رژێما ئەسەدی دخوازیت ھێرشی رۆژئاڤایێ کوردستانێ بکەت
ئه‌ڤرۆ نيوز:
ھێزێن رژێما سووریێ خوە بۆ ھێرشەکا سەر دەڤەرێن ل ژێر کۆنترۆلا ھێزێن کوردی دا بەرھەڤ دکەن و بۆ ڤێ مەبەستێ ژی ژ روسیا داخوازا پشتەڤانیێ کریە لێ روسیا داخوازا رژێما ئەسەدی رەد کریە و د ھەمان دەمی دا ژ کوردان ژی خواستیە کو بێی رزامەندیا سووریێ و جڤاکێ نێڤدەولەتی ھەرێمەکا فیدرال دروست نەکەت و ل ھەمبەر دا کورد رژدن د بجھکرنا فیدرالیێ ل رۆژئاڤایێ کوردستانێ.
ئدریس قامشلۆ ئەندامێ بەرێ یێ دەزگەھێ ئێمناھیا سووریێ د داخویانیەکی دا راگەھاند کو نەبوونا نوونەرێن کوردان د کۆمبوونێن جنێڤێ دا و لاوازبوونا لۆبیێ کوردی د ئاستێ نێڤدەولەتی دا ھێزێن کوردی ل ھەمبەر رژێما سووریێ لاواز دکەت و گۆت: (پیلانەکا دژوار و دوژمنانە یا رژێما سووریێ ل دژی کوردێن سووریێ ھەیە و ھەکە رژێم مەترسیا داعشێ و قاعیدە بشکینیت و ھندەک داخوازیێن ئەمریکا و ھەڤپەیمانیا نێڤدەولەتی قەبوول کەت دێ بەرێ چەکێن خوە بدەتە ھەرێمێن کوردان و داگیر کەت و بۆ ڤێ چەندێ ژ نھا ڤە دڤێت ھێزێن کوردی د سێ ئالیان دا خوە بھێز بکەن و یا یەکێ دڤێت کار بۆ بھێزکرنا لۆبیێ کوردی ل نێڤدەولەتی بھێتە کرن، یا دویێ دڤێت کورد خوە رێکخستن بکەن و دو بەرەکیا د ناڤبەرا خوە دا ژ ھۆلێ راکەن و یا سێیێ ژی دڤێت ژ نھا ڤە ھێزێن کوردی بنگەھێن رژێمێ و ئالیگر و سیخورێن وێ ژ ئاخا خوە دەرخینن).
ئدریسی ھەروەسا راگەھاندیە د رەوشا نھا دا ژ بەر شەرێ ل دژی داعشێ و قاعیدە ئەمریکا و روسیا خوە نێزیکی ھێزێن کوردان دکەن و د بەرنامێ ھەردو ئالیان دا ژی ئاڤاکرنا ھەرێمەکا فیدرالی بۆ کوردان نینە و گۆت: (ھێزێن کوردی د ڤێ قۆناغێ دا دڤێت دەست ژ ئۆپەراسیۆنێن بۆ بەرفرەھکرنا دەڤەرێن د بن کۆنترۆلا خوە دا بەردەن و بزاڤێ بۆ ب یەک گەھاندنا کانتۆنا عەفرینێ و کۆبانێ بدەن و ھێلەکا بھێز یا پاراستنێ دروست بکەن و زێدە باوەریێ ژی ب ھەڤپەیمانێن خوە یێن عەرەب نەکەن. د ئاستێ نێڤدەولەتی دا ژی پێدڤیا کوردان ب بھێزکرنا پەیوەندیان ھەیە و دڤێت مفایێ ژ لۆبی یا ھەرێما کوردستانێ د قادا نێڤدەولەتی دا ببینن و ھەڤکاریێ ژ ھەرێما کوردستانا عیراقێ وەربگرن، ژ بەر کو رۆلێ سەرۆکێ ھەرێما کوردستانێ و حوکمەتا ھەرێمێ د ئاستێ نێڤدەولەتی دا گەلەک بلندە).
ئدریس قامشلۆی د پشکەکا دی یا ئاخڤتنا خوە دا ژی ل سەر پیلانا کرێت یا رژێما ئەسەدی راوەستیا و راگەھاند کو رژێما سووریێ ب تایبەت ل قامشلۆ، حەسەکێ و حەلەبێ دخوازیت کۆنترۆلا کوردان لاواز بکەت و ب نھێنی ھژمارا ھێزێن خوە زێدە دکەت و گۆت: (رژێما ئەسەدی ب سەدان نامە ژ مالباتێن ب ھێز یێن عەرەبان ل قامشلۆ و حەسەکێ شاندیە و ژ وان خواستیە کو ل گەل رژێما وان کار بکەن و ژ بلی عەشیرا شەمەر عەشیرێن دی نێزیکی رژێما ئەسەدی بووینە، بۆ ڤێ یەکێ ژی ئەرکێ ھەری مەزن ل سەر رێڤەبەریا رۆژئاڤا ئەوە کو ھێلا پاراستنێ دروست بکەت و بنگەە و ئالیگرێن رژێمێ ژ قامشلۆ و حەسەکێ دەرخینیت و ھژمارا شەرڤانێن خوە ل ناڤەند و گوندێن ڤان ھەردو باژێران زێدە بکەت).
ل ئالیێ دی بەشار ئەسەد سەرۆکێ رژێما سووریێ و نوونەرێ رژێمێ ل نەتەوێن یەکگرتی ب دژواری ل دژی ئاڤاکرنا ھەرێمەکا فیدرال ل ئاخا سووریێ دەرکەڤتن و راگەھاندن کو دڤێت کورد ژ خەوێ ھشیار ببن ژ بەر کو ئەو ب چو رەنگەکی فیدرالیا کوردان قەبوول ناکەن.
