ساخله‌ميا دهۆكێ روونكرنه‌كێ به‌لاڤ دكه‌ت
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتيا ساخله‌ميا پارێزگه‌ها دهۆكێ راگه‌هاند كو ئه‌وان ب هه‌موو ره‌نگان ئاماده‌كارى بۆ خزمه‌تكرنا بريندارێن روودانا قامشلۆ كربوون، به‌لێ دياره كانتۆنا رۆژاڤا رێ ب برينداران نه‌دا بۆ دهۆك بهێنه ره‌وانه‌كرن.
د نڤيساره‌كێ دا كو رێڤه‌به‌ريا گشتيا ساخله‌ميا پارێزگه‌ها دهۆكێ دانه‌ك بۆ ئه‌ڤرۆ نيوز ره‌وانه‌كريه، ئاماژه ب وێ چه‌ندێ كريه كو ل سه‌ر داخوازيا سه‌رۆكێ هه‌رێما كوردستانێ مه‌سعود بارزانى ئه‌وان هه‌موو ئاماده‌كارى بۆ هاتنا برينداران ژ قامشلۆ كربوون و بنگه‌هـ و نه‌خۆشخانێن خوه خستبوونه د ئاماده‌باشيێ دا و 10 تيمێن ساخله‌ميێ و ئه‌مبۆلانس ژى ره‌وانه‌ى خالا سنورى يا پێشابيرێ كربوون.
دايه زانين ژى كو كانتۆنا رۆژئاڤا رێ ب بريندارێن شه‌رێ قامشلۆ نه‌دايه ب مه‌ره‌ما چاره‌سه‌ريێ سه‌ره‌دانا هه‌رێما كوردستانێ بكه‌ن.
پێشتر شەوكەت بەربوھاری، رێڤه‌به‌رێ خالا سنورى يا پێشابيرێ بۆ راگه‌هاندبوو كو ئاسايشا په‌يه‌دێ ل سێمالكا رێ ناده‌ت بريندارێن شه‌رێ قامشلۆ بۆ هه‌رێما كوردستانێ بهێنه ره‌وانه‌كرن.
مالپه‌رێ تۆڕا ده‌نگوباسێن سلێمانيێ ژى ل رێكه‌فتى 24ى نيسانا 2016ێ نووچه‌ك به‌لاڤكريه و ژ زار ده‌ڤێ نوونه‌ره‌كێ كانتۆنێن رۆژئاڤا ل هه‌رێمێ ئاماژه ب وێ چه‌ندێ كريه كو وان پێدڤى ب چاره‌سه‌ريا برينداران ل دهۆكێ نينه و ب تنێ ئێك بريندار بۆ ساخله‌ميا دهۆكێ هاتيه ره‌وانه‌كرن.
هه‌مبه‌ر ڤێ چه‌ندێ رێڤه‌به‌ريا گشتيا ساخله‌ميا پارێزگه‌ها دهۆكێ ته‌كست ل سه‌ر وێ چه‌ندێ دكه‌ت كو كانتۆنا رۆژئاڤا رێ نه‌دايه بريندارێن وان بۆ هه‌رێما كوردستانێ بهێنه ره‌وانه‌كرن.
ته‌كست كريه ژى كو ئه‌و هه‌رده‌م ل گه‌ل ئێش و ئازارێن برايێن خوه يێن رۆژاڤا بووينه و چه‌ندين جاران ده‌رمان و پێدڤيێن نوشدارى ره‌وانه‌ى كانتۆنێن رۆژئاڤا كرينه و بريندارێن وان ده‌رمان كرينه و شه‌هيدێن وان ب رێيا ساخله‌ميا دهۆكێ هاتينه روانه‌كرن.
ئه‌ڤه د ده‌مه‌كى دايه كو پشتى روودانا شه‌رى د ناڤبه‌را هێزێن ئاسايشا رۆژئاڤايێ كوردستانێ و رژێما سوريا ل قامشلۆ مه‌سعود بارزانى سه‌رۆكێ هه‌رێما كوردستانێ هه‌موو بنگه‌هێن ساخله‌ميێ و نه‌خۆشخانێن هه‌رێمێ خستنه حاله‌تێ ئاماده باشيێ بۆ وه‌رگرتنا بريندارێن روودانا قامشلۆ.
