەھابی ڕەتکر کو پێشنیازەک ھەبیت تنێ مووچێ بنەرەتی ب فەرمانبەرێن زێدە بھێتە دان و بچنە ب سەر وەزارەتا کار و کاروبارێن جڤاکی ڤە و گۆت” حوکمەت دێ ڤەخواندنا ڕەوشا خوە کەت، بەلێ چو بڕیارەک نەھاتیە دان فەمانبەر بھێنە ڤەگوھاستن و مووچێن وان بھێنە کێمکرن یان پێرابوونەکا دی بەرامبەر وان بھێتە کرن”.
ب دیتنا ڤی شیرەتکارێ سەرۆکێ حوکمەتێ،چەندین فەرمانگەھێن نەپێدڤی و زێدە یێن ھەین و دێ ھێنە کێمکرن، یان ژی دێ ھێنە تێکەھەلکرن و بارێ حوکمەتێ و ھەیکەلێ حوکمەتێ دێ ھێتە بچووککرن، بەلێ مافێ فەرمانبەران دێ ھێتە پاراستن و ل سەر ستوویێ خزموتگوزاریێن خەلکی نابیت.
محەمەد ھاودیانی وەزیرێ کار و کاروبارێن جڤاکی راگەھاندبوو کو وی ئاگەە ژ وێ چەندێ نینە فەمانبەرێن زێدە بچنە ب سەر وەزارەتا کار و کاروبارێن جڤاکی ڤە.
