“موقتهدا ” د گوتارهكێدا
بوَ پشتهڤانییا پروَژێ خوه یێ چاكسازیێ ” موقتهدا ئهلسهدر” كهسایهتیێ شیعی و سهروَكێ رهوتێ سهدر ل 26/2/2016 و د خرڤهبوونهكا جهماوهرییا بهرفرهه دا ل بهغدا گوتارهكا گرنگ پێشكێشكر. توَڕهیی و نهرازیبوون بهرامبهر ڤان بارودوَخێن عێراق تیرا د بووریت یا دیار بوو د دهنگ و سهر و سیمایێ سهدری دا و رهنگڤهدان ههبوو د ناڤا جهماوهری دا ل گوَرهپانا (تهحریر). ل گوَڕهی وان دوریشمێن د هاتنه گوتن ژ لایێ سهدری ڤه، و ڤهگێران ژ لایێ خرهڤهبویان ڤه، دیار بوو كو مهبهستا گوتارا وی گههاندنا پهیامهكێ بوو كو تێنه خرڤهكرن د ڤان خالێن خوارێدا؛ ئێك : ئهو دژی گهندهلیێ و ههموو گهندهلكاران بوو و خوه ژ وان جودا كر تاكو ئهگهر ب سهر رهوتێ وی ژی ڤهبن. ئهڤ خاله رێكی ددهته سهروَكێ وهزیران كو پێرابوونا بكهت دژی ههر ئێكێ دهست د گهندهلیێدا ههبیت. دوو: پهیاما وی داكوَكی ل عێراقهكا ئازاد و ئێكگرتی دكر، و ئهڤ چهنده یا دیاربوو د بلندكرنا، بتنێ، ئالایێ عێراقێ و رێنهدان ب ئالایێن لایهنێن سیاسی. سێ: پهیام دژی ههبوونا ئهمریكا بوو ل عێراقێ و ب ئاشكهرایی داخوازییا دهركهفتنا ئهمریكا كر. ئهو هزر دكهت كو عێراق یا داگیر كریه و یا بندهسته و سهربهستییا بهغدا د دهرئێخسنا ئهمریكادا د بینیت. چوار: لایهنهكێ پهیامێ گهف بوو ل تهڤایا پروَسێسا سیاسییا عێراقێ. خرڤهبوون ل پایتهختی و بهر دهرگهه و دیوارێن دهڤهرا كهسك ل وێ روَژێ و ههرفاندن و ڤهكرنا وان دیوار و دهرگهها ل پاشهروَژێ، وهكو د گوتارا سهدری دا هاتیه گوتن، گهفێن راستهوَخونه بوَ دهستههلاتێ. ئهو هزر دكهت كو دهڤهرا كهسك هێمایێ داگیركرنێ یه و كارگهها رستنا تهڤنێ گهندهلیێ یه و دڤێت روَژهكێ بهێته ههرفاندن ژ لایێ جهماوهری ڤه. لێ گوتنهكا ههی د بێژیت ” نه گرنگه تو زهنگلێ لێ بدهی، یا گرنگ ئهوه ئێكی گوه لێ ببیت”. ل وێ خرڤهبوونێ موقتهدا ئهلسهدری ههلویست راگههاند لێ ب دیتنا من گوهێن وان كهسێن پهیام بوَ د هاته ئارستهكرن د گرتیبوون. بتنێ پهیاما وی ما د چارچوَڤێ وی جهماوهرێ خرڤهبووی دا. هیچ لایهنهكێ سیاسی بهرسڤا وی نهدا ژ بهر دوو ئهگهرا: ئێك: ململانهكا سیاسی یا ههی د ناڤبهرا هێزێن سیاسیین عێراقێ دا ب گشتی و هێزێن شیعی د ئێك دهنگ و ههلویست نینن، ژبهر هندێ ههر گرنگی پێدانهك ب پهیاما سهدری دی بیته دهستكهفتهكێ سیاسی و جهماوهری بوَ كهسایهتییا وی. دوو: ههر لایهنهكێ بهرسڤا وی بدهت و رهخنێ لێ بگریت دێ نهراستهوخوَ كهڤیته د رێزا گهندهلكاران دا. لێ ئهگهر چاڤدێرهك شروَڤهكا رهخنهیی بوَ گوتارا سهدری بكهت دێ بینیت كو هندهك ژ خالێن وی داخوازكرین نا گونجیێن ل گهل كاودانێن عێراقێ، وهكی داخوازییا دهرئێخستنا ئهمریكا. ههموو د زانن كو عێراق یا د شهرهكێ دژوار دا ل گهل تیرورستێن داعش و ئهمریكا یا سهركێشییا ههڤپهیمانهكا نێڤدهولهتی دكهت بوَ پشتهڤانییا وێ د ڤی شهریدا ژ بهر هندێ عێراق ئهڤرو پێتڤی ئهمریكایه. ژ لایهكێ دیڤه گوتارا وی پتر بوَ ئازراندندهكا دهمكییا ههستا جهماوهری بوو و بیرا مه ل وان گوتار و خرڤهبونان د ئینا ئهوێن بهری ئازادییا عێراقێ دهاتنه ب رێڤهبرن. ههر وهسا ژ بیر نهكهین رهوتێ سهدرییا پشكدارهكێ سهرهكیه د دهستههلاتێدا و دوویر نینه هندهكا ژ لایهنگیرێن وی، ئهوێن وی خوه ژ وان جودا كری، دهست د گهندهلیێدا ههبیت و دڤیا وی ئهو كهس سزا دابانه دا ببا نموونه بوَ لایهنێن دی نهك بێژیت” ئهو ژ ئهڤرو وێڤه نوینهراتییا من نا كهن”. خالهكا دی یا نهگههشتنا پهیاما وی دهما وی ماوێ خوهنیشاندانا بوَ (45) روژان درێژ كری. د ڤیا پشتی ڤێ گوتارا بهرههڤییهكا باش بوَ هاتییه كرن د دهمهكێ كورت دا ئهنجام ههبانه ل سهر گوَڕهپانا سیاسییا عێراقێ و رهنگڤهدان ههبایه ل سهروكێ ئهنجومهنێ وهزیران بوَ چاكسازییان. یا دیاره كو لایهنێن سیاسیێن عێراقێ دێ ململانا ههلبژارتنا و وهرگرتنا دهستههلاتێ گوهوَڕن بوَ ململانا پێشكێشكرنا پروَژێن چاكسازیێ. ههر لایهنهكی دڤێت خوه دیار بكهت كو وی دهست د گهندهلیێدا نینه. (حهیدهر عهبادی) سهروَكێ ئهنجومهنێ وهزیران خوه دكهته خودانێ پروَژهیهكی د دهمهكیدا ئهو سهروكێ لژنا دارایی بوو ل خوَلا سیێ یا ئهنجومهنێ نووینهران. گهندهلییا ههره مهزن د زڤریتن بوَ سهردهمێ وێ كابینا( مالكی) سهروك و (عهبادی) جاڤدێر، وهك سهروكێ لژنێ. ئهڤه سهدری ژی پروَژهك راگههاند و دوویر نینه هندهك لایهنێن دی چاڤ ل وان بكهن. بادهكا گهندهلیێ و چاكسازییا دێ وسا ئالوَز بیت كو كهس نهشێت سهرێ دهزی ببنیت، بوَ ههلكرنێ.
