ئەڤ سالە قوتابی ل دووڤ سیستەمەکێ نوو دێ ھێنە وەرگرتن
ئەڤرۆ نیوز:
وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ وەرگرتنا قوتابیان بۆ سالا بھێت یا خواندنێ ل زانکۆ و پەیمانگەھان ل دووڤ سیستەمەکێ نوو گەنگەشە دکەت، وەزیرێ خواندنا بلند ژی دبێژیت: سیستەمێ نوو یێ وەرگرتنا قوتابیان جھێ سیستەمێ بەرێ ناگریت.
د. یوسف گۆران، وەزیرێ خواندنا بلند و ڤەکۆلینێن زانستی ئاشکرا کر، سیستەمێ ناڤەندی یێ وەرگرتنا قوتابیان، ژ بلی کو بزاڤ و شیانێن مامۆستایان و مەزاختنەکا زێدە ب ھەروە ددەت، د ھەمان دەم دا شیانێن بەرەبابەکی ژی ب ھەروە ددەت و گۆت: “ب مەرەما چارەکا گونجای و روو ب رووبوونا ڤێ ئاریشێ دیتنا سیستەمەکێ نوویە، کو دەلیڤێ پتر بدەتە قوتابیان و پتر خزمەتێ بگەھینیتە جڤاکی”.
وەزیرێ خواندنا بلند د چارچوڤێ سەرپەرشتیکرنا کۆمبوونا تایبەت یا پێنگاڤێن دانانا سیستەمەکێ نوو بناڤێ (سیستەمێ وەرگرتنا زانکۆیی) گۆتژی: “مە ل جڤاتا وەزارەتێ بڕیار دایە، پێنگاڤا ئێکێ یا ڤی سیستەمی بۆ سالا خواندنێ یا 2016 – 2017 دەست پێ بکەین، ھەکەر مە زانی سەرکەفتن ئینا د سالێن بھێن دادێ بەرفرەھتر لێ کەین، لێ ب رەنگەکێ گشتی (سیستەمێ وەرگرتنا زاکۆیی) نابیتە پێگوھۆرکێ (سیستەمێ ناڤەندی یێ وەرگرتنێ) ب تایبەتی بۆ ھندەک پشکان کو ئەم نەشێین دەستکاریێ تێدا بکەین”.
ناڤھاتی دا زانین کو سیستەمێ وەرگۆتنا زاکۆیی چەند خالێن باش ھەنە، ژ وان جۆرە سەربخوەیەکێ ددەتە زانکۆیان، کو ب ڤێ رێیێ دشێن ئاستێ خواندنێ ل زانکۆیان بلند بکەن، چونکو پاشەرۆژا جڤاکی پەیوەندی ب وی زانستی ڤە ھەیە یێ زانکۆیان ھەی، ھەروەسا د سیستەمێ زاکۆیی دا نمرێ رۆلێ ھەی، لێ نە ب رێژا 100% وەکو د سیستەمێ ناڤەندی یێ وەرگرتنێ دا ھەی، د سیستەمێ زاکۆیی دائەزموون و چاڤپێکەفتن دێ ھەبیت، ھندەک پیڤەر ل دووڤ پشک و بسپۆریان دێ ھێنە دانان، مینا ھەبوونا شارەزایێ د بیاڤەکێ دیارکری دا یان زانینا زمانەکی یان کارکرن د بیاڤەکی دا، لەو پتر ژ رێیەکێ ھاتیە دانان بۆ وەرگرتنا قوتابیان ب سیستەمێ وەرگرتنا زانکۆیی.
ئەو پشکێن کۆ بڕیارە ل دووڤ سیستەمێ وەرگرتنا زانکۆیی بۆ سالا بھێت یا خواندنێ 2016 – 2017 قوتابی بھێنە وەرگرتن ژ پشکێن زانستێن سیاسی، ڕاگەھاندن، شەریعەت و زانستێن ئیسلامی، وەرزش، ھۆنەر، باخچێ زارۆیان، جڤاکناسی و دەروونناسی پێکھاتینە.
